Merħba bikom, u Saħħa ...għalissa

I L - V A G A N Z I   T - T A J B A   L I L   K U L Ħ A D D !

Bħal kull Sajf ippermettuli nieħu xi ġimgħat ta' mistrieħ minħabba li f'dan iż-żmien li ġej qajla jkun hemm elezzjonijiet jew avvenimenti politiċi fix-xena internazzjonali ta' xi importanza kbira. Dejjem jekk ma jkunx hemm xi ħaġa  straordinarju, nerġà inkun magħkom b'mod regolari f'Settembru. Nawguralkom vaganzi ta' mistrieħ!

--------------------------------------------------------------------------------------

Fil-ġimgħat li għaddew ma stajtx inkun magħkom regolarment minħabba pressjoni ta' xogħol bi tħejjija għax-xhur li ġejjin. Se nipprova għalhekk nagħmel rikapitulazzjoni ta' xi avvenimenti li seħħew f'dawn l-aħħar xahrejn.

IR-RITORN TA' SILVIO BERLUSCONI

L-aktar aħbar riċenti sakemm qed nikteb hija żgur dik li l-eks Prim Ministru Taljan Silvio Berlusconi mistenni jerġà jirritorna fiċ-ċentru politiku ta' pajjiżu bi tħejjija għall-elezzjoni ġenerali li mistennija ssir kmieni s-sena d-dieħla, x'aktar fix-xahar ta' Marzu.

Li ħajru, anzi jidher li kkonvinċih jagħmel dan il-pass – wara li kien warrab minn Prim Ministru f'Novembru meta kien għad għandu maġġoranza fil-parlament, u għalhekk jiena kont ktibt li ma qbiltx miegħu f'dak il-pass li ħa – kien stħarriġ tal-opinjoni pubblika li wera li jekk hu jerġà imexxi mill-ġdid moviment taċ-ĊentruLemin, fl-elezzjoni dan joħroġ rebbieħ b'bejn 28% u 30%. Barra minhekk kienu ħafna dawk li ħajruh jagħmel dan il-pass.

Għalhekk qed jingħad li Berlusconi mistenni jqatta' s-Sajf jorganizza u jġedded il-partit tiegħu li se jinbidillu ismu u s-simbolu. Angelino Alfano, però. mistenni jibqà xorta waħda segretarju tal-partit.

FIL-LIBJA JIRBĦU l-QAWWIET MODERATI

Aħbar oħra tajba ġejja mill-pajjiż l-iepor l-aktar qribna fil-Mediterran, il-Libja. 

Wara r-rivoluzzjoni popolari li tajret lid-dittatur Gaddafi u lir-reġim tiegħu, il-poplu mar jivvota fl-ewwel elezzjonijiet ħielsa f'aktar minn 40 sena, u kontra l-biżà li kien hemm li anki f'dan il-pajjiz Għarbi, bħal per eżempju fl-Eġittu, l-elezzjoni trebbaħ lill-Islamisiti, il-Libjani jidher li taw maġġoranza lil alleanza moderata bl-isem ta' Alleanza tal-Qawwiet Nazzjonali, immexxija mill-prim ministru provviżorju attwali Maħmud Ġibril, b'taħlita ta' liberalimu nazzjonaliżmu.

SEJBA XJENTIFIKA IMPORTANTISSIMA GĦALL-BNIEDEM

Wara xhur ta' stennija x-xjenzati taċ-ĊERN (Ċentru tal-Organizzazzjoni Ewropea tar-Riċerka Nukleari) fl-Isvizzra ħabbru li identifkaw u sabu l-partiċella Higgs Boson li hija importanti għall-bidu, l-oriġini tal-Univers, tal-istess ħajja tal-bniedem, u li għalhekk spiss tissejjaħ "il-partiċella t'Alla".

Iżda d-Direttur Ġenerali taċ-ĊERN Rolf-Dieter Heur ammetta li "neħtieġu aktar kolliżjonijiet fil-Large Hadron Collider (LHC)  matul is-sena d-dieħla sabiex ikollna tweġiba definittiva għall-mistoqsja Shakespearjana 'To be or not to be', imma nemmen li għamilna progress tajjeb."

Il-partiċella hija maħsuba li tgħin tagħti l-massa lill-materja kollha fl-univers.
Nistennew bil-ħerqa aktar progress.

MESSIKU: LEJN KOMPROMESS MAT-TRAFFIKANTI TAD-DROGA

Bħalma bassru diversi opinion polls fil-Messiku f'elezzjoni dominata l-aktar mill-problema tal-vjolenza marbuta mat-traffikar tad-droga, ħareġ rebbieħ il-Partido Revolucionario Institucional (PRI) immexxi minn Pena Nieto .
Għalkemm mistennija, r-rebħa tal-PRI kienet sorpriża għall-osservaturi barranin, minħabba li l-PRI sas-sena 2000 kien ħakem il-pajjiż b'dittatura, b'taħlita ta' soċjaliżmu u nazzjonaliżmu.
Iżda mill-banda l-oħra jidher li l-Messikani ftakru li tul il-ħakma tal-PRI, fil-pajjiż, għalkemm kien hemm traffikar ta' droga mhux ftit, din kienet 'esportata' u traffikata barra l-pajjiż, għax l-atteġġjament tad-diversi presidenti u gvernijiet tar-reġim tal-PRI kien "biegħu u esportaw kemm tridu fl-Amerika ta' fuq, basta fil-pajjiż ma jkunx hawn vjolenza, u ma xxerduhix fost iż-żgħażagħ Messikani"! U hekk se jerġà jipprova jagħmel.

Fil-Greċja għadhom bla gvern

LEJN ELEZZJONI OĦRA FI ŻMIEN XAHAR

L-elezzjoni li saret l-Ħadd li għadda fil-Greċja ma swiet għal xejn għax it-tentattiv tal-President biex jiġi ffurmat gvern ġdid ta' koalizzjomni ma rnexxewx, minħabba li anki dawk li qed jagħmel illum is-Soċjalista Evangelos Venizelos m'huma se jwasslu mkien. Illum f'Atene jixgħelu t-Torċa Olimpika, iżda ma tantx jidher li hemm futur imdawwal għall-Greċja!
Dan għax mhux biss l-ebda wieħed miż-żewġ partiti kbar, dak Soċjalista (PASOK) u dak ĊentruLemini 'Demokrazija Ġdida' (ND) ma kisbux maġġoranza, imma anki kieku kellhom jiffurmaw gvern flimkien ma jkollhomx maġġoranza biżzejjed ta' siġġijiet fil-parlament, hekk kif il-partiti l-oħra kollha tal-lemin, ċentru u xellug huma kontra l-miżuri ta' awsterità li kellhom jiddaħħlu minħabba d-dejn nazzjonali.
Infatti s-sitwazzjoni f'dawk li huma persentaġġi u siġġijiet bħalissa hija hekk:
Ċentru u Lemin:
Demokrazija Ġdida (ND): 18.9% (108 siġġu); Griegi Indipendenti: 10.6% (33); Sebħ tad-Deheb: 7% (21). B'kollox: 162 siġġu
ĊentruXellug:
Koalizzjoni tax-Xellug: 16.8% (52 siġġu); Soċjalisti (PASOK) 13.3% (41); Komunisti: 8.5% (26); Xellug Demokratiku: (6.1%) 19.
B'kollox: 138 siġġu.
Dan juri li ċ-ĊentruLemin għandhom maġġoranza biżżejjed biex jiggvernaw, 162 mit-300 siġġu fil-parlament, imma l-problema bħalissa fil-Greċja hija li l-qasma politika bħalissa mhix bejn Lemin u Xellug, iżda bejn il-partiti favur l-awsteritá biex jissolvew il-problemi tad-dejn fil-pajjiż, u dawn huma l-ND u l-PASOK, u  dawk kontra, il-partiti l-oħra kollha!
Għalhekk kollox juri li l-Griegi se jkollhom imorru jivvutaw mill-ġdid f'nofs ix-xahar d-dieħel, bil-mexxej tal-ND Antonis Samaras jittama li jżied il-voti u siġġijiet biżżejjed biex jifforma gvern mas-Soċjalisti.
Diffiċli ferm wieħed ibassar kemm dan jistà jiġri, għax l-elezzjoni qed tkun kważi referendum favur u kontra l-mizuri ta' awsterità u l-bailouts mill-Unjoni Ewropea u l-Fond Monetarju Internazzjonali, li allura, skond iċ-ċifri li kisbu l-partiti bħalissa dawn, il-maġġoranza tal-elettorat huma kontra. Ma jidhirx li f'perjodu ta' xahar l-elettorat Grieg jista' jibdel fehmtu, filwaqt li kien hemm 35% li ma marrux jivvutaw, żjieda ta' kważi 6 fil-mija fuq l-aħħar elezzjoni tal-2009.
Fil-fatt iż-żewġ partiti kbar it-tnejn li huma tilfu l-voti, l-aktar is-Soċjalisti li sofrew tkaxkira nobis: minn 43.9% niżlu għal biss 13.2%, tnaqqis ta' 30.7% tal-voti. Id-Demokrazija Ġdida minn 33.5% spiċċaw bi 18.9%, tnaqqis ta' 14.6%. Hawn, però, wieħed irid ifakkar li l-ND sofra qasma fi ħdanu, proprju minħabba l-awsterità, u numru ta' deputati kienu telqu mill-partit biex waqqfu dak tal-Indipendenti Griegi, li l-Ħadd li għadda , kif ktibt, ħadu 10.6% tal-voti u rebħu 33 siġġu.
Huwa għalhekk li l-kap tal-ND Samaras illum appella biex f'każ ta' elezzjoni oħra li qed tidher dejjem aktart probabbli, il-partiti taċ-ĊentruLemin jikkollaboraw biex jiżguraw l-futur tal-Greċja fl-Unjoni Ewropea.

Elezzjonijiet Presidenzjali fi Franza (3)

TA' BLA PRINĊIPJU REBBĦU LIS-SOĊJALISTA HOLLANDE

Qabel kollox niskuża ruħi li ma kellix ċans nikkummenta qabel dwar ir-riżultat tat-tieni rawnd tal-elezzjoni għall-ħatra ta' President tar-Repubblika ta' Franza. Sal-lum żgur li tafu li ħareġ rebbieħ il-kandidat Soċjalista Francois Hollande b'51.83% kontra l-43.37% li kiseb iċ-ĊentruLemini Nicolas Sarkozy, li proprju llum ippresieda l-aħħar laqgħa tal-Kabinet tiegħu.
Minn analiżi li fl-aħħar kelli ħin nagħmel l-ewwel ħaġa li toħroġ ċara hija li filwaqt li Hollande għadda lil Sarkozy bi ftit aktar minn tlieta fil-mija, hu kabbar b'inqas minn 2% il-vantaġġ tiegħu, għax fl-ewwel rawnd kien għadda lil Sarkozy b'1.65% (28.83% kontra s-27.18%).
Issa minn kalkoli li kont għamilt wara dak l-ewwel rawnd (post tad-29/04/12) il-votanti tal-kandidati ĊentruLemini kienu leħqu 54.21% filwaqt li dawk tax-Xellug 42.24% Dan  kien ifisser illi kieku dawk kollha li vvutaw lil Sarkozy fl-ewwel rawnd jerġgħu jivvutawlu, u magħhom jingħaqdu l-maġġoranza tal-eletturi li kienu vvutaw lill-kandidata tal-Lemin Le Pen u liċ-Ċentrista Bayrou, Sarkozy kellu jiġi konfermat fil-kariga ta' President għat-tieni darba. Iżda dan ma ġarax. Għaliex?
Filwaqt li Marine Le Pen qabel it-tieni rawnd, fl-opinjoni tiegħi, żbaljat meta ddikjarat li hi ma kienet se tivvota lill-ebda wieħed miż-żewġ kandidati u appellat lill-eletturi tagħha (18%)  biex jagħmlu l-istess jew iħassru l-vot, Francois Bayrou żbalja ferm aktar minnha meta ħeġġeġ lil dawk li kienu vvutawlu fl-ewwel rawnd (9%) biex fit-tieni wieħed jivvutaw lill-kandidat Soċjalista Hollande!
Meta kif ikkalkulajt Hollande, bil-voti ta' dawk li fl-ewwel rawnd kienu vvutaw lill-Komunista Melenchon u lill-Ħadra Joly (li t-tnejn appellaw lill-votanti tagħhom jivvutaw lil Hollande) kellu jġib 42.24%, allura  jfisser li hu żjied 9.6% u dawn kisibhom mingħand votanti ta' Bayrou u Le Pen, għax bi ftit li xejn (inqas minn 1%) żjied id-distakk fuq dak tal-ewwel rawnd.
Anki skond tbassir li sar qabel it-tieni rawnd, il-maġġoranza (60%) ta' dawk li kienu vvutaw lil Le Pen, 11% x'aktarx ivvutaw lil Sarkozy, bil-kumplament ħassru l-vot (dawn żdiedu b'madwar 4% fuq l-ewwel rawnd - minn 1.92% għal 5.80%), u xi ftit lil Hollande.
Mill-banda l-oħra l-maġġoranza ta' dawk ta' Bayrou 'obdewh' u vvutaw lil Hollande, għax dan fil-fatt żjied il-voti tiegħu fuq l-ewwel rawnd b '9.6% – ftit aktar mid-9% li kien ġab Bayrou!
Dan ifisser li Hollande spiċċa jokkupa l-kariga ta' President grazzi għall-voti ta' nies bla prinċipji sodi, dawk li forsi emmnu lil min jippriedka (ġeneralment ix-Xellugin) li fi żmienna m'għadx hemm differenza bejn "Lemin" u "Xellug", u allura jiddikjaraw lilhom infushom "taċ-ċentru" – li għalija jfisser il-BAĦĦ – nies appuntu bla prinċipji sodi politiċi.
Huma dawn li tellgħu lis-Soċjalista Hollande, anki jekk huma mhumiex Soċjalisti jew Xellugin, iżda issa se jkollhom ibatu l-konsegwenzi tal-politika statalista Soċjalista li kull fejn tħaddmet kompliet għarrqet il-finanzi u l-ekonomija tal-pajjiżi fi kriżi, bħalma ġara fil-Greċja u fi Spanja.
Dan dejjem jekk ix-xahar id-dieħel s-Soċjalisti jirnexxilhom jirbħu wkoll maġġoranza ta' siġġijiet fil-parlament, u b'hekk Hollande ma jkollu xejn xi jfixklu jwettaq il-programm tiegħu, hekk kif is-Soċjalisti diġà għandhom kontroll fis-Senat.
Iżda dwar dan nikkummenta aktar 'l quddiem.

Elezzjonijiet Presidenzjali fi Franza (2)

"HOLLANDE PERIKOLUŻ GĦAL FRANZA U L-EWROPA"

Dan il-kliem mhux tiegħi, għalkemm naqbel miegħu perfettament. Dan huwa l-isem ta' editorjal tar-rivista Ingliża li ġiet pubblikata l-bieraħ The Economist. Ir-rivista li tiddikjara ruħha "liberali imma  mhux konservattiva" fl-imgħoddi xejn ma ddejqet tikkritika mexxejja politiċi magħrufin għall-fehmiet tagħhom kontra x-Xellug. Biżżejjed insemmi lil Bush u lil Berlusconi li l-Economist kien jeċċella fil-kritika u l-attakki kontrihom meta kienu jiggvernaw.
Intant fil-ħarġa tal-bieraħ bit-titlu dirett "Il-pjuttost perikoluż Monsieur Hollande" l-editur John Micklethwait jispjega għaliex is-Soċjalista li x'aktarx ikun il-president Franċiż li jmiss huwa ta' ħsara mhux biss għal Franza imma anki għall-Ewropa.
L-editur jibda billi jwissi illi li kieku Franza jsir il-pajjiż li jmiss fiż-żona Ewro li jsib ruħu fl-inkwiet, l-istess eżistenza tal-munita tkun f'dubju ssalvax, u huwa għalhekk li rebħa Soċjalista f'dak il-pajjiż tkun inkwetanti.
Ir-rivista tfakkar kif fl-2007 kienet appoġġjat lil Sarkozy, u kif hu kien sfortunat li sena biss wara ntlaqat mill-kriżi ekonomika globali. Minkejja dan hu wettaq xi riformi fosthom: illiberalizza l-universitajiet, għolla l-età tal-pensjoni, u rattab il-liġi li tobbliga lill-ħaddiema, anki jekk iridu, ma jaħdmux aktar minn 35 siegħa fil-ġimgħa; liġi li kienu daħħlu s-Soċjalisti.
L-editur jgħid però li f'ċerti ideat tiegħu, bħal dawk 'protezzjonisti' fil-każ tal-immigranti u oħrajn li l-editur iusejjaħ 'anti-Ewropej, jagħmluh imorevedibbli, iżda jiddikjara illi kieku setgħa jivvota fi Franza l-Ħadd li ġej kien jivvota xorta waħda lil Sarkozy - "mhux fuq il-merti tiegħu, imma aktar biex ma jitlax Hollande".
Dan għax Hollande m'għandu l-ebda risposta, soluzzjoni għall-problemi ta' Franza: dejn pubbliku għoli li qed ikompli jikber, defiċit li wkoll ilu jikber għal dawn l-aħħar 35 sena, banek nieqsa mill-kapital, qagħad persistenti, filwaqt li l-infieq mill-gvern Franċiż għadu l-għola fiż-żona Ewro.
Mill-banda l-oħra Hollande jitkellem ħafna dwar 'ġustizzja soċjali', iżda kważi xejn dwar il-bżonn li jinħoloq il-ġid fil-pajjiż. Għalkemm qed iwiegħed li jnaqqas id-defiċit, dan beħsiebu jagħmlu billi jgħolli t-taxxi (per eżempju li jgħolli l-għola rata ta' income tax għal 75%), u mhux billi jnaqqas l-infieq tal-gvern bħalma qed isir f'pajjiżi oħra fi kiriżi. Anzi dan se jkompli jkabbru!
Per eżempju Hollande qed iwiegħed li jimpjega 60,000 għalliema ġodda. Skond l-istess kalkoli tiegħu dan se jiswa' lill-gvern 20 Biljun Ewro tul ħames snin.
Fl-istess waqt hu qed jirreżisti kull forma ta' riforma li teffettwa l-'mudell soċjali Franċiż'. Anzi beħsiebu jerġà jbaxxi l-età tal-pensjoni għal 60 sena, anki jekk b'hekk jipperikola pensjoni diċenti għall-pensjonanti tal-futur.
Xi ottimisti qed iwarrbu l-wegħdiet l-aktar 'attraenti' (flashy isejħilhom l-editur) ta' Hollande bħala simboliċi, u jsejħu lil Hollande bħala prammatiku li' jiġi mġiegħel irabbi l-għaqal mill-Ġermanja u mill-investituri'.
Imma l-Economist qajla jemmen dan, kemm minħabba l-atteġġjament anti-business ta' Hollande, kif ukoll għax ikollu jżomm kelmtu mal-Partit Soċjalista li għadu marbut ma' ideoloġiji Xellugin antikwati, u elettorat li ma jridx jaf bir-riformi tant meħtieġa jekk irid isalva l-pajjiż.
L-editur itemm jgħid li president Franċiż li hu tant kontra l-bidla (minkejja s-slogan tiegħu!) jimmina r-rieda tal-Ewropa li tkompli bir-riformi ta' uġigħ tant meħtieġa biex tiġi salvata l-Ewro. "Dan jagħmlu bniedem perikoluż."
Jekk trid taqra l-editorjal mur f'din il-link 

Persekuzzjoni Politika fl-Ukrajna (13)

TIMOXENKO FUQ STRAJK TAL-ĠUĦ WARA LI SSAWTET

Julia Timoxenko turi t-tbenġil tad-daqqiet li nagħtat fl-istonku mill-gwardjani tal-ħabs

Il-kap tal-Oppożizzjoni u eks Prim Ministry tal-Ukrajna Julia Timoxenko illum  daħlet fl-għaxar jum ta' strajk tal-ġuħ bħala protesta wara li ssawtet minn gwardjani tal-ħabs li ħaduha b'forza mill-ħabs għal sptar tal-gvern fejn hi ma riditx tmur minħabba li ma tafdax lit-tobba tal-gvern.
Timoxenko ilha xhur tbati minn uġigħ kbir f'daharha, hekk kif bdiet tiskonta sentenza ta' 7 snin ħabs, sentenza li ġiet kundannata mill-oppożjzzoni u mill-Punent għax motivata politikament, biex tiġi mdgħajfa l-oppożizzjoni qabel l-elezzjoni li mistennija ssir f'Ottubru li ġej.
L-awtoritajiet tar-reġim tal-President Janukoviċ ċaħdu dan, iżda bint Timoxenko, Eugenia ippubblikat ritratti li juru fejn ommha ġiet msawwta d'dirgħajha u l-istonku fejn jidher it-tbenġil.
Eugenia appellat lill-Unjoni Ewropea biex timponi sanzjonijiet kontra r-reġim Ukrajn, fosthom li l-awtoritjiet ma jitħallewx jidħlu f'pajjiżi tal-UE.
Hi kompliet tgħid li ommha ma taqbilx li jiġu bojkottjati l-partiti tal-Euro 2012 li se jintlagħbu fl-Ukrajna fis-Sajf, iżda aktar favur li l-politiċi Ewropej li jattendu ma jidhrux maġenb Janukovich, la fil-grawnds u mkien iżjed fil-pajjiż bħala protesta.
Sadanittant qorti fl-Ukrajna pposponiet s-smigħ ta' kawża oħra kontra Timoxenko minħabba l-kundizzjoni ta' saħħitha, bħalma ilhom isostnu l-avukati tagħha, li issa ddikjaraw ukoll liż-żmien li nagħta, il-21 ta' Mejju, mhux biżżejjed biex Timoxenko tfieq.
Hawn taħt jidher servizz tal-BBC-TV dwar protesti fl-Ukrajna u l-marki tas-swat fuq Timoxenko.
Li ma nistax nifhem huwa kif il-BBC, aġenziji tal-aħbarijiet u l-media lokali (anki dik tal-partit li huwa mseieħeb, bħall-partit ta' Timoxenko, fil-Partit Popolari Ewropew (PPE), jibqgħu jużaw aġġettivi bħal 'allegat' swat, jew il-kliem imsawta u tbenġil jippublikawhom bejn inverted commas, biex jixħtu dubju fuq l-istqarrijiet tal-oppożizzjoni, u jpaxxu ir-reġim Ukjrajn.

Elezzjoni Presidenzjali fi Franza

MAĠĠORANZA ASSOLUTA VVUTAT KONTRA                 L-KANDIDAT SOĊJALISTA: 54.3%

Bħalma kien mistenni mill-elezzjoni tal-lum fi Franza ma sarx magħruf min se jkun il-President ta' Franza għall-ħames snin li ġejjin għax l-ebda kandidat ma kiseb 50% tal-voti f'dan l-ewwel rawnd. Iżda kontra dak li kien hemm min għamilha fatta, għallinqas fil-biċċa l-kbira tal-media internazzjonali u forsi wkoll Franċiża, l-elettorat Franċiż mhux biss ma astjenix, u  mhux talli ma vvutax lix-Xellugin, iżda maġġoranza assoluta fil-fatt ivvutat kontra l-kanfdidat Soċjalista.
Dan ifisser li anki jekk fit-tieni rawnd tal-elezzjoni, li se jsir fis-6 ta' Mejju,  l-Komunisti u l-Ħodor jivvutaw, kif qalulhom biex jagħmlu l-lejla l-mexxejja tagħhom, għall-kandidat Soċjalista. dan m'għandu l-ebda garanzija li se jkun  hu l-President tar-Repubblika Franċiża.
Imma ħalli, għal  min għadu ma jafx, ngħaddi għaċ-ċifri, għax il-matematika mhix opinjoni:
Kontra dak li kien hemm min beżżà l-Franċiżi qdew dmirhom u marru jivvutaw fil-maġġoranza tagħhom, 70 fil-mija, ftit inqas minn ħames snin ilu.

Minn riżultati uffiċjali sakemm ingħaddu 80% tal-voti  dawn jagħtu vantaġġ ta' 1.5% lis-Soċjalista Francois Hollande fuq Nicolas Sarkozy:

Hollande: 28.6%; Sarkozy:  27.1%; Le Pen (Lemin):18.1%; Melenchon (Komunista)11.1; Bayrou (Ċentru): 9.1%; Joly (Ħodor) : 2.3%.

Dan ifisser li jekk  ngħoddu l-voti li kisbu l-partiti taċ-Ċentru u Lemin dawn kisbu 54.3%, filwaqt li dawk Xellugin 42%, jiġifieri maġġoranza assoluta li ma vvutawx lill-kandidat Soċjalista Hollande.

Il-vantaġġ ta' Hollande ma jfisser xejn għat-tieni rawnd tas-6 ta' Mejju li se tkun elezzjoni totalment differenti bejn żewġ kandidati politikament distinti: Lemin kontra Xellug.

Dakinhar kollox jiddependi fejn se jmorru l-voti tal-erba' kandidat l-oħra, jiġifieri min, miż-żewġ kandidati, se jiret l-aktar voti. U hawn, bħalma ktibt fl-analiżi tiegħi nhar il-Ħamis f'In-Nazzjon, Sarkozy għandu aktar mnejn jiret minn Hollande, u dan qed ġie konfermat mir-riżultati uffiċjali.
Għalhekk diffiċli tifhem kif l-polls għadhom ibassru xi rebħa kbira għal Hollande fit-tieni rawnd. Dan għax ma nistax nimmaġina li min illum ivvota lil Marine Le Pen jew lil Francois Bayrou, ħmistax oħra jasal jivvota lis-Soċjalista Hollande, kif mistennija jagħmlu l-Komunisti, t-Trozkisti u l-Ħodor!
L-iktar li jistà jiġri huwa li ma jmorrux jivvutaw...imma dan jiswa' daqs li kieku vvutaw lil Hollande!

Dawn huma r-riżultati uffiċjali meta ngħaddu 98% tal-voti:

Persekuzzjoni Politika fl-Ukrajna (12)

PROVI TAL-INNOĊENZA TA' TIMOXENKO

Deher mill-ewwel li l-akkużi kontra l-eks Prim  Ministru u Kap tal-Oppożizznioni fl-Ukrajna Julia Timoxenko kienu biss motivati politikament sabiex il-President awtoritarju  Janukoviċ jeħles mir-rival ewlieni fl-elezzjoinijiet li se jsiru f'dak il-pajjiż aktar tard din is-sena.

L-avukat Serhij Vlasenko juri d-dokument
b'kopja biss tal-firma ta' Timoxenko

Din il-ġimgħa, iżda l-avukati tad-difiża tagħha se jressqu provi biżżejjed biex juru kemm dan hu minnu, u biex meta xagħrejn u nofs oħra l-Qorti tisma' l-appell ta' Timoxenko mis-sentenza illegali ta' 7 snin priġunerija, din tiġi kanċellata u hi tingħata mill-ġdid il-libertà.
Minn analiżi esperta li saret aktar kmieni dan ix-xahar ġie stabbilit li d-direttivi tad-delegazzjoni Ukrana waqt it-taħditiet mal-Gasprom Russa fl-2009 m'għandhomx il-firma oriġinali ta' Timoxenko imma biss kopja tagħha.
Għaldaqstant dak kollu li Timoxenko hija akkużata bih – li allegatament hi ffirmat xi ħaġa – hija mgiddba minn dak li sabu esperti indipendenti. Għalhekk hi ma kisritx il-liġi billi tat xi direttivi meta fl-2009 kienu ġew iffirmati xi ftehim dwar xiri ta' gass mir-Russja.
L-appell mistenni jinstema' fil-15 ta' Mejju.

ORDNI MILL-QORTI EWROPEA TAD-DRITTIJIET UMANI

Sadanittant qed jiżdiedu l-kundanni u l-appelli biex tfittex tinħeles mill-ħabs u biex tiġi kkurata kif xieraq.
L-amministrazzjoni ta' Janukoviċ għadha qed tirreżisti l-ordni li ħarġet l-Qorti Ewropea tad-Drittijiet tal-Bniedem biex Timoxenko tiġi kurata fi sptar speċjalizzat tal-għażla tagħha. Dan wara li tim internazzjonali ta' tobba li żarha kkonkluda li l-eks prim ministru teħtieġ kura barra l-ħabs, fejn l-avukati u l-familjari tagħha qed isostnu li r-reġim qed jipprova joqtolha ftit ftit.

APPELLI BIEX JIĠU BOJKOTTJATI L-EURO 2012 FL-UKRAJNA

Numru ta' Membri Parlamentari Ewropej kitbu ittra lill-President tal-UEFA biex waqt iż-żjara tiegħu fl-Ukrajna iseemi fil-pubbliku u jitkellem mal-awtoritajiet dwar l-oppressjoni polkitika u l-inġustizzji.
Diversi maniġers ta' klabbs tal-football diħà ħabbru li se jibbojkottjaw l-logħbiet fl-Ukrajna, mhux se jmorru jaraw il-partiti u lanqas jarawhom fuq it-televiżjoni.
Fuq l-internet hemm ukoll paġna f'Facebook għall-bojkott dinji tal-EURO 2012.

BINT TIMOXENKO TINDIRIZZA L-PARLAMENT TALJAN

Eugenia Timoxenko, bint Julia, waqt żjara fl-Italja indirizzat il-Kummissjoni Affarijiet Barranin tal-parlament dwar il-qagħda ta' ommha fil-ħabs, u l-periklu għad-demokrazija u libertà fl-Ukrajna. Hi ltaqgħet ukoll ma' rappreżentanti ta' diversi partiti politiċi.
Aktar kmieni dan  ix-xahar waqt laqgħa tal-Partit Popolari Ewropew, fuq proposta tal-President tal-Popolo della Libertà Silvio Berlusconi,  il-PPE waqqaf kummissjoni biex jittieħdu miżuri favur il-ħelsien  ta' Timoxenko.

It-Tibdil fil-Klima

RESQIN LEJN 50 SENA TA' AKTAR KESĦA MHUX AKTAR SĦANA

Studju riċenti  mill-Akkademja tax-Xjenzi Russa ibassar li d-dinja riesqa lejn mill-inqas 50 sena ta' temperaturi baxxi ferm, fost l-inqas f'dawn l-aħħar 7500 sena ... altru milli aktar tisħin tal-pjaneta tagħna.
L-istudjuż tal-astrofiżika Habibullo I. Abdussamatov tal-Osservatorju  ta' Pulkovo tal-Akkademja tax-Xjenza Russa filwaqt li qal li din ix-xejra diġà bdiet għax għal dawn l-aħħar 15-il sena t-temperatura tal-pjaneta tagħna ma żdiditx, minflok mill-2014 nistennew l-bidu ta' tkessih qawwi b'Little Ice Age fl-2055.
Fl-Abstract tal-Applied Physics Research (Vol. 4 No.1) jingħad hekk:
"We can expect the onset of a deep bicentennial minimum of total solar irradiance (TSI) in approximately 2042±11 and the 19th deep minimum of global temperature in the past 7500 years – in 2055±11."
Fi kliem ieħor il-qawwa tar-raġġi tax-xemx se tonqos, u allura anki t-temperatura tad-dinja sal-2055 mistennija tinżel għad-19 l-inqas livell fl-aħħar 7500 sena.
Jekk xi xettiku, iżda, xorta jrid indikazzjoni ta' kemm dan hu possibbli, għal lum insemmi dan:
Fi Greenland u l-Alaska bħalissa hemm aktar silġ milli kien hemm fl-1979, meta s-silġ f'dik is-sena kien leħaq l-għola livell li qatt kesha l-Alaska.  Imbagħad xi xjenzjati fix-Xitwa kienu qed jgħidulna li n-nuqqas ta' silġ fl-Artiku kien qed jikkawża kesħa rekord f'diversi nħawi tad-dinja! 

Wara l-Libja s-Sirja (3)

IR-RUSSJA TIBGĦAT ARMI U SULDATI SPEĊJALI LEJN IS-SIRJA

Wara li flimkien maċ-Cina kienet ivvutat kontra riżoluzzjoni ta' kundanna kontra l-President tas-Sirja Assad, il-BBC-TV ħabbar li r-Russja bagħtet grupp ta' suldati tal-qawwiet speċjali lejn is-Sirja. Dan wara li l-kap tal-Grupp LiberalDemokratiku fil-Parlament Ewropew Guy Vehrofstadt svela li qawwiet speċjali Russi kienu ħattew armi għar-reġim ta' Assad biex jintużaw kontra ċ-ċittadini u l-ġellieda għall-ħelsien.
Ir-rapport tal-BBC jgħid li t-tagħrif li għandu ġabruh ir-reporters tiegħu minn imkejjen preċiżi qrib il-Pjazza l-Ħamra, u skond dawn is-suldati waslu fil-port ta' Tartus, fis-Sirja fuq it-tanker "Iman".

Karikatura li dehret fir-rivista "The Economist" li tikkritika d-'doppia
faccia' ta' Putin f'dak li huwa indħil barrani fis-Sirja

Ambjenti qrib il-Kremlin qed isostnu li t-tanker jagħmel parti mill-flotta tal-Baħar l-Iswed, li xogħlha huwa loġistiku - bħal per eżempju l-evakwazzjoni ta' ċittadini Russi f'każ ta' emerġenza fil-pajjiż mxekkel minn gwerra ċivili, jew inkella kontra l-pirati.

Kurjuż imbagħad kif Putin jaqbel ma' Assad li jqies kull sforzi biex jieqaf il-ġlied u l-qtil fis-Sirja bħala "konfoffi" u "indħil barrani". Imma l-bejgħ ta' armi lir-reġim ta' Assad u l-unika bażi militari barra r-Russja f'Tartus, Putin u Assad ma jqisuhomx indħil barrani!!
Li hu żgur huwa li din il-manuvra ta' Putin qed tkabbar it-tensjoni fiż-żona, bil-pajjiżi tal-Punent, u mhux biss, qed iżiedu s-sanzjonijiet kontra r-reġim ta' Assad u l-familja tiegħu, biex jieqaf jimmassakra l-poplu tiegħu, u jwarrab.
  

It-Terrorista Qattiel fi Franza

XEBĦ MAL-ATTAKKI TERRORISTIĊI TAL-2004 FI SPANJA

L-orġa ta' delitti minn Muħammed Meraħ f'Toulouse, fi Franza li nqatel mill-pulizija speċjali tal-anti terroriżmu wara li assedjawh fid-dar fejn kien moħbi, fakkar lil ħafna fl-attakki terroristiċi li seħħew fi Spanja fl-2004.
Għalkemm, b'xorti tajba in-numru ta' vittmi kien 'biss' ta' seba' meta mqabbla mal-191 li nqatlu fi Spanja (flimkien ma' 1,800 oħra li sfaw feruti fl-attakki fuq il-ferroviji f'Madrid), ix-xebħ huwa kurjuż u wkoll inkwetanti.
Dakinhar Spanja wkoll, bħal Franza llum, kienet riesqa lejn elezzjoni partikolarment miġġielda. Kienet qamet kontroversja sħiħa dwar il-mod kif l-attakki terroristiċi kienu ġew trattati u preżentati, biż-żewġ partiti jakkużaw lil xulxin li ħbew jew dawwru l-provi għal raġunijiet elettorali. Il-Partit Popolari ta' Josè Maria Aznar, minkejja li l-opinion polls kienu qed juru li se jibqà jiggverna, spiċċa biex tilef l-elezzjoni, u sar Prim Ministru s-Soċjalista Zapatero.

Muħammed Meraħ qabel sar
terrorista kien ġuvnott moħħ
ir-riħ, li kien arrestat diversi
drabi fuq każi ta' serq

Dan għax Aznar, skond l-informazzjoni li għaddewlu, kien ddikjara li l-attakki wettquhom s-separatisti Baski tal-ETA, u kieku dan rriżulta veru, allura kien ikun ta' vantaġġ għall-partit tiegħu. Għall-kuntrarju meta beda jidher li l-attakki setgħu wettquhom Islamisti, x'aktarx b'rabtiet ma' al-Qajda, dan allura  għamel ħsara lill-PP u Aznar, minħabba s-sehem ta' Spanja fi-gwerra tal-Iraq.
Mill-banda l-oħra, malli Meraħ qatel  lill-tlett suldati ta' nisel Afrikan, u ftit wara qatel rabbi Lhudi u tlett itfal, sezzjoni tal-istampa, bħal dik xellugija La Liberation u Le Monde mill-ewwel bdew bil-qawmien tal-estremiżmu tal-lemin u Nażista, bl-iskop ovvju li mhux biss jagħmlu ħsara lill-kandidata leminija Le Pen, iżda wkoll liċ-ĊentruLemin tal-President Sarkozy u l-gvern.
Instab però li Meraħ kellu twemmin Islamiku radikali u li wettaq dawk id-delitti bħala tpattija għat-tfal li jinqatlu fil-Palestina!
Jekk, allura, l-fatt li Meraħ kien maħsub li kien estremista tal-lemin sata' jagħmel ħsara l.il Sarkozy, issa li dan ġie konfermat, li kien terrorista Islamiku allura, bħalma kitbet il-leminija Le Figaro, jpoġġi f'diffikultà lill-kandidat Soċjalista Francois Hollande għax dawn ma tantx għandhom politika ċara u soda fejn tidħol l-immigrazzjoni u l-ġlieda kontra t-terroriżmu.
Infatti hu jkollu jagħmel il-kontijiet mad-duttrina Soċjalista Mitterandjana, dwar l-aċċettazzjoni minn Franza ta' terroristi u individwi oħra xejn rakkommandabbli mid-dinja kollha, basta dawn fi Franza "jogħqodu bil-għaqal".
Minkejja dan kollu, wara li Meraħ inqatel, l-oppożizzjoni xorta waħda bdiet tattakka lill-President u gvern Franċiz għall-mod kif Meraħ ma kienx mgħasses biżżejjed biex sata' iwettaq dawk id-delitti.
Iżda l-Prim Ministru Franċiż Fillon ddikjara li l-awtoritajiet "fl-ebda mument"ma ssuspettaw li Meraħ kien perikoluż. Barra minhekk il-liġi Franċiza ma tippermettix li jiġi mgħasses jew interċettat, sorveljat kontinwament mingħajr deċiżjoni mill-Qorti xi ħadd li ma jkunx kiser il-liġi.
Hu ħabbar ukoll li Sarkozy se jressaq liġi ġdida kontra t-terroriżmu fi żmien ġimgħatejn qabel l-elezzjoni, bit-tama li din tgħaddi wkoll mis-Senat li hu kontrollat mill-oppożizzjoni.
Fuq kollox hu fakkar u faħħar lill-pulizija li rnexxilhom isolvu l-każ fi żmien rekord ta' 10 ijiem minn meta Meraħ qatel lis-suldati, u dan  huwa suċċess għall-gvern.

Ċentru-Lemin Maqsum - Jirbaħ ix-Xellug

L-EWWEL GVERN B'PARTIT WIEĦED FIS-SLOVAKKJA

Nibda qabel kollox billi niskuża ruħi għal din l-assenza tiegħi għal dawn l-aħħar ħmistax, imma kelli impenji oħra, anki familjari li ma ħallewlix wisq ħin liberu.

F'dan il-perjodu kien hemm l-elezzjoni bikrija fis-Slovakkja wara li l-oppożizzjoni Soċjalista qablet li – wara li l-ewwel darba astjeniet – tivvota favur tkabbir fl-ammont ta' self disponibbli  fil-European Financial Stability Facility tal-UE basta l-gvern ĊentruLemini ta' Ivana Radicova jirriżenja. Kien hemm  ukoll l-hekk imsejjah skandlu"tal-Gurilla" dwar wire tapping mis-servizz sigriet li kien jinvolvi kemm mill-gvern kif ukoll lill-oppożizzjoni, fejn, però, żewġ partiti fil-gvern, biex jiksbu vantaġġ elettorali bdew jikkritikaw lil Prim Ministru Radicova u lil-eks ministru Dzurinda tal-ikbar partit fil-koalizzjoni governattiva dwar l-iskandlu, meta ma kienx hemm provi validi biżżejjed fid-dokumenti pubblikati.
Minħabba f'dan kollu, fl-analiżi tiegħi ta' kull ġimgħa f'In-Nazzjon kont ittamajt li, minħabba li l-maġġoranza tal-elettorat Slovakkja ĊentruLeminija, is-Soċjalisti setgħu jiksbu maġġoranza biss jekk jiżdied in-numru ta'  dawk li ma jmorrux jivvutaw.
Ġara, però, li din id-darba s-Slovakki marru jivvutaw f'numru ikbar, anki jekk bi ftit, 0.3%, iżda dan ivvantaġġja lis-Soċjalisti li żjiedu bi ftit inqas minn 4% il-voti fuq dawk li kisbu sentejn ilu, u baqgħu l-ikbar partit. Hekku, għax anki fl-elezzjoni ta' qabel kienu s-Soċjalisti li kisbu l-aktar voti, iżda dakinhar xorta ma setgħux jiggvernaw għax ma kisbux maġġoranza ta' siġġijiet mill-150 fil-parlament.
Minflok kienu erba' partiti taċ-ĊentruLemin li ggvernaw għax bejnithom kellhom maġġoranza ta' voti u siġġijiet
Din id-darba, però il-fatt li ċ-ĊentruLemin kienu maqsumin fi 12-il partit ħadem kontrihom għax, il-voti tferrxu u s-sistema elettorali tat maġġoranza biżżejjed ta' siġġijiet lis-Soċjalisti, biex għall-ewwel darba fis-Slovakkja se jkollhom gvern magħmul minn partit wieħed – dan  minkejja li l-maġġoranza tal-elettorat xorta waħda għadha ĊentruLeminija 44.98%. Is-Soċjalisti kisbu 44.4%.
Intant is-sitt partiti taċ-ĊentruLemin għallinqas qablu li ma jappoġġjawx lis-Soċjalisti, biex issa dawn mhux se jkollhom biċċa xogħol ħafifa jiggvernaw waħedhom fil-kriżi ekonomika/finanzjarja fil-pajjiż u fl-Ewropa  – filwaqt li s-soluzzjonijiet xellugin li se jattwaw biex isolvu l-kriżi se jkomplu jgħarrqu s-sitwazzjoni, bħalma kienu għamlu meta l-aħħar li kienu fil-gvern fl-2006.
Sadanittant il-partiti taċ-ĊentruLemin, jekk iridu jikkonfrontaw bis-serjetà lis-Soċjalisti, jrid ikollhom aktart lealtà lejn xulxin, u jridu bilfors isibu mod kif jingħaqdu f'moviment jew partit wieħed kbir ħalli l-maġġoranza tal-elettorat, ĊentruLemini, jkun jistà jagħtih maġġoranza ta' siġġijiet ukoll f'elezzjoni oħra

L-Għażla tal-Kandidat Repubblikan

XEJN  DEĊIŻIV QABEL APRIL-MEJJU

Mill-għaxar stati fejn il-bieraħ saru l-elezzjonijiet primarji tar-Repubblikani biex jintgħażel il-kandidat li se jisfida lill-President Obama f'Novembru, Mitt Romnery rebaħ sitta, Rick Santorum tlieta u Newt Gingrich wieħed, b'Romney jirbaħ l-istat kruċjali ta' Ohio, iżda dan b'vantaġġ ta' wieħed fil-mija biss aktar minn Santorum: 38% kontra 37%.

L-istati fejn sar l-elezzjonijiet kienu għaxra u huwa għalhekk li l-bieraħ jissejjaħ Super Tuesday.
Ġeneralment wara dawn l-elezzjonijiet ikun kważi ċert min se jirriżulta l-kandidat tal-partit. iżda l-analisti kollha qed jaqblu li dan ma kienx il-każ din id-darba, u x'aktarx li qabel April jew Mejju r-Repubblikani mhux se jkunu għadhom għażlu l-isfidant ta' Obama.
Din mhux l-ewwel darba li ġrat. Erba' snin ilu fl-elezzjonijiet għall-għażla tal-kandidat Demokratiku dawn kienu damu sa' Ġunju biex fl-aħħar kien ħareġ rebbieħ Obama, u t-taqtigħa, anki verbalment, bejn Obama u Hilary Clinton xejn ma  kienet waħda nadifa.
Bħal dan iż-żmien f'Marzu ta' erba' snin ilu, kwart tal-partitarji ta' Clinton kienu bdew jheddu li jekk ma kenitx se tirbaħ hi n-nominazzjoni, huma kienu se jabbandunaw lill-partit Demokratiku, u jivvutaw lill-kandidat Repubblikan John McCain! Ħalliha li mbagħad, wara li Obama ntgħażel kandidat, Clinton ċediet, u l-partit kollu ingħaqad wara Obama sar-rebħa tal-Presidenza.
Biex Romney jirbaħ in-nominazzjoni jrid jirbaħ mill-inqas 1144 delegat, u s-sitwazzjoni wara Super Tuesday hija hekk:
Romney 429 delegat; Santorum 169; Gingrich 118
Ta' min jinnota li s'issa saru elezzjonijiet fejn kien jingħad li Romney kien favorit, iżda ħafna mill-istati li jmiss issa jinsabu fin-nofsinhar tal-pajjiż fejn hemm aktar Repubblikani konservattivi li xejn m'huma kuntenti bl-ideat liberali żżejjed jew dubjużi ta' Romney dwar suġġetti għall-qalb dawn il-votanti.
Għal daqshekk hawnhekk jistà ikun Santorum vantaġġjat, għalkemm mill-banda l-oħra hemm ukoll stati msejħa winner-takes-all  (fejn min jikseb maġġoranza ta' voti – ġeneralment 50%, jirbaħ id-delegati kollha f'dak l-istat) u hawn jiddependi jekk fid-'dwell' ikunux hu u Romney biss.

Elezzjoni oħra farsa fir-Russja

BĦALMA ILU MISTENNI ....'JIRBAĦ' PUTIN

Ma kienet sorpriża għal ħadd l-aħbar li ta l-lejla l-istazzjon statali Russu, li Vladimir Putin rebaħ l-elezzjoni li saret illum, biex wara intervall ta' erba' snin, għat-tielet darba, hu se jerġà jokkupa l-kariga ta' president, bħalma diversi analisti, u anki jiena, konna bassarna dakinhar stess, li Dmitri Medvedev 'leħaq' President, li ċjoè dan tal-aħħar kien se jirriserva s-siġġu lil Putin, sakemm dan jagħmel erba' snin Prim Ministru minfloku (speċi ta' musical chairs, insomma) u issa jirritorna President.
Sakemm qed nikteb, id-diversi exit polls qed jagħtu 'rebħa' lil Putin ta' bejn 51 u 61%, li xorta huwa ferm inqas mill-71% li hu kien kiseb fl-2004, u Medvedev fl-2008 meta kienu marru jivvutaw 69.7% u MHUX 64% bħalma bdiet tirraporta l-media, forsi influwenzata minn dak li bdew jgħidulhom l-awtoritajiet biex ma tidhirx d-differenza ta' kważi 6%, hekk kif dejjem aktar Russi ma jridux aktar jieħdu parti f'elezzjonijiet farsa.
Infatti volontarji li ssorveljaw l-proċess tal-elezzjoni, sa' qabel ħareġ ir-riżultat irrapurtaw abbużi bħalma jidher f'dan il-filmat tal-istazzjon France 24:

  Il-kampanja ta' Putin kienet ibbażata fuq l-istabbilità li hu rnexxielu jġib fil-pajjiż wara t-taqlib tas-Snin Disgħin meta fir-Russja veru kienet bdiet tirrenja l-anarkija, imma aktar ma għadda ż-żmien aktar dik li hu beda jsejjaħ "demokrazija sovrana" bdiet ssir dejjem  aktar awtoritarja.
Imma bħalma qal Gleb Pavlovski – li sa' xahar ilu kien minn "ta' ġewwa" fil-Kremlin – "xi ħaġa tgħidli li dan kollu mhux se jtul wisq iżjed. Ħadd, inkluż Putin, m'għandu idea x'se jiġri lis-sistema politika Russa  wara din l-elezzjoni."

L-aħħar xagħrejn, infatti, bidlu profondament ix-xenarju politiku Russu u wasslu għal kriżi profonda ta' leġittimità fir-reġim ta' Putin. Jiem biss wara l-elezzjonijiet parlamentari vilment imbagħbsa ta' Novembru, ir-reżistenza għas-saltna tiegħu bdiet dejjem tiżdied, u dak li ħadd ma bassar qabel sar realtà: Aktar minn 100,000 ruħ  ħarġu jipprotestaw kontra Putin fit-toroq ta' Moska – tlett darbiet – u l-pulizija ma waqqfithomx, u issa l-volontarji li semmejt qabel biex jissolveljaw l-elezzjoni leħqu mat-370,000 imxerrda mar-Russja kollha

Fost l-aktar persunaġġi leali lejn Putin, bħall-Ministru tal-Finanzi Alexei Kudrin u l-billjunarju Mikhajl Prokhorov bdew jinsistu fil-miftuħ għal elezzjonijiet ġodda u onesti.
F'Novembru wkoll għall-ewwel darba Putin affronta folla ostili meta ġie bbuwjat fi stadium mimli b'fans tal-boxing.
Fi kliem l-istess Pavovski "Putin ma jistax ikompli jirrenja aktar bħal xi Kżar Russu – m'għadux aktar fiċ-ċentru tal-kunsens".
Dan x'aktarx inkomplu narawh fil-jiem li ġejjin meta diġà mħabbra aktar protesti.
---------------------------------------------------------------------------------------------------------------------------------------
Elezzjoni farsa wkoll ....fl-Iran

AĦMADINEĠAD TELLIEF ...IMMA T-THEDDIDA NUKLEARI GĦADHA HEMM

Bħalma kien mistenni wkoll l-elezzjonijiet farsa li saru fl-Iran rriżultaw f'sempliċi kompetizzjoni bejn il-kandidati radikali Islamiċi tal-Ajatollaħ Kamenej u l-President Aħmadineġad, b'dan tal-aħħar jispiċċa tellief, għax issa Kamenej għandu l-maġġoranza assoluta tad-deputati fil-parlament Iranjan. B'hekk dan issa jistà jbiddel il-kostituzzjoni kif irid, anki jneħħi għal kollox il-kariga ta' President, bħalma kien issuġġerixxa xi żmien ilu bl-iskop li jwarrab lil Aħmadineġad, li kien beda jhedded ukoll il-poter tal-Ajatollaħ!
Dan però ma jfissirx li f'dik li hija politika barranija se jinbidel xi ħaġa, għax it-theddida li l-Iran jibqà jirsisti biex ikollu armi nukleari se tibqà hemm.
F'dak li għandha x'jaqsam, l-oppożizzjoni, l-mexxejja tar-riformisti għadhom arrestati f'darhom, u l-appell li sar biex jiġu bojkottjati l-elezzjonijiet jidher li ma rnexxix, għallinqas skond iċ-ċifri uffiċjali tat-turnout, għax dan kien għola milli fl-aħħar elezzjoni tal-2008.

Elezzjonijiet Presidenzjali fl-Amerika u fis-Senegal

ROMNEY JIRBAĦ BIL-ĦNIENA FL-ISTAT TIEGĦU

Mitt Romney u Rick Santorum

Il-kandidat Repubblikani għall-Elezzoni Presidenzjali f'Novembru li ġej Mitt Romney irnexxielu jirbaħ bil-ħniena fl-istat tiegħu il-Michigan fl-isfida diretta minn Rick Santorum, u b'hekk evita umiljazzjoni kerha kieku tilef. Infatti filwaqt li dan tal-aħħar kiseb 38% tal-voti fil-primaries, Romney għaddih biss bi tliet punti, biex kiseb 41% tal-voti.
Barra minhekk qed jiġi kalkukat li bħala delegati hawn se jispiċċaw bl-istess numru.
Romney rebaħ ukoll fl-istat ta' Arizona fejn hemm rebaħ b'47% kontra s-27% ta' Santorum
B'hekk Romney s'issa rebaħ f'sitt stati u Santorum f'erba'.
Imma t-tellieqa bejn Romney u Santorum għal min minnhom se jisfida lil Barak Obama għad fadlilha biex tintemm, għax filwaqt li Romney s'issa kiseb 163 delegat u Santorum 83, biex kandidat jiżgura ruħu minn nominazzjoni fil-Konvenzjoni f'Tampa fis-Sajf jrid jikseb l-appoġġ ta' mill-inqas 1144-il delegat.
Importanti ħafna, għalkemm mhux bilfors deċiziv, imma indikattiv, huma l-elezzjonijiet li se jsiru nhar it-Tlieta li ġejjin 6 ta' Marzu magħrufa bħala Super Tuesday, għax dawn isiru f'madwar 20 stat fejn iridu jintrebħu 419-il delegat, fosthom fi stati kbar importanti bħal Ohio u Georgia.

LEJN IT-TIENI ROUND FL-ELEZZJONI FIS-SENEGAL

Abdulaje Wade u Macky Sall

L-oppożizzjoni fis-Senegal għamlet pass importanti biex tiżgura li l-pajjiż jibqà igawdi l-fama ta' wieħed mill-istati Afrikani l-aktar stabbli u demokratiċi minkejja t-tentattivi tal-President Abdulaje Wade li jikseb it-tielet mandat kontroversjali, u li qajjem protesti, anki vjolenti u mdemmija.
Wade safa' umiljat minħabba li ma kisibx il-50% u fuqhom tal-voti biex jevita t-tieni round. Infatti filwaqt li hu ġab biss 34.82% tal-voti, l-eks prim ministru Macky Sall kiseb 26.57%, skond riżultati provviżorji pubblikati l-lejla mill-Kummissjoni Elettorali.
Sall kien tneħħa mill-kariga minn Wade fl-2008 wara li kellu xi jgħid miegħu, u waqqaf partit ġdid, l-Alleanza għar-Repubblika (APR), u miegħu kienu ngħaqdu oħrajn li telqu mill-partit ta' Wade.
Sall jidher li għandu ċans sabih li jegħleb lil Wade fit-tieni round, li mistenni jsir għal nofs Marzu, minħabba li, skond ftehim li għamlu qabel l-elezzjoni, il-partiti l-oħra kollha tal-oppożizzjoni issa se jappoġġaw lil Sall.

Kampanja Elettorali fi Franza (2)

SARKOZY INAQQAS ID-DIFFERENZA BEJNU U BEJN HOLLANDE

Jum biss wara d-diskors tiegħu tal-bieraħ waqt rally għall-partitarji f'Masrseilles, Nicolas Sarkozy irnexxielu jċekken id-distakk kbir li kellu dan l-aħħar fl-istħarriġ tal-opinjoni pubblika li ġieli qabeż l-20 punt bejnu u bejn ir-rivali Soċjalista għall-presidenza Francois Hollande.
Infatti poll li sar dalgħodu minn OpinionWay għall-ġurnal Le Figaro juri li Hollande qed jgħaddi lil Sarkozy b'żewġ punti biss.
Hollande jidher li għandu 29% favurih, filwaqt li Sarkozy issa jinsab b'27%.
Warajhom hemm il-kandidata Leminija tal-Front Nazzjonali, Marine Le Pen (bint Jean-Marie) li naqset 1.5% għal 16.5% ta' dawk li beħsibhom jivvutaw, filwaqt li l-appoġġ għaċ-Ċentrista Francois Bayrou għandu stabbli bi 13%.
Dan ifisser  li l-ebda kandidat ma jidher li se jikseb il-51% fl-ewwel rawnd fit-22 ta' April.
B'hekk ħafna se jkun jiddependi lil min se jagħżlu fit-tieni rawnd bejn Sarkozy u Hollande, dawk li s'issa jidher li fl-ewwel rawnd se jivvutaw liż-żewġ kandidati taċ-Ċentru u tal-Lemin.

Kampanja Elettorali fi Franza

SARKOZY: DISKORS TA' VERU STATISTA

Nicolas Sarkozy u martu Carla Bruni hekk kif waslu għar-
rally milqugħa mill-partitarji

Illum wara nofsinhar il-President Franċiż Nicolas Sarkozy fetaħ il-kampanja elettorali tiegħu għall-elezzjoni Presidenzjali tat-22 ta' April b'diskors realistiku ta' veru statista waqt rally kbir li sar f'Marseille.
Filwaqt li tema ewlenija tad-diskors ta' siegħa tiegħu kien il-valur tax-xogħol u kif tul il-presidenza tiegħu l-pajjiż evita l-katastrofi li laqtet pajjiżi oħra fl-Ewropa, akkuża lill-kandidat rivali, s-Soċjalista Francois Hollande, li mhux qed jirrealizza s-serjetà tal-kriżi finanzjarja li ħakmet l-pajjiżi kollha.
"Ma tistax tiġi fdat li tbiegħed jew toħroġ il-pajjiż minn kriżi jekk int tiċħad li din teżisti", xela' lil Hollande. "Ftakru fl-impjegat taċ-ċivil Griegi li tnaqqsitlu l-paga, ftakru fil-pensjonant Portugiż bi tnaqqis fil-pensjoni, ftakru fl-eluf ta' Amerikani li qed ikollhom jgħixu fi trailers barra t-triq. Il-verità hija li Franza ma tkaxkritx mill-kriżi ta' fiduċja, li l-pensjonijiet tal-Franċiżi ma tnaqqsux,  li l-qagħad ma splodix."
Dwar ix-xogħol ħabbar li beħsiebu jsejjaħ referendum biex dawk li ilhom żmien twil jirreġistraw jiġu mħarrġa f'xogħol ġdid.
"Huwa x-xogħol ta' uħud li jagħti xogħol lil oħrajn," qal Sarkozy, hekk kif ikkritika lill-gvernijiet Soċjalisti ta' qabel li kienu introduċew l-ġimgħa ta' 35 siegħa xogħol. "Jekk tħobb lil Franza trid tirrealizza li xi ħadd li ma jaħdimx huwa dejjem piż fuq  min jaħdem."
Hu kompla jgħid li nqata' mit-tendenza ta' gvernijiet oħra li kienu jirtiraw malli jkun hemm protesti fit-toroq, filwaqt li fakkar li kien tella' l-età tal-pensjoni minn 60 għal 62 sena. Sostna li jekk ikun hemm Hollande president dan jagħlaq l-impjanti nukleari u jiftah beraħ il-bieb għall-immigranti, u dan mhux fl-interess ta' Franza u l-Franċiżi.
Quddiem folla entużjasta ta' l-fuq minn 15,000  fis-sala, Sarkozy akkuża lil Hollande bħala giddieb li llum jgħid ħaġa u l-għada jgħid il-kontra, basta jilħaq president.
"Ma tistax, per eżempju, tippretendi li inti Thatcher f'Londra u Mitterand f'Pariġi. Liema hija l-verità?", dik ta' xi ħadd b'ideat tal-lemin jew tax-xellug? Veru każ ta' xi ħadd li jrid jogħġob lil kulħadd u ma tafx fejn int miegħu.
"Lili l-verità ma tbeżżgħanix u m'inix se nwiegħed kollox bħall-avversarji biex ningħoġob".
Sarkozy reġà fakkar f'dak li qed ikollhom iħabbtu wiċċhom miegħu l-Griegi, l-Ispanjoli, it-Taljani u l-Amerikani.
Kompla jgħid li jirrealizza li mhux kollox ward u żahar għall-Franċiżi, u li hemm min qed ibati, min m'għandux xogħol, min qed jinkwieta jsibx ruħu bla dar. Kellu jgħolli l-età tal-pensjoni, jnaqqas n-numru tal-impjegati mal-gvern u li kulħadd se jiffaċċja inqas benefiċċji.
"Għal dawk id-deċiżjonijiet nerfa' ir-responsabbiltà jiena għax kienu diffiċli, iżda kieku ma ħadthomx fejn konna nkunu llum? Din hija r-realtà, għajjat fost l-għajjat ta' approvazzjoni u ċ-ċapċip tal-partitarji.
Sarkozy, però, mhux lill-partitarji tiegħu jrid jikkonvinċi, iżda lill-elettorat li vvutalu b'maġġoranza erba' snin ilu, biex jerġà jagħmel l-istess xagħrejn oħra. S'issa, skond stħarriġ tal-opinjoni pubblika, Hollande jinsab fuq quddiem. Iżda Sarkozy mhux qed jaqtà qalbu li jirbaħ dan l-iżvantaġġ.
Barra minhekk issa ħa spinta 'l quddiem, meta Claude Allegry, figura għolja fil-Partit Soċjalista ta' Hollande u eks Ministru, beda jappoġġja lil Sarkozy bħala l-bniedem li jistà jgħaqqad in-nazzjon warajh fi żmien ta' kriżi, filwaqt li qed jikkritika lil Hollande għax kompromettenti żżejjed.
Hawn taħt link għal servizz ta' France 24 dwar ir-rally tal-bieraħ f'Marsilja:
http://www.france24.com/en/20120219-france-sarkozy-defends-record-first-campaign-rally-election
u għal min jinteressah bil-link t'hawn taħt jistà isegwi d-diskors kollu, bil-Franċiż:

L-Elezzjoni Presidenzjali fl-Amerika

RICK SANTORUM JISSOPRENDI

Meta kważi kienu għamluha fatta li l-kandidat Repubblikan għall-elezzjoni għall-ħatra ta' President tal-Istati Uniti f'Novembru kien se jkun Mitt Romney, kemm il-biċċa l-kbira tal-media Amerikana, kif ukoll l-istess establishment tal-Partit Repubblikan din il-ġimgħa tħawwdu hekk kif l-eks Senatur Rick Santorum għamel rebħiet kbar fi tlett stati fejn saru l-elezzjonijiet primarji Repubblikani: Colorado, Minnesota u Missouri.

F'Minesota saħansitra umilja lil Romney biex dan spiċċa biss fit-tielet post tal-preferenzi tar-Repubblikani li marru jivvutaw. F'Colorado veru għadda bi ftit lil Romney, imma dan kien stenna li se jkaxkar l-istat bħalma għamel fl-2008 meta rebaħ b'60%.
Dawn ir-rebħiet ta' Santorum ifissru li allura t-tellieqa għal min se jisfida lil Obama f'Novembru, għadha miftuħa beraħ meta fadal tant stati fejn iridu jsiru l-primaries Repubblikani.
Kulħadd jaf jiena fejn ninsab politikament, u hawn iddikjarajtu mill-ewwel fil-profil tiegħi: fuq il-lemin. Minn dejjem  emmint li biex tkun konvinċenti, biex tegħleb lix-Xellug, lill-poplu, lill-elettorat, trid tkun ċar miegħu, irid ikun jaf fejn eżattament tinsab, fix temmen, mingħajr tidwir ta' kliem jew taħwid fil-prinċipji: TRID TOFFRI ALTERNATTIVA VERA U ĊARA.
Inkella l-elettorat jitħawwad meta ma jagħrafx id-differenza bejnek u bejn ħaddieħor, u l-periklu jkun li dan jispiċċa ma jeżerċitax id-dritt/dmir sagrosant tal-vot, jgħidlek "dawn kollha xorta", u ma jmurx jivvota, b'vantaġġ ovvju lill-avversarju, u allura min ma jmurx jivvota jkun qiesu vvota lill-avversarju.
Fl-opinjoni tiegħi, għalhekk, dan ikun l-periklu jekk ir-Repubblikani jagħżlu bħala kandidat-rival għal Obama lil xi ħadd bħal Romney.
Għalhekk kieku kont ngħix fl-Amerika u Repubblikan kien ikolli problema b'Romney, u dan mhux minħabba t-twemmin reliġjuż Mormon tiegħu.  Kif qed jgħajjtu l-partitarji "I Pick Rick"!
Dawk ir-Repubblikani li qed jivvutaw lil Santorum qed jagħmlu dan għax huwa l-inqas wieħed korrott u għax minn dejjem baqa' fidil lejn il-prinċipji tal-Partit Repubblikan u ta' dak li temmen fih il-bażi Repubblikana.
Minbarra f'dawn l-istati, s'issa hu rebaħ ukoll fl-istat importanti ta' Iowa, biex b'hekk s'issa għadda lil Romney b'erba' stati kontra tlieta mirbuħa minn Romney, għalkemm f'numru ta' delegati, s'issa, dan tal-aħħar għadu fuq quddiem.
B'kollox ir-Repubblikani se jivvutaw f'56 primaries jew caucasus, u s'issa għadhom ivvutaw biss fi tmienja. Il-qofol se jkun ix-xahar id-dieħel, meta jsiru votazzjonijiet fi 23 stat. Jiġifieri għad fadal mhux ħażin sa' Ġunju meta dawn jintemmu, u finalment ikun magħruf il-kandidat magħżul mir-Repubblikani.

Wara l-Libja s-Sirja (2)

IR-REĠIM JOQTOL U JFERI MIJIET KBAR ... U R-RUSSJA U Ċ-ĊINA JIVVUTAW KONTRA SEJĦA GĦAR-RIŻENJA TA'  ASSAD!

Ir-reġim ta' Assad kompla jisfida l-kundanni internazzjonali, u dal-lejl wettaq massakru sħiħ kontra l-poplu ta' Homs u bliet oħra fejn hu kkalkulat li nqatlu mat-350 ruħ, inklużi nisa u tfal, u l-fuq minn 500 oħra sfaw feruti.
Il-qawwiet militari tar-reġim bdew jibbumbardjaw bl-addoċċ u f'kull direzzjoni l-belt ta' Homs, kif ukoll Idlib, u Damasku, flimkien ma' Zabadani u Madaja, bl-appoġġ ta' ħelikopters, u anki bombi bl-imsiemer, hekk kif diversi bini deher jaqbad.
Minkejja dan illum ir-Russja u ċ-Ċina ivvutaw kontra riżoluzzjoni fil-Kunsill tas-Sigurtà tan -Nazzjonijiet Uniti bħala appoġġ għall-pjan ta' paċi fis-Sirja tal-Lega Għarbija li jsejjaħ għar-riżenja tal-President Baxar Assad.
Hawnhekk qed inxandar filmat li jistà ikun xokkanti għal xi wħud minnkom, iżda nħoss li għandha tingħata idea viżwali ta' dak li għaddej minnu poplu li qed jiġġieled għal-libertà. Il-filmat (li hemm oħrajn aktar imdemma minnu) juri mejtin, jew qed imutu, kif ukoll feruti, f'moskea li serviet ta' sptar temporanju f'Kalidija, f'Homs.

L-Iran Lejn l-Elezzjoni

IMMA DAWN BIS-SERJETÀ ?!!!

Mhux qed nirreferi għall-elezzjoni li se ssir xahar ieħor għall-parlament Iranjan u li kollox qed jistenna l-poplu minbarra serjetà sabiex ir-reġim tal-Ajatollah Kamenej  u Aħmadinaġed jibqża jaħkem b'mod assolut.
Minflok il-bieraħ laqtuni filmati u ritratti ta' ċerimonji li saru f'Tehran biex jitfakkar it-33 anniversarju minn meta l-mexxej tar-rivoluzzjoni Islamika tal-1979 l-Ajatollaħ Komejni kien irritorna mill-eżilju f'Pariġi.

Xi ħadd fir-reġim ħareġ bl-idea brillanti' li jagħmel xbiha tal-kartun ta' sitt piedi ta' Komejni, li wara li żewġ suldati lebsin gala niżżluha minn ajruplan, u mmarċjaw biha għas-salut ta' reġiment gala wkoll!
Minn hemm x-xbiha ttiħdet biċ-ċerimoinji kollha f'sala fejn ministri u uffiċjali għolja tar-reġim kokka mdawrin mal-istess xbiha tal-kartun jisimgħu diskorsi tiegħu u jsallu!
Dan mhux biss wassal għal żufjettar mill-kritiċi tar-reħim li għamlu xalata b'karikaturi animati u mpinġija, imma kritika ħarxa mill-media favur ir-reġim li qisu din il-farsa bħala "in bad taste", u lill-ministri talli marru jippużaw għar-ritratti ma' xbiha fuq il-kartun. Il-karnival, insomma, ġie kmieni fl-Iran!
Sadanittant, fuq nota aktar serja, ir-reġim Iranjan din il-ġimgħa kompla bl-arresti ta' impjegati fil-media u bloggers bl-iskop li jillimita l-libertà ta' espressjoni aktar ma tersaq l-elezzjoni tat-3 ta' Marzu. Dan minkejja kundanni u appelli mill-UN Human Rights Committee f'Novembru li għadda.

Persekuzzjoni Politika fl-Ukrajna (11)

L-ISTATI UNITI SE ŻŻID IL-PRESSJONI FUQ L-UKRAJNA

"Hilary Clinton  u d-Dipartiment tal-Istat Amerikan se jżiedu l-pressjoni fuq ir-reġim ta' Janukoviċ, u jieħdu l-passi meħtieġa, jużaw mezzi ġodda biex mjgħinu jsolvu din il-kriżi u biex l-awtoritijiet iwaqqfu l-persekuzzjoni". Hekk qalet Eugenia Timosxenko waqt laqgħa mal-President Amerikan Barack Obama meta wasslet ittra personali ta' ommha Julia Timosxenko mill-ħabs lis-Segretarju tal-Istat Hilary Clinton, filwaqt li rringrazzjata tal-appoġġ  u l-ittra li Clinton kienet bagħtitilha qabel.

TOBBA INDIPENDENTI INTERNAZZJONALI SE JINVIŻTAW LIL TIMOXENKO

Tim mediku internazzjonali ta' tmien tobba minn diversi pajjiżi u mis-Salib l-Aħmar se jinviżtaw lill-Kap tal-Oppożizzjoni fil-ħabs fejn qed tinżamm fl-Ukrajna nhar l-Erbgħa li ġejjin 8 ta' Frar, biex isir magħruf l-istat veru ta' saħħa tagħha, wara  li hi mhix qed tafda lit-tobba tal-gvern.
Infatti l-uniku kundizzjioni hija li dan il-grupp ma jkunx jinkludi esperti li jaħdmu mal-Ministeru tas-Saħħa Ukren, qal id-deputat mill-Oppożizzjoni Andrij Kozemjakijn,wara li żar lil Timoxenko fil-kolonja penitenzjarja ta' Kaċanivska.
It-tobba se jkunu 2 mill-Ġermanja, 3 mill-Kanada u 3 mill-għaqda tas-Salib l-Aħmar.  Barra minhekk ħames tobba rispettati privati Ukrajni aċċettaw li jagħmlu parti minn dan it-tim.  

ID-DINJA M'GĦANDHIX TISTENNA DJALOGU ĊIVILIZZAT MA' JANUKOVIĊ

Sadattant Julia Timoxenko din il-ġimgħa għamlet appell imqanqal wara li r-reġim Ukrajn ħabbar li beda tfittxija għal eks-gvernatur u uffiċjal tal-partit ta' Timoxenko, li qed nirriproduċih kelma b'kelma, bl-Ingliż hawn taħt:
The announcement of an international search for Arsen Avakov, the former governor of Kharkiv and oblast leader of Batkivshchyna, shows what President Viktor Yanukovych really thinks about the civilized world's advice and recommendations.
Just as Europe, the European Parliament and PACE call for an immediate end to politically motivated persecution, Viktor Yanukovych starts a new wave of harassment, intimidation and blackmail of the opposition, democracy and civil society in Ukraine.
Everyone knows that Arsen Avakov’s only crime was being in the opposition and Batkivshchyna. The new repressions are blatant political payback.
I have every reason to state that all the political repressions in Ukraine, all the trials, all the political criminal cases are controlled and organized by Viktor Yanukovych personally.
Therefore, I believe it is necessary to warn European and the civilized world of the danger of dialog with this person on an equal and partnership basis.
Yanukovych’s worldview wasn’t formed in the Sorbonne or Oxford. He grew up and was raised in the criminal world, where he learned the rules of communication in Ukrainian politics and is now trying to play by them in Europe.
In his world, abandoning and deceiving someone are absolutely normal actions. And that is how Viktor Yanukovych sees the civilized world and international organizations. Moreover, it is known from private conversations that he openly flaunts his insolence when speaking with world leaders and boasts that he will not fulfill any recommendations. Because in this world this would be humiliating.
I want to warn European politicians that it’s useless to hope for mutual understanding with the Ukrainian dictator. He will never understand such concepts as honor, dignity and keeping one’s word.
I am categorically against any sanctions against Ukraine if they even slightly affect ordinary people, rather than the authorities. But I must explain to the world who they’re dealing with, so that there are no illusions about the possible development of political processes in Ukraine.

 Sincerely, Yulia Tymoshenko 

Wara l-Libja s-Sirja

MERĊENARJI IRANJANI KONTRA L-POPLU SIRJAN

Hekk kif din il-ġimgħa għaddiet sena minn meta  sena l-poplu Sirjan beda jipprotesta kontra r-reġim awtoritarju ta' Baxar al-Assad, bil-pulizija u l-armata tispara bl-adooċċ fuq id-dimostranti bil-vittmi stmati li jersqu qrib is-7000, b'madwar 400 minnhom tfal.
Minkejja l-appelli li sarulu mid-dinja kollha, Assad baqa' jinjorahom u jisfidahom, u bdew jaslu rapporti li l-gvern kien qed jimpjega anki eks-ħabsin biex jispjunaw, iwaqqfu r-rewwixti u anki joqltu. Dawn kienu qed jitħallsu €20 kuljum!
Jekk dan ma kienx biżżejjed l-Armata Ħielsa tas-Sirja din il-ġimgħa qalet li qabdet ħames Iranjani li nstab li huma suldati regolari, anzi tal-Gwardja tar-Rivoluzzjoni speċjali tar-reġim l-ieħor ġirien tal-Iran, minn fejn Assad ġabhom  apposta biex jgħinuh jeqred ir-rewwixta, għax probabbli ma bediex jafda li s-suldati se jkomplu jobdu l-ordnijiet biex joqltu lill-istess nieshom – l-istess bħalma kien jagħmel Gaddafi meta wkoll kien beda jġib il-merċenarji kontra l-poplu tiegħu.
Iżda filwaqt li Gaddafi ma kienx iħabbel rasu jiċħad dan,  mill-Iran ċaħdu dan l-indħil fir-Sirjan u qalu li l-ħames Iranjani li jidhru f'filmat li xandret l-Armata Ħielsa Sirjana kienu biss inġiniera Iranjani li nħatfu mir-ribelli Sirjani.
Il-filmat juri ħamest irġiel lebsin l-istess bl-iswed  b'azzarin Russu minn dawk li jużaw l-armata Sirjana, mingħajr  warajhom, b'wieħed minnhom jammetti li daħlu fis-Sirja f'Ottubru u f'dati oħra biex mjgħinu lis-servizz sigriet Sirjan iwaqqfu lid-dimostranti u jammetti li soaraw u qatlu nies ċivili, anki nisa u tfal, fuq ordnijiet mis-servizz sigriet tal-qawwa tal-ajru Sirjana u direttament mill-Ajjatollaħ Kamenej tal-Iran.
Sa' mill-ewwel xahar tal-protesti bdew joħorġu rapporti li l-alleati ta' Assad fil-Libanu u l-Iran kienu qed jibgħatu nies u suldati biex jgħinuh biex ikisser id-dimostrazzjonijiet bil-forza.
Dan għax dawk ir-reġimi wkoll ma jridu li jinbidel xejn fir-reġjun, għax inkella l-popli tagħhom jitħajru!
Prova oħra ta' dan ħarġu biha l-militari Iżraeljani meta osservaw li f'filmati tar-repressjoni bdew jidhru militari bid-daqna, meta s-suldati Sirjani huma projbiti milli jħallu d-daqna tikber.
Għalhrkk il-poplu Sirjan ma jistax jitħalla waħdu jiġġieled u jinqatel anki minn qawwiet barranin, u filwaqt li veru li dejjem qed jikbru s-sanzjonijiet kontra r-reġim ta' Assad, forsi wasal iż-żmien ta' intervent aktar dirett mill-komunità internazzjonali, bħalma sar fil-Libja.
Dan hu l-filmat kif intwera fuq l-istazzjon Aljazeera:

Persekuzzjoni Politika fl-Ukrajna (10)

Julia Timoxenko ma' bintha Jevhenja u żewġha
Oleksander waqt il-ġuri f'Ottubru

SANZJONIJIET KONTRA       L-UKRAJNA JEKK MA TINĦELISX TIMOXENKO

Komplew jaslu aktar kundanni u appelli kontra l-President awtoritarju tal-Ukrajna Viktor Janukoviċ, u issa anki theddid ta' sanzonijiet, kemm-il darba hu ma jeħlisx lill-Kap tal-Oppożizzjoni Julia Timoxenko mill-ħabs fejn qed tiskonta sentenza ta' seba' snin fuq akkużi meqjusa bħala motivati politikament kemm  mill-oppożizzjoni kif ukoll mill-Punent.
Kien imiss il-bieraħ lill-Assemblea Parlamentari tal-Kunsill tal-Ewropa (PACE) li, f'riżoluzzjoni mgħoddija l-bieraħ fi Strasburg dwar il-funzjoni tal-istituzzjonijiet demokratiċi fl-Ukrajna, tħeġġeġ lill-President Ukrajn biex jikkunsidra l-mezzi legali kollha possibbli biex jeħles lill-eks-Prim Ministru Timoxenko u eks-membri oħra tal-gvern, ħalli jkunu jistgħu jieħdu sehem fl-elezzjonijiet parlamentari li jmiss.
L-Assemblea appellat lill-awtoritajiet Ukrajni biex immedjatament jibdlu ż-żewġ artikli fil-liġi (ta' żmien ir-reġim Komunista) li taħthom Timoxenko ġiet dikjarata ħatja, ħalli dawn jiġu konformi mal-liġijiet Ewropej, u li jiġu rtirati l-akkużi kontra eks uffiċjali tal-gvern.
Jekk l-awtoritajiet Ukrajni ma jagħmlux dan, ir-riżoluzzjoni tipproponi li jiġu introdotti sanzjonijiet kontra l-Ukrajna.

Sadanittant bint Timoxenko, Jevħenja ġiet mistiedna tieħu sehem waqt dibattitu nhar l-Erbgħa l-1 ta' Frar fis-Senat Amerikan, li se jiddiskuti s-sitwazzjoni fl-Ukrajna. Jevħejna lmentat kemm-il darba li ommha mhix qed tingħata l-kura medika kwalifikata li tant teħtieġ, u li saħħitha dejjem sejra lura. Żewġha Oleksandr spiċċa jitlob kenn politiku fir-Repubbika Ċeka, ħalli l-awtoritajiet Ukrajni ma jkunux jistgħu jużaw lill-familja tagħha biex jirrikattaw lil Julia Timoxenko.

Rebbiegħa tal-Libertà fl-Asja ? (4)

PROBABBLI MHUX LESTI GĦAL RIVOLUZZJONI, IMMA ...

L-elezzjonijiet parlamentari fir-Repubblika eks-Sovjetika fl-Asja Ċentrali, il-Każakstan, ġew u għaddew, u, bħalma kien mistenni, kollox baqa' kif kien, u bħalma wara kollox kont inbassar fil-post tiegħi hawnhekk meta bdejt insegwi l-protesti li bdew fil-belt ta' Żanawzen minn ħaddiema fl-industrja taż-żejt li spiċċaw fi 19 maqtula u mal-100 oħra feruti mill-pulizija u mill-qawwiet armati tal-President awtoritarju Nażarbajev.
Wara dawk l-agħar inċidenti fl-istorja ta' 20 sena mill-indipendenza ta' pajjiż li kien kiseb fama għall-istabbilità politika u soċjali, il-poplu mar jivvota bit-tama li din id-darba partit verament ta' oppożizzjoni jikseb għallinqas rappreżentanza f'parlament dominat mill-parit ta' Nażarbajev Nur Otan.
Iżda filwaqt li veru ma' dan il-partit żdiedu tnejn oħra, dawn huma t-tnejn favur ir-reġim, u l-elezzjoni farsa tat maġġoranza assoluta ta' 81% tal-voti u 83 siġġu mill-108 tal-parlament, bl-uniku partit verament ta' oppożizzjoni, dak SoċjalDemokratiku Nazzjonali (OSDP) ma jirnexxielux jaqbeż is-7% tal-voti meħtieġa, anzi jnaqqas il-voti mill-aħħar elezzjoni. Mill-banda l-oħra din id-darba marru jivvutaw iżjed minn dakinhar, probabbli, għax emmnu li sata' ikun hemm oppożizzjoni vera, anki jekk żgħira, fil-parlament.
Filwaqt li l-oppożizzjoni kkundannat irregularitajiet  u frodi fl-elezzjoni, l-OSCE u d-Dipartiment ta' Stat Amerikan ma kkunsidrawhix demokratika.
L-istess kien il-każ tal-elezzjoni presidenzjali f'April tas-sena l-oħra meta Nażarbajev kiseb 95.5% tal-voti!
Mexxejja tal-OSDP ikkonkludew li wara dawn l-elezzjonijiet kull tama li l-awtoritajiet jirriformaw lilhom infushom issa għebu.
Il-fatti huma li Nażarbajev huwa awtokratu, imma hu jgawdi popolarità ġenwina mal-poplu li jidher lest ipartat l-libertà politika mal-istabbilità u tkabbir ekonomiku grazzi għall-industrja taż-żejt minkejja l-kriżi globali, bil-Prodott Gross Domestiku tal-Każakstan jikber b'7.5% is-sena li għaddiet.
Il-poplu huwa wkoll rikonoxxenrti lejn Nażarbajev talli rnexxielu jżomm l-bilanċ delikat f'dan il-pajjiż kosmopolitan ta' 130 grupp etniku.
Għalhekk osservaturi jħossu li s-sogru ta' xi "Rebbiegħa Każaka" ma jezistix fil-futur qarib. Wara r-riżultat tal-elezzjoni kienu madwar xi 100 ruħ biss li marru jipprotestaw fil-belt industrjali ta' Almaj, u huwa għalhekk li għada s-Sibt l-OSDP beħsiebu jorganizza oħra li qed jgħid li se tkun ikbar.
Ma' dan kollu wieħed irid iżied li forsi l-appoġġ mill-Punent lill-oppożizzjoni mhux daqstant konkret u sostanzjali, u s'issa kien limitat għall-kundanni verbali.
Kien hemm min nħass li r-raġuni hija li mill-Każakstan tgħaddi merkanzija vitali mill-Punent lejn l-Afganistan, hekk kif l-Pakistan qed dejjem aktar isir instabbli u ma tistax tafda fuqu.

Hawn fuq filmat li juri għadd ta' poloz tal-votazzjoni diġà mimlija (favur il-partit tal-president) jinxteħtu fil-kaxxa tal-voti fil-Post tal-Votazzjoni numru 374 qrib il-kapitali Almaj, b'oħrajn jippruvaw jgħattu l-kamera u jfixklu l-ifflmjar. Il-filmat jinsab fis-sit ta' Radio Free Europe/Radio Liberty (RFE/RFL).

Kriżi Politika f'Pajjiżna wkoll (4)

ĦADD SPASSJONATAMENT MA JAQBEL LI SSIR ELEZZJONI BIKRIJA

Matul dawn l-aħħar ġimgħat, fost tant inċertezza fil-kriżi politika li għaddejna minnha, ħaġa ħarġet ċara: il-poplu Malti ma jaqbilx li bħalissa – fil-qagħda internazzjonali mwiergħa li matul din is-sena mistennija teħżien – għandha ssir elezzjoni bikrija.
Mill-mod kif irriżultat il-votazzjoni dwar mozzjoni ta' sfiduċja fil-gvern dalgħodu, jidher li l-maġġoranza tad-deputati parlamentari – inkluż d-deputat tal-gvern li wera nuqqas ta' qbil mal-istess gvern  tiegħu – fehmu dan u fehmu x-xewqa tal-poplu, għax il-mozzjoni m'għadditx, u b'hekk il-gvern ma waqax, u allura m'hemmx għalfejn issir elezzjoni qabel iż-żmien, li jiena dejjem insistejt li mhix fl-interess nazzjonali.
Fid-diskors tiegħu qabel il-vot il-Prim Ministru staqsa hekk:
"Hawn xi ħadd jgħidli, imma xi ħadd oġġettivament, spassjonatament, li m'għandux interessi partiġġjani, li Malta jaqblilha li jkollha elezzjoni bikrija?'
Jidher li dan il-messaġġ wasal u kkonvinċa lill-maġġoranza fil-parlament Malti, u l-ebda wieħed minn
dawk li vvutaw kontra l-mozzjoni ta' sfiduċja mressqa  mill-oppożizzjoni ma ried jieħu r-responsabbiltà li jixħet lill-pajjiż f'ġimgħat ta' inċertezza u instabbilità ta' kampanja elettorali.
Madankollu l-Prim Ministru ammetta li fis-sitwazzjoni interna "ma jfissirx li kollox huwa business as usual. Il-verità hi li biex inkomplu nimxu 'l quddiem, jiena rrid nara li jkolli l-partit tiegħi kollu kemm hu jappoġġja l-politika tal-gvern, u allura nittama li fil-ġranet li ġejjin inkunu nistgħu ukoll nieħdu l-inizjattivi interni fil-partit biex naċċertaw li l-gvern ikollu l-partit kollu warajh f'dan il-mument importanti għall-pajjiżna."
Nittamaw li b'rieda tajba minn kulħadd dan iseħħ ma jdumx ħalli titneħħa dik il-preċessjoini ta' instabbilità li setgħet inħolqot, u li xejn ma hija fl-interess nazzjonali.

Kriżi Politika f'Pajjiżna wkoll (3)

LEJN SOLUZZJONI ...NAĦA JEW OĦRA

Jidher il-ġimgħa li għaddiet kontra dak li kien mistenni ma wasslet imkien, din li ġejja se tkun deċiżiva għall-kriżi politika f'pajjiżna.
Li ġara kien li wara t-Tnejn li għadda ltaqa' l-Kumitat Konġunt Parlamentari ntlaħaq ftehim li d-dibattitu dwar il-Mozzjoni ta' Fiduċja mressqa mill-Oppożizzjoni jibda għada t-Tnejn u jibqà sejjer sa' nhar l-Erbgħa, biex mbagħad il-vot jittieħed nhar il-Ħamis f'Nofsinhar.
Għal darb'oħra, sakemm qed nikteb, id-deputat tal-gvern li kien qed jhedded li ma jivvutax favur il-gvern fil-mozzjoni mressqa mill-Oppożizzjoni, gġad tal-istess idea.
Mill-banda l-oħra, anki l-Prim Ministru dalgħodu ddikjara li lest jasal għal soluzzjoni basta f'din is-soluzzjoni
1) Il-ftehim ikun ċar u jibqà jgħodd sal-aħħar ta' din il-leġislatura, u mhux sal-Ħamis biss;
2) ma jkun hemm ebda kundizzjoni għall-ftehim; u
3) is-soluzzjoni ma tfixkilx lil dan il-gvern milli jħaddem u jwettaq il-programm kollu li l-poplu vvota favurih fl-aħħar elezzjoni.
Wara dan id-diskors, imbagħad, sar magħruf li f'Kastilja saret laqgħqa mitluba mill-Prim Ministru mad-deputat tal-gvern in kwistjoni, u li għaliha kien preżenti wkoll il-Viċi-Prim Ministru. Filwaqt li ma nħareġ xejn uffiċjali, u d-deputat ma riedx jikkummenta, intqal li l-laqgħa kienet waħda qasira u kordjali.
Jiena ngħid biss li kwalunkwe soluzzjoni trid tkun waħda fl-interess nazzjonali, inkella kulħadd ikollu jġorr ir-responsabbiltà tal-aġir tiegħu l-ġimgħa li ġejja.
U ntemm billi nerġà nfakkar li l-poplu dan l-aħħar wera kemm-il darba li ma jridx elezzjoni bikrija għax mhux fl-interess nazzjonali, fl-interess tiegħu, f'dan il-mument ta' taqlib madwarna, barra l-pajjiż.

Kriżi Politika f'Pajjiżna wkoll (2)

IL-MAĠĠORANZA TAL-POPLU MA TRIDX ELEZZJONI BIKRIJA

Għaddiet ġimgħa minn meta kkummentajt dwar il-kriżi politika li faqqgħet f'Malta, u għamiltha ċara li dan kont qed nagħmlu  biss fl-Interess Nazzjonali mhux partiġġjan.
Il-kriżi bdiet meta deputat tal-gvern f'nuqqas ta' qbil mat-tmexxija tal-gvern u tal-partit tiegħu iddikjara li ma kienx se jivvota favur il-gvern f'każ ta' vot li tfisser fiduċja fil-gvern, filwaqt li l-gvern u l-partit qalulu li allura għandu jirriżenja jekk kien se jibqà isostni dan.
Sal-mument li qed nikteb id-deputat in kwistjoni għadu bl-istess intenzjoni, filwaqt li l-partit tiegħu għadu qed jappellalu biex jerġà jaħsibha, fl-interess nazzjonali, mhux tal-partit.  Żvilupp importanti minn ġimgħa ilu huwa li l-Oppożizzjoni ressqet mozzjoni li tgħid li l-Kamra "m'għandiex fiduċja fil-Gvern." Allura din issa trid tiġi dibattuta l-ġimgħa d-dieħla, nhar il-Ħamis, b'riżultat li sakemm qed  nikteb għadu inċert.
Iżda minn jumejn 'l hawn kien hemm żvilupp ieħor importanti:
Minn żewġ sorsi differenti ħareġ li l-maġġoranza assoluta tal-poplu ma tridx li ssir elezzjoni bikrija.
Waqt il-programmn popolari "Xarabank" fuq l-istazzjon nazzjonali t-telespetturi ntalbu jċemplu u jgħidu jekk jaqblux li ssir elezzjoni qabel iż-żmien. 76.5% qalu "Le", ma jaqblux. Kienu biss 23.5% li riedu li ssir elezzjoni bikrija. Imma dan ma kienx biżżejjed.
Illum is-Sunday Times of Malta ppubblikat sondaġġ, opinion poll ieħor li minnu wkoll reġà ħareġ ċar li l-poplu ma jħossx li hu għaqli u fl-Interess Nazzjonali li ssir elezzjoni issa. 56.3% ma jridux li ssir issa, jew ma jafux.
Ir-raġunijiet li dan m'għandux isir hija wkoll għax numru kbir minn dawk mistoqsija, 43.5% qalu li għadhom ma jafux lil min se jivvutaw, ma riedux iwieġbu jew s'issa m'għandhomx ħsieb jivvutaw.
Fl-Interess Nazzjonali, quddiem dak li għaddej barra minn  pajjiżna,  kulħadd, Gvern, Oppożizzjoni, Deputati kollha fil-Parlament Malti għandhom jixtarru sewwa dan il-messaġġ, din l-indikazzjoni tax-xewqa tal-poplu sovran.
Quddiem l-agħar klima ekonomika li qatt iffaċċjat l-Ewropa f'dan l-aħħar seklu, jkun irresponsabbli u żgur  mhux fl-Interess Nazzjonali li xi ħadd jisforza elezzjoni bikrija. Elezzjoni dejjem tmajna l-attività ekonomika, aħaseb u ara elezzjoni bikrija, mhux mistennija. Hija żgur l-inqas ħaġa li għandu bżonn bħalissa l-pajjiż.

Fid-dawl ta' dak li għaddew pajjiżi oħra li sfaw umiljati, umilment għandi żewġ suġġerimenti fl-Interess Nazzjonali:
1. Li d-deputat in kwistjoni jieqaf mill-atteġġjamenti tiegħu, issa li aktar milli spjega l-pożizzjoni tiegħu, u jkompli jinsisti u jirsisti għal dak li jemmen fih fi ħdan il-partit tiegħu u fil-parlament, bħalma kien hemm  min fil-fatt għamel. Iżda jekk le
2. L-Oppożizzjoni tirtira l-Mozzjoni ta' Sfiduċja, u fl-Interess Nazzjonali jintlaħaq ftehim bejn iż-żewġ naħat tal-Kamra għal programm leġislattiv limitat sa' tmiem din il-leġislatura, u forsi wkoll dwar tibdil Kostituzzjonali li jiggarantixxi li jekk partit jikseb il-maġġoranza tal-voti u jispiċċa b'maġġoranza ta' siġġu wieħed f'parlament b'żewġ partiti biss, dawn jiżdiedulu għal tlieta biex tiġi żgurata l-istabbilità u fl-Interess Nazzjonali, issa li ż-żewġ partiti, u l-pajjiż, għaddew mill-istess esperjenza.
Dawn huma l-ħsibijiet tiegħi bħalissa.

Fl-Interess Nazzjonali. L-uniku interess tiegħi, u ta' kull PATRIJOTT MALTI 

Kriżi Politika f'Pajjiżna wkoll

MALTA L-EWWEL U QABEL KOLLOX

Dawk kollha li ilhom isegwu dan il-blog tiegħi għal dawn l-aħħar sentejn u tlett xhur jafu li qatt ma ttrattajt l-politika lokali partiġġjana, skond il-wegħda li kont għamilt meta bdejtu, u li ġbartha f'sentenza li tidher regolarment fl-aħħar tal-blog, isfel.
Iżda l-iżviluppi politiċi ta' dawn l-aħħar tlett ijiem fissru li Malta tinsab fi kriżi politika. Għalhekk ma stajtx ma nikkummentax dwarha  bħalma, wara kollox, nagħmel f'każi simili f'pajjiżi barranin. Dan, però, mhux se nagħmlu b'mod partiġġjan, għalkemm politikament kulħadd jaf fejn ninsab, u ideoloġikament iddikjarajtu ċar fil-profil tiegħi f'dan il-blog: fuq il-Lemin.

Għalhekk se nittratta din il-kriżi mil-lat tal-Interess Nazzjonali, nazzjonali mhux Nazzjonalista partiġġjan.
Ma stajtx l-ewwelnett ma ninnutax ix-xebħ bejn dak li ġara f'Malta u dak li seħħ fl-Italja.
Fiż-żewġ każi gvern ĊentruLemini spiċċa bil-maġġoranza mhedda minn deputat/i fil-gvern, u dan meta ż-żewġ gvernijet kienu qed jagħmlu ħilithom kollha biex jaffrontaw il-problemi finanzjarji/ekonomiċi li sabu rwieħhom fihom minħabba l-kriżi finanzjarja/ekonomika  li faqqgħet fid-dinja.
Għalkemm kien għadu ma sofrix vot ta' sfiduċja l-gvern Taljan, bl-oppożizzjoni lesta biex tivvota kontrih, għażel li, fl-Interess Nazzjonali jwarrab u filwaqt li l-pajjiż spiċċa bi gvern tekniku, mhux mtella' mill-poplu, għamilha ċara li kien jistenna li l-poplu ma jdumx ma jingħata d-dritt jerġà jagħżel il-gvern li jrid hu.
F'Malta nittamaw li ma nispiċċawx hekk, u probabbli ma nispiċċawx hekk, minħabba li pajjiżna, b'xorti tajba,  żgħir wisq biex l-ispekulaturi internazzjonali 'jinteressaw' ruħhom fina!
Iżda bħal f'Malta, il-kriżi fl-Italja bdiet minħabba l-ambizzjoni personali ta' deputat fil-gvern, Gianfranco Fini, li warrab għal kollox l-Interess Nazzjonali, meta mill-karriera politika tiegħu ħadd ma stenna l-pass ta' tradiment li ħa, mhux biss fil-konfront tal-gvern biss, iżda lejn dawk kollha li vvutaw lilu u lill-sħabu li ngħaqdu miegħu.
Imma niġu lura Malta.
Sakemm qed  nikteb kemm il-Prim Ministru kif ukoll id-deputat in kwistjoni għadhom qed iżommu l-pożizzjoni rispettiva tagħhom: dan tal-aħħar qed jhedded li se jivvota kontra l-gvern jekk ikun hemm vot ta' fiduċja, kemm-il darba il-PM u Kap tal-PN ma jirriżenjax, filwaqt li l-Prim Ministru f'intervista li ta llum lis-Sunday Times, qal dawn il-preċiżi kelmiet:
"If it were the only way (resign) to see the country moving forward; if it were the only way to see Malta avoiding the humiliation that I’ve seen taking place in other countries; if it is the only way where Malta can avoid having to go through what other countries have gone through, then I will do it. At the end of the day I am in politics to serve the country – not to control the country."
Dikjarazzjoni mill-aktar responsabbli ta' statista, filwaqt li kompla li fl-istess ħin jistenna li d-deputat in kwistjoni ma fadallux triq oħra għajr li jirriżenja, mhux l-aktar għax ittradixxa lilu u lill-partit li telgħa fil-miegħu fil-parlament, iżda fuq kollox il-fiduċja ta' dawk li vvutawlu.
Jekk dan ma jsirx, l-alternattiva fl-Interess Nazzjonali li qed nara hija din:
Meta tqies li la d-deputat u lanqas l-Oppożizzjoni ma qalu li se jressqu huma vot ta' sfiduċja, f'ġieħ l-istabbilità, fis-sitwazzjoni mwiergħa internazzjonali, bl-2012 mistennija tkun agħar mis-sentejn li għaddew, il-gvern għandu jibqà jmexxi l-pajjiż, anki jekk jivvota kontrih dak id-deputat – dan mill-inqas sa' budget ieħor lejn tmiem din is-sena, minħabba li gvern jistà jaqa' biss f'vot dirett ta' sfiduċja jew vot finanzjarju. bħal appuntu l-budget.
Hawnhekk tkun l-Oppożizzjoni li trid turi lill-poplu li hija responsabbli aktar minn dak id-deputat, u ma tippruvax tixħet lill-pajjiż fl-instabbilità li ġġib magħha kampanja elettorali u pajjiż bla gvern elett demokratikament, minħabba, wara kollox, il-kapriċċ/pika personali ta' bniedem wieħed.
Irrid nemmen li l-Oppożizzjoni Maltija hija aktar konxja tal-veru Interess Nazzjonali minn dik Taljana, li l-ewwel għamlet minn kollox biex tfixkel il-gvern li kien hemm, u wara li dan warrab, bdiet tappoġġja ieħor tekniku (li ma vvutax għalih il-poplu) u vvutat favur miżuri ta' awsterità tant meħtieġa biex jiġu salvati l-finanzi u l-ekonomija tal-pajjiż  – miżuri li għax kien se jressaqhom il-gvern ta' qabel elett demokratikament, kienu lesti jivvutaw kontrihom, basta jwaqqgħu il-gvern qabel iż-żmien!
Fil-jiem, ġimgħat u xhur li ġejjin il-poplu se jkun jaf min għalih verament Malta tiġi l-Ewwel u Qabel Kollox, u mhux l-ispekulaturi li qed jagħmlu xalata sħiħa mis-sovranità nazzjonali ta' pajjiżi oħra.
Din ma tkunx l-ewwel darba li l-klassi politika ngħaqdet fl-Interess Nazzjonali: kważi 55 sena ilu hekk sar bil-Break With Britain Resolution.

Dan hu l-uniku interess tiegħi f'din il-kriżi: l-Interess Nazzjonali. Tiegħi u ta' kull PATRIJOTT MALTI.