Il-Feriment tat-Tfajla Maltija f'Gaża

JUŻAW NIES INNOĊENTI U ĠENWINI

Wara li l-Ħadd li għadda sfat feruta f'kuxtejha waqt dimostrazzjoni favur bdiewa Palestinjani f'dik li tissejjah buffer zone f'Gaża, l-Maltija Bianca Zammit f'intervista sostniet li huma ma kienu qed jagħmlu xejn illegali. U hawn fejn żbaljat bl-ikrah. Buffer zone hija medda art, żona militari li waqt gwerra tintuża bħala art newtrali bejn iż-żewġ naħat biex jitnaqqas il-periklu ta' ġlied.

Jidher għalhekk li Zammit u sħabha ma kienux jafu b'dan, u li ntlaqtu mill-isparar tas-suldati Iżraeljani, huma vittmi ta' min lest juża u jipperikola ħajjet nies innoċenti u ġenwini billi ma nfurmawhomx li fejn bagħtuhom jipprotestawh hija żona militari.

Dan sar magħriuf illum minn dikjarazzjoni tal-Ambaxxatur Iżraeljan għal Malta Gideon Meir (ritratt) waqt li kien qed jitkellem dwar l-inċident tat-tfajla Maltija meta wera t-tama li dan m'għandux itappan ir-relazzjonijiet bilaterali bejn Malta u Iżrael. Meir għadu kemm kellu taħditiet mal-Viċi Prim Ministru u Ministru għall-Affarijiet Barranin Tonio Borg dwar dan l-inċident u jinsab fiduċjuż li dan l-inċident ma joħloqx ostakli lir-relazzjoni bilaterali li dejjem kienet waħda pożittiva ħafna.

Meir jiddispjaċiħ iżda li Bianca Zammit indarbet minn azzjoni Iżraeljana kontra dawk id-dimostranti li kienu maħsuba bħala ‘paċifiċi' u għandu l-ikbar simpatija lejn Bianca Zammit u l-familja tagħha, filwaqt li tenna li dawk id-dimostranti partikulari f'Gaża kienu wżati innoċentement minn militanti Palestinjani. L-Ambaxxatur Iżraeljan stqarr li  Zammit kienet tinsab f'Gaża għax riedet tgħin lill-poplu Palestinjan, iżda ma jistax jifhem kif ċerti Palestinjani jużaw lil nies innoċenti għal skopijiet politiċi.
Gideon għandu esperjenza tal-International Solidarity Movement (ISM) għax għal sitt snin sħaħ kien responsabbli għad-diplomazija pubblika tal-gvern Iżraeljan. Membri tal-ISM qed jersqu qrib il-fence tas-sigurta' meta kemm l-Iżraeljani kif ukoll il-Palestinjani jafu li m'għandhomx jidħlu f'dik il-buffer zone.
Kemm il-Ħamas kif ukoll il-Ġiħad Islamika qed jużaw lil dawn id-dimostranti biex iqiegħdu bombi u jdarbu suldati Iżraeljani. L-ISM mhux qed jgħid lill-membri tiegħu li ż-żona fejn qed jipprotesta hi żona militari u għalhekk seħħ l-inċident sfortunat fejn indarbet it-tfajla Maltija.
Hu ma jafx kif Bianca Zammit spiċċat fejn din il-buffer zone. Probabilment il-Maltija tqabbdet tmur hemm mill-ISM jew minn membri tal-Ħamas. Gideon Meir saħaq li l-Palestinjani m'għandhomx jużaw nies innoċenti u żied li l-ISM ma jimpurtaħx mis-sigurtà u l-ħajja tad-dimostranti. 
Jekk Bianca Zammit u nies ġenwini oħra verament jridu jgħinu lill-Palestinjani jmorru bil-qalb kollha f'Gaża u jgħinu lil Palestinjani rikoverati fl-isptar jew jgħallmu lit-tfal.

Is-suppost inkjesti dwar Climategate

JIPPRUVAW JGĦATTU X-XEMX BL-GĦARBIEL

Ikkuntattjawni xi qarrejja tal-blog u staqsewni il-għala ili xi ftit ma nikteb dwar l-iskandlu Climategate. Fil-fatt iċċekkjajt u sibt li veru issa ili xi ftit aktar minn xahar, iżda dan l-aktar minħabba l-ewwelnett li dan l-aħħar kont daqsxejn imħabbat, u fl-istess ħin ridt nistenna biex se joħorġu żewġ inkjesti li kienu qed isiru fl-Ingilterra u min-Nazzjonijiet Uniti dwar dan l-iskandlu li ħareġ mill-Climate Research Unit (CRU) fl-East Anglia University.
Għal min forsi ma semgħax dwar dan Climategate (li ma neħodhix bi kbira, għax il-media ewlenija internazzjonali u dik f'Malta bilkemm semmewh - f"Malta kien proprju dan il-blog li ħareġ l-ewwel darba bih f'Novembru tas-sena l-oħra), fil-qosor ħafna dan jikkonċerna l-pubblikazzjoni ta' numru kbir ta' e-mails li nħarġu b'mod klandestin mill-CRU, u li kixfu tbagħbis u qerq fir-riżultati tar-riċerka, biex suppost tiġi konfermata t-teorija li l-bniedem, minħabba l-gassijiet CO2 li jipproduċi, l-pjaneta tagħna qed tisħon iżjed minn normal, b'konsegwenzi katastrofiċi.
Dan ikkawża terremot (kien hawn min anki sejjaħlu tsunami) fil-qasam tat-tibdil fil-klima, u żgur kellu effett fuq il-falliment tal-Konferenza ta'  Kopenħagen f'Diċembru organizzata min-N.U. Dan għax min kien lest bis-serjetà jonfoq biljuni ta' flus-il poplu biex jattwa miżuri ħalli suppost nevitaw diżastri katastrofiċi mbassra fuq studji u riċerka li aktar ma beda jgħaddi ż-żmien, aktar beda jinkixef qerq kbir fit-tħaddim  u r-riżultati ta' dawk ir-riċerki?
Quddiem l-iskandli b'dak kollu li beda jiġi żvelat, l-establishments politiċi u akkademiċi taw bidu għal sensiela ta' inkjesti u stqarrijiet bl-iskop ewlieni li juru li l-metodi tal-CRU użati mill-Intergovernmental Panel on Climate Change (IPCC) tan-NU biex wasslu tbassir/twerwir b'katastrofi-klimatiċi ħtija tal-bniedem, kienu ta min jogħqod fuqhom.
Iżda kif ħareġ miż-żewġ inkjesti, l-isforzi li saru biex jiddefendu r-riċerki tant huma difettużi li se jkollhom l-effett kuntrarju għal dak li xtaqu min għamilhom, u aktar inisslu dubji dwar il-metodi suppost xjentifiċi wżati.
L-ewwel rapport ikkonċentra direttament fuq l-IPCC innifisha. Meta diversi mill-aktar tbassir allarmist fl-aktar rapport riċenti tal-2007 inkixef li kien qarrieqi u mingħajr ebda bażi xjentifika, it-tweġiba uffiċjali mill-istess president tal-IPCC Pachauri kienet li kollox fir-rapport kien konfermat minn esperti indipendenti, "peer-reviewed".
Iżda tim ta' 40 riċerkatur minn 12-il pajjiż immexxija mill-analista Kanadiża Donna Laframboise (ritratt), iċċekkjaw kull waħda mit-18,531sorsi xjentifiċi fir-rapport voluminuż tal-2007. B 'għaġeb kbir sabu li kważi terz minnhom, 5,587, ma kienux ġew iċċekkjati minn esperti, iżda ttieħdu minn artikli f'gazzetti, teżijiet minn studenti, saħansitra  fuljetti ta' propaganda minn attivisti ħodor u lobby groups.
Iżda forsi aktar ta' ħsara għall-"kawża" tal-ekokatastrofisti kien ir-rapport fl-Ingilterra minn kumitat ta' inkjesta dwar il-CRU, immexxi minn Lord Ron Oxburgh, maħtur mill-House of Lords.
"Xhieda" ewlenija tal-CRU li d-dinja qatt ma kienet daqshekk sħuna kienu ċrieki fis-siġar antiki, filwaqt li twarrbet dik li kienet turi  li fil-Medju Evu kien hemm perjodu aktar sħun (Medieaval Warm Period).
Meta l-graff li nħareġ minn dawk iċ-ċrieki magħruf bħala l-hockey stick ta' Mann ġie skreditat mill-esperti Kanadiżi McIntyre u McKitrick, l-IPCC rrikorrit għal set ieħor ta' hockey sticks provduti mill-istess CRU.
Iżda dawn  iċ-ċrieki minn siġar fis-Siberja Russa wrew li t-temperaturi lejn tmiem is-seklu li għadda kienu bdew neżlin minflok telgħin. Minn e-mail minn Climategate ferm ikkwotat, id-direttur tal-CRU Phil Jones jgħid li hawn għalhekk użaw trick biex jaħbu dan il-fatt, u minflok inkludew data oħra li turi ż-żjieda drammatika li riedu fit-temperaturi.
Taħsbu, iżda, li l-kumitat ta' inkjesta ta' Oxburgh investiga dan l-email importanti tal-hekk imsejjah Hockey Team magħmul minn Jones, Mann u l-Malti Keith Briffa, u li dak li allegaw intuża bħala provi biex jikkonvinċu lill-politiċi li d-dinja qed tisħon daqs qatt qabel? Lanqas xejn.
Sempliċiment ilmentaw minn nuqqas ta' organizzazzjoni fl-arkivjar tad-data. Lanqas  biss investigaw il-mod dubjuż kif inġabret din id-data bħalma wrew McIntyre u McKitrick, u kif xlew xjenzjati Russi ewlenin li l-CRU għażlu s-siġar u d-data li qablilhom, filwaqt li warrbu dik mill-kampanja fejn it-temperaturi rriżultaw baxxi, żammew dik qrib l-ibliet fejn allura t-temperaturi jkunu għolja. Din hi s-"serjetà" li biha tmexxew dawn l-inkjesti.
Imma wara kollox ma kontx tistenna aħjar minn dawk f'dawn il-kumitati.
Lord Oxburgh (ritratt) innifsu għandu rbit ma' diversi interessi kummerċjali li jagħmlu l-flus mit-tibdil fil-klima, minn wind farms sal-carbon trading.
Imbagħad insibu li l-ebda membru tal-kumitat, jew panel tiegħu ma kien "xettiku" dwar l-idea li l-bniedem jaħti għat-tibdil fil-klima, anzi wieħed minnhom, Kerry Emanuel, jiddikjara fil-beraħ li hu jemmen li t-tisħin tad-dinja jikkawżah il-bniedem (man-made global warming).
Bħalma lanqas kienet sorpriża kemm din l-inkjesta rriżultat superfiċjali, ibbażata fuq żewġ żjajjar qosra fil-CRU, u l-qari ta' 11-il paper xjentifiċi li ħarġet din il-unit ta' riċerka f'dawn l-aħħar 24 sena, u li ntgħażlu b'konsultazzjoni mar-Rotal Society , li hija nnifisha fanatika fil-promozzjoni tat-tisħin tad-dinja ħtija tal-bniedem!
Din hija l-indipendenza, l-imparzjalità tal-mod kif tmexxew dawn l-inkjesti! L-istess bħal-CRU u l-IPCC linteress tagħhom kien li jippruvaw, jikkonfermaw din il-ħtija tal-bniedem u mhux li jinvestigaw kemm il-metodi wżati minnhom kienu verament xjentifiċi.
Dan kollu kompla kabbar id-dubji u s-suspetti mnissla minn Climategate, u mhux naqqashom. Kulma għamlu kien li ppruvaw jgħattu x-xemx bl-għarbiel, kif ngħidu bil-Malti. Għalhekk se nkompli nsegwih, fin-nuqqas kważi totali tal-media lokali.

Is-Suċċess tal-Esperiment taċ-ĊERN

GĦAD HAWN MIN JIPPROVA JBEZZA' BIL-BABAW

Ix-xahar li għadda fl-Isvizzera sar esperiment tant importanti, iżda li ftit li xejn smajna dwaru, partikularment f'pajjiżna. Dan kien dak li sar fiċ-Ċentru Ewropew għar-Riċerka Nukleari (ĊERN)  fejn reġà tħaddem, din id-darba b'suċċess, il-Large Hadron Collider (LHC), li pproduċa l-ewwel u l-aktar kolliżżjoni qawwija bejn partiċelli tal-enerġija li għandha twassal għal aktar fil-futur, sabiex il-bniedem fl-aħħar jibda jifhem minn xix huwa magħmul l-univers u kif dan kellu l-bidu tiegħu.
Dan għax dawk il-kolliżżjonijiet joħolqu blalen żgħar tan-nar li jimitaw il-kundizzjonijiet  prevalenti fl-univers fl-ewwel frazzjonijiet ta' sekondi wara l-hekk imsejħa Big Bang, jew ix-xenarju kożmoloġiku li welled l-univers, madwar 13.7 Biljun sena ilu.
L-istrument ġgantesk, l-LHC,  f'ĊERN huwa programmat biex jipproduċi żewġ raġġi ta' protoni li jivvjaġġaw lejn xulxin b'ħeffa enormi, ftit inqas milli jivvjaġġa d-dawl, f'mina ċirkulari twila 27 kilometru, 100 metru taħt l-art tal-fruntera bejn Franza u l-Isvizzera. Dawn ir-raġġi jiltaqgħu u jaħbtu ma' xulxin f'erba' punti ġewwa detectors ġganteski.
L-LHC jistà iħabbat ir-raġġi b'enerġija totali ta' 14-il Triljun volt elettron (TVE), iżda bħala prekawzjoni l-LHC ħadem biss b'nofs din l-enerġija, 7 TVE, u hekk se jibqà jitħaddem sa' tmiem l-2011, meta mbagħad jingħalaq għal sena għal manutenzjoni u aktar miżuri ta' sigurtà għall-collider, qabel ma fl-2013 jitħaddem b'enerġija kollha li kapaċi jipproduċi, bit-tama li l-bniedem ikompli jiftah moħħu.
Forsi bħalissa min qed jaqra qed jistaqsi kif din l-aħbar, dawn il-kummenti sabu ruħhom f'dan il-blog li ġeneralment jittratta dwar politika internazzjonali  minn lenti leminija.
Iżda bħalma tinnutaw, apparti li dedikat lill-kbir patrijott  Malti Enrico  Mizzi, dan il-blog huwa wkoll f'ġieh  Galileo Galilei, meqjus bħala missier ix-xjenza moderna, b'mod partikolari l-astronomija. Fi żmienu, 'l fuq minn 300 sena ilu, Galileo kien spiċċa mixli anki b'ereżiji u ta' 70 sena, arrestat f'daru, għax sostna, u snin wara nagħta raġun, li kienet id-dinja li ddur max-xemx u mhux il-kontra.
Iżda minkejja li għaddew daqstant snin titqarrqux u taħsbu li l-bniedem tant għamel progress, tant fetaħ moħħu, li min jissogra jirraġuna b'moħħu, jiġifieri free thinker, m'għandu l-ebda biżà, għax il-biżá mill-ġdid, minn dak mhux magħruf, għadha fostna, u l-esperimenti taċ-ĊERN huma xhieda ta' dan.
Sa' qabel bdew l-ewwel esperimenti beda jissemma periklu wara ieħor. Sa kien hemm min bassar li dawn l-esperimenti setgħu iwasslu għat-tmiem tad-dinja f'xi splużżjoni spettakolari, appuntu xi Big Bang.
Dan minkejja l-assigurazzjonijiet mix-xjenzjati li ċ-ċanijiet li dan jiġri huma mhux biss minimi, iżda 'l bogħod minn kull dubju raġjonevoli, bħalma ġie konfermat fiċ-ĊERN, fejn l-unika splużjoni dubjuża li seħħet kienet dik tal-applawsi tax-xjenzjati (ritratt fuq) hekk kif l-esperiment irnexxa.
Iżda, l-istess bħal fi żmien Galileo, anki llum hawn min jipprova jbeżża' bil-babaw"u jħallat ix-xjenza mar-reliġjon bi kliem bħal "aħjar il-bniedem ma jilgħabx man-natura" jekk  mhux ukoll jakkużaw lix-xjenzjati li jridu jilgħabuha ta' xi alla.
Għalija din hija biss frott injoranza jew biżà, jew it-tnejn flimkien. Ir-relazzjoni tal-bniedem max-xjenza tul is-sekli kienet minn dejjem waħda kurjuża. Ma nafx fejn qrajtu jew min kien qalu, izda dan il-kliem dwear din ir-relazzjoni baqa' stampat f'moħħi u se nħalliħ bl-Ingliż kif niftakar li kien:
"Make no mistake, it is truly a love affair of Shakespearian proportions. Fire dragged us down the trees but it then shown a light into the unknown, and fear was born."
Xejn, għalhekk, ma neħodom b'sorpiża ċerti reazzjonijiet dwar l-esperimenti taċ-ĊERN u LHC. Illum, fl-era tal-iPhone għadek issib min  jibżà li ritratt jista' jisraqlek ruħek!
Ma ninsewx lanqas li l-istess Nasa dan l-aħħar kellha tassigura lil parti kbira tal-popolazzjoni Amerikana biex ma jagħtux każ tal-kampanja pubbliċitarja tal-film 2012, li dik hi sena bħal snin oħra, għax matulha d-dinja ma kenitx se tispiċċa.
Filwaqt li huwa importanti li nagħrfu l-"bizà', ċjoè il-prudenza, bħala parti importanti tal-progress xjentifiku, jekk din ma nikkontrollawhix tista' tkun perikoluża.
Iżda lanqas ma naqbel ma' min isostni li x-xjenza m'għandhix ir-risposti għal kollox  u jbeżżgħu li fil-ħerqa biex issibhom ix-xjenza nnifisha tista' tispiċċa hi stess perikoluża.
Hija l-inġenwinità tagħna filli nsibu t-tweġibiet għall-mistoqsijiet li  jħawduna li tiddistingwina mill-annimali. Li nċedu quddiem il-bizà u nfixklu u nwaqqfu l-progress tax-xjenza, ifisser li nieħduha kontra proprja l-ħaġa li mill-bidu għamlitna bnedmin.
Għalhekk għandna nsegwu b'ħerqa avvenimenti bħal dawk fiċ-ĊERN fejn għandna l-unur li hemm Malti bħalna jaħdem ma' xjenzjati oħra, Nicholas Sammut (ritratt), li għad għandu biss 29 sena.

Tikber il-Mewġa Kontra x-Xellug fl-Ewropa

REBĦA ASSOLUTA GĦAĊ-ĊENTRU-LEMIN FL-UNGERIJA

Bħalma kien inbassar minn kulħadd l-elettorat Ungeriż ivvota bi ħġaru għall-bidla kontra x-Xellug billi ta rebħa assoluta liċ-Ċentru-Lemin wara tmien snin ta' amministrazzjonijiet Soċjalisti tal-MSZP. Din hija disfatta oħra għax-xellugin fl-Ewropa, wara li ftit jiem ilu anki l-poplu Taljan injora għal kollox it-tixwix u l-qlajjiet kontra l-Prim Ministru u Mexxej taċ-Ċentru-Lemin Silvio Berlusconi. Infatti l-elezzjonijiet reġjonali irriżultaw filli ċ-Centru-Lemin issa qed jiggverna fi 11 mill-20 reġjun, jiġifieri 'l fuq  minn 42 miljun ruħ kontra t-18-il miljun biss amministrati miċ-Ċentru-Xellug, jiġifieri 70% kontra 30%.
Fl-istess sitwazzjoni issa jinsabu l-Ungeriżi bil-partit ċentru-lemini  FIDESZ (Unjoni Ċivika Ungeriża) immexxi minn Viktor Orban (ritratt) jikseb maġġoranza kbira komda ta' 52.73% tal-voti mixħuta. B'hekk ll-FIDESZ, s'issa, għandu 206 minn 386 siġġu fil-parlament Ungeriz, b'ċans sabih li dawn iżidhom għall-maġġoranza ta' żewġ terzi, fit-tieni rawnd tal-Ħadd 25 tax-xahar għax kull ma jeħtieġ huma 52 siġġu mill-121 li għad iridu jimtlew, minħabba li f'dawk id-distretti l-ebda kandidat ma kien qabeż l-50% meħtieġa.
Il-Partit Soċjalista sofra telfa-tkaxkira mill-aktar umiljanti meta mit-43.2% li kellu niżel għal biss 19.3% (li jissarfu fi 28 siġġu biss mill-141 li kellu!). Barra minhekk s-Soċjalisti ssugraw li jintlaħqu saħansitra mill-lemin estrem ta' Jobbik li kiseb 16.67% u 26 siġġu, 2 biss inqas mill-MSZP!
Jekk ġimgħa oħra l-FIDESZ fil-fatt jikseb maġġoranza assoluta ta' żewġ terzi tas-siġġijiet fil-parlament, din tkun l-ewwel darba fl-Ewropa.
L-Ungerija kienet fost l-aktar pajjiżi Ewropej li ntlaqtu mir-riċessjoni li għad trid toħroġ minnha, u s-sena l-oħra għaddiet mill-ikbar kriżi ekonomika gravi f'dawn l-aħħar għaxar snin. Dan gerrex lill-investituri mill-Ungerija,  minħabba wkoll id-dejn kbir barrani u l-politika fiskali laxka, li s-Soċjalisti ppruvaw isolvu b'miżuri ħorox ta' awsterità li wasslu għal żjieda ta' dawk qiegħda u tnaqqis fil-konsum.
Iżda qabel ir-riċessjoni l-Ungerija kienet diġà bdiet sejra lura minn żmien l-ewwel gvern Soċjalista li kien telgħa fl-2002. Infatti l-MSZP immexxi minn Gyurcsany ma damx ma kellu jiffaċċja protesi kbar fit-toroq meta nkixef li hu kien gideb dwar il-qagħda mwiergħa tal-ekonomija tal-pajjiż biex l-MSZP rebaħ it-tieni elezzjoni.
Orban qal li hu konxju li mhux dieħel għal biċċa xogħol faċli. L-ikbar sfida tal-gvern ġdid tiegħu se tkun  li joħroġ lill-pajjiż mir-riċessjoni, li wasslet lill-ekonomija tal-pajjiż tonqos b'6.3% fl-2009 u l-qagħd jitla' għal rekord storiku ta' 11.4% x-xahar li għadda. Il-FIDESZ beħsiebu jinnegozja mill-ġdid is-self mill-Fond Monetarju Internazzjonali, u indika li sabiex ikabbar l-ekonomija Ungeriża beħsiebu jnaqqas it-taxxi, joħloq miljun post tax-xogħol tul l-għaxar snin li ġejjin, u qed jantiċipa li d-defiċit jilħaq 6.5% tal-Prodott Gross Domestiku.
Il-maġġoranza kbira li kiseb il-FIDESZ għalhekk hija żgur l-isbaħ riżultat għas-swieq finananzjarji u l-ekonomija tal-pajjiż, għax jista' jiggverna waħdu u jwettaq ir-riformi tant meħtieġa urġentement.

Minbarra dawk biex ifejjaq l-ekonomija Orban għandu f'moħħu riformi oħra li jrid iwettaq fosthom dwar il-gvernijiet lokali u s-settur tas-servizzi soċjali.
Il-FIDESZ huwa membru sħiħ fil-Partit Popolari Ewropew (PPE), l-istess bħall-Partit Kristjan Demokratiku Popolari (KDNP - ukoll fil-PPE) li kkontesta din l-elezzjoni flimkien mal-FIDESZ.

Fir-ritratt fuq graff li juri l-persentaġġi li kiseb kull partit, filwaqt dak fil-lemin kif dawn il-voti ssarrfu f'siġġijiet fil-parlament. Għad fadal 121 (bojod) li jsir magħruf għand min marru fit-tieni rawnd nhar il-Ħadd 25 ta' April, iżda li diġà imbassar li l-biċċa l-    kbira se jeħodhom ukoll il-FIDESZ.

Il-Kriżi Politika fit-Tajlandja

IRIDU LURA LIL BERLUSCONI TAL-ASJA

It-Tajlandja huwa pajjiż Asjatiku kemmxejn il-bogħod minnha, iżda ftit kienu dawk s'issa li rrealizzaw u semmewh ix-xebħ bejn dak li qed jiġri f'dak il-pajjiż u f'pajjiż tant viċin tagħna, l-Italja. Il-kriżi politika li dan l-aħħar jiem kompliet ħraxet fit-Tajlandja għandha l-għeruq tagħha tlett snin u nofs ilu meta, f'Settembru tal-2006, il-militar wettaq kolp ta' stat u neħħa l-gvern, elett demokratikament, tal-Prim Ministru Thaksin Shinawatra, waqt li dan kien qed jindirizza l-Assemblea tan-Nazzjonijiet Uniti fi New York.

Thaksin kien l-ewwel prim ministru fl-istorja demokratika tat-Tajlandja li (l-istess bħal Silvio Berlusconi fl-Italja - fir-ritratt jidher miegħu waqt żjara li kien għamel fl-Italja meta kien għadu prim ministru) permezz tal-partit tiegħu, dak iż-żmien it-T.R.T. (jew "Tajlandiż Iħobb Tajlandiż"), iggverna għal-leġislatura sħiħa, bejn l-2001-2005. Qablu l-pajjiż għadda mill-agħar żminijiet ta' reġim militari wara ieħor, u instabbilità.  Biżżejjed ngħid li bejn l-1932 u l-1991fit-Taljandja kienu saru mhux inqas minn 17-il kolp ta' stat, u wara, bejn l-1992 u l-1997 kien hemm erba' prim ministri differenti! 
Taħt l-amministrazzjoni tiegħu l-pajjiż gawda minn stabbilità politika li wasslet mhux biss biex l-ekonomija irkuprat mill-kriżi finanzjarja Asjatika ta’ l-1997, iżda saret fost l-aktar b’saħħithom fl-Asja, u fl-2005 rat  tkabbir ta’ aktar minn 6 fil-mija.

Dan il-ġid Thaksin użah għall-kawżi soċjali bħal self b’imgħaxijiet ferm baxxi lill-bdiewa fis-70,000 raħal tal-pajjiż, u biex kien għamel l-isptarijiet kważi b’xejn għal kulħadd. Hu dejjem żamm kelmtu, u wiegħed li kien se jkompli fl-istess triq, billi jżied il-paga minima nazzjonali, dik tal-ħaddiema tal-gvern, u jkompli jissussidja lill-bdiewa u jipprovdi xogħol part-time lill-istudenti.

Żewġ oqsma oħra li fihom Thaksin ħareġ ta’ raġel kienet fil-ġlieda kontra t-traffikar tad-droga u l-korruzzjoni,  minkejja dak li kienet qed tgħid l-oppożizzjoni.

Minn dan kollu kien jimpurtah il-poplu u mhux x’qalu dawk li jriduha ta’ xi elite f’Bangkok, iżda fil-fatt huma biss motivati minn animożità u pika.
Dawn, l-istess bħall-oppożizzjoni xellugija fl-Italja, kienu dejjem itambru l-akkużi ta' konflitt ta' interessi ta' Thaksin (għax dan, l-istess bħal Berlusconi bil-Mediaset, kien waqqaf kumpanija kbira tal-komunikazzjoni ukoll, bl-isem ta' ShinCorp, li hu, però, wkoll kien ċeda kull sehem u influwenza fiha lil uliedu u/jew partners tiegħu), u ta' korruzzjoni..
Meta lanqas dan ma kien biżżejjed għall-oppożizzjoni, anzi komplew dejjem aktar jaqilgħu l-ħmieġ, fuqu u fuq il-familja tiegħu, Thaksin beda jiddejjaq u fl-2006 kien sejjaħ elezzjoni qabel iż-żmien fejn it-TRT kiseb maġġoranza assoluta ta' 57%, f'dan li l-oppożizzjoni dawritu f'referendum favur jew kontra Thaksin u kienu ħarġu telliefa. L-istess,ukoll, bħalma reġà ġralha fl-Italja dan l-aħħar.
Il-bażi elettorali ta' Thaksin hija l-klassi medja, iżda l-aktar il-fqar u l-kampanjoli, fil-kampanja, fejn jgħixu 70 fil-mija tat-Tajlandiżi, u fejn il-qlajjiet u xi protesti li saru f’Bangkok qajla impressjonawhom, u r-riżultat ta' dik l-elezzjoni kien ikkonferma dan.

Iżda l-oppożiżżjoni mmexxija mill-hekk imsejħa 'Alleanza Popolari għad-Demokrazija' (PAD) lebsin qomos u tops sofor komplew bil-protesti li wasslu għall-kolp ta' stat militari tal-2006, immexxi mill-kmandant Sondhi, Musulman (f'pajjiż 95% Buddista), iżda li għandu infuwenza qawwija fuq ir-Re anzjan Bhumipol.

Wara perjodu inkonklussiv ta' ħakma militari li matulu sar minn kollox biex tiddgħajjef l-popolarità ta' Thaksin (li sadattant ma tħallix jirritorna lura f'pajjiżu), it-TRT ġie dikjarat illegali, u kostituzzjoni ġdida approvata bil-ħniena f'referendum li fih ivvutaw biss ftit aktar minn nofs l-elettorat, fl-2007 saru elezzjonijiet li ntrebħu mill-partit ta' Thaksin li kien bidel ismu għal 'Partit tal-Poter tal-Poplu' (P.P.P.).

Is-'sofor' m'aċċettawx dan ir-riżultat. Sadattant il-milkitar ġiegħel lil numru ta' deputati tal-PPP jivvutaw kontra l-partit tagħom biex il-kap tal-PAD Abhisit Vejjajiva leħaq prim ministru.

Minn dakinhar it-Tajlandja ma ratx kwiet, b'Abhisit ikollu jiddikjara diġà erba' darbiet stat ta' emerġenza f'dawn l-aħħar sentejn.

Uffiċjali u partitarji tal-PPP, li sadattant kien ġie wkoll dikjarat llegali, komplew kabbru l-protesti tagħhom li wasslu għal dawk kbar ta' dawn il-jiem f'baħar ta' qomos u tops ħomor, bħalma qed naraw kull ġimgħa fl-aħbarijiet, b'għajjat li jridu lura lil Thaksin, li jirriżenja l-gvern ta' Abhisit mixli li seraq il-poter grazzi għall-militar, u elezzjonijiet ġodda ħielsa mmedjatament.
Żgur li dawn, kemm-il darba jsiru, se jkunu biss il-bidu għat-tkomplija tar-riformi kbar li kien qed jintroduċu Thaksin, u li issa mistennija jpoġġu fid-dubju wkoll l-istess sistema monarkika tal-pajjiż lejn waħda repubblikana presidenzjali, wara li l-poplu ġie urtat bil-kompliċità indiretta u diretta tal-monarkija (li, sa' ftit ilu tant kien jirrispetta) mal-elite u l-militar. 

Partitarji ta' Thaksin jifirħu meta l-bieraħ rnexxilhom jaħtfu l-istazzjon televiżżiv li kien għalaq il-gvern - għalkemm llum l-militar reġgħu għalquh waqt attakki li matulhom mietu ħdax il-ruħ u madwar 800 sfaw feruti.

Konferma għall-Gvern Ċentru-Lemini fl-Italja

L-ELETTORAT ĊAĦAD IL-QABŻA FID-DLAM

Kontra t-tbassir kollu, kontra x-xejra fil-kumplament fl-Ewropa, kontra x-xewqa tal-partiti, media, maġistrati u qrati 'tal-poplu' xellugin – mhux fl-Italja biss – il-maġġoranza tal-elettorat Taljan fil-bidu ta' din il-ġimgħa kkonferma l-appoġġ tiegħu lill-gvern taċ-Ċentru-Lemin.
Wara l-ewwel sentejn fil-gvern, kwalunkwe partit jew koalizzjoni ta' partiti ġeneralment dejjem ibatu u jnaqqsu l-appoġġ. Dan f'ċirkostanzi normali, aħseb u ara meta għadha ħierġa, bil-mod minn kriżi ekonomika/finanzjarja li laqtet lill-popli kollha.
L-elezzjonijiet li saru fi 13 mill-20 reġjun tal-Italja kienu elezzjonijiet lokali, jiġifieri mhux biex jintgħażel gvern nazzjonali, tal-pajjiż kollu, iżda appuntu ta' diversi reġjuni. Iżda l-oppożizzjoni dawret dawn l-elezzjonijiet f'referendum kontra l-gvern taċ-Ċentru-Lemin, l-aktar kontra l-Prim Ministru Silvio Berlusconi.
Minn kollox ippruvaw – qlajjiet ta' skandli personali u mhux, korruzzjoni, kawża wara oħra fil-qorti u anki attentati vjolenti kontrih personali – iżda kien kollu għalxejn, għax  minflok dawn servew biex saħħew il-popolarità tiegħu u l-appoġġ għall-gvern tiegħu.

Kemm il-partit tiegħu Popolo della Libertà (PdL), kif ukoll tal-ikbar alleat tiegħu Lega Nord tant kabbru l-appoġġ fuq l-aħħar elezzjonijiet reġjonali ta' ħames snin ilu, meta kienu jmexxu tnejn biss mit-13-il reġjun, li issa se jiggvernaw f'sitta minnhom.
Anzi jekk ngħoddu r-reġjuni l-oħra li l-elezzjonijiet fihom kienu diġà saru qabel, issa nsibu li ċ-Ċentru-Lemin (Blu), minbarra l-gvern nazzjonali (għal tlett snin oħra sa' tmiem-il mandat), se jkun qed jiggverna 11-il reġjun, filwaqt li ċ-Ċentru-Xellug (Aħmar) biss f'9 bħalma turi ċar il-mappa. Ir-reġjun l-ieħor, l-Valle d'Aosta jitmexxa minn koalizzjoni ta' partiti lokali, reġjonali.
Dan ifisser li koalizzjonijiet taċ-Ċentru-Lemin se jkun qed jiggverna uħud fost l-ikbar reġjuni, u b'kollox 42,266880 ruħ, kontra s-17,860,721 miċ-Ċentru-Xellug,
Dan żgur se jiffaċilita l-ħidma tal-gvern nazzjonali, l-aktar fir-riformi li għandu f'moħħu Berlusconi, iżda aktar importanti huwa l-messaġġ politiku tar-riżultat tal-elezzjonijiet ta' Marzu.
L-elettorat Taljan m'għażilx id-dlam, iżda minflok li jżomm sod u b'saħħtu l-gvern preżenti. Forsi muux daqstant entużjast jew kuntent bis-sitwazzjoni ġenerali, iżda b'realiżmu ta' poplu għaref u għaqli jaf li kienet tkun qabża fid-dlam li kieku sfiduċja l-amministrazzjoni ta' Berlusconi.
M'hemmx alternattiva diċenti, kredibbli u prattikabbli, u għalhekk ftakru fil-proverbju antik Taljan 
"Chi lascia la via vecchia per la nuova sa cosa perde e non sa ciò che trova", jew kif jgħidu bl-Ingliż "Better the devil you know". 
Veru li kien hemm persentaġġ għola minn normal li ma marrux jivvutaw, izda dawn instab li kważi tqassmu eżatt bej n il-partiti fil-gvern u fl-oppożizzjoni. Dan żgur għandu jinkwieta iżjed lil dawn tal-aħħar, u b'mod partikulari lill-kap ġdid tal-Partito Democratico Bersani. Dan però  qajla jidher li fehem il-kriżi li jinsab fiha, għax fl-ewwel reazzjoni uffiċjali tiegħu ħareġ jgħid li huma "la rebħu u lanqas tilfu"! 

L-Obamacare: Stataliżmu Demagoġiku

RIFORMA LI L-POPLU MA JRIDHIX

Matul il-ġimgħa li għaddiet tisma' l-biċċa l-kbira tal-media, mhux dik biss internazzjonali, iżda wkoll lokali, taħseb li fl-Istati Uniti tal-Amerika seħħ xi avveniment storiku importanti daqs, jekk mhux aktar ukoll, mill-indipendenza ta' dak il-pajjiż. Fil-verità dan xejn m'huwa mument storiku fl-istorja ta' dik id-demokrazija kbira: hija biss rebħa, temporanja, tal-ossessjoni ta' bniedem wieħed, li baqa' jwebbes rasu anki meta jidher ċar li din ir-riforma, hekk kif induna verament x'inhi, il-maġġoranza tal-poplu Amerikan ma jridhix.

Qed nirreferi għar-riforma dwar is-sistema tas-saħħa ġimgħa ilu l-President Barak Obama, wara ħafna negozjati mal-istess deputati tal-Partit Demokratiku tiegħu (għax ir-Repubblikani din id-darba vvutaw kollha, kompatti kontra) rnexxielu jikseb maġġoranza ta' 7 voti biss (219 kontra 212) b'34 Demokratiċi jibqgħu 'sodi' u jivvutaw kontra l-liġi HR3200, jew Obamacare, kif qed tissejjaħ.
Wara li rnexxielu jevita li l-liġi teħel fis-Senat, billi ma ħalla l-ebda emenda ġdida tgħaddi – lanqas meta r-Repubblikani ressqu emenda biex irġieli ħatja b'molestja tat-tfal jew stupru, ma jkollhomx dritt bħall-irġiel l-oħra, għall-pillola kontra problemi ta' erezzjoni sussidjata mill-istat, bħalma se tipprovdi din il-liġi – s'issa jidher li għaddiet ta' Obama (għaliex "s'issa" nikteb lejn tmiem dan il-post).
Iżda apparti dawn, min se jgawdi l-iżjed b'din il-liġi li fil-fatt se tkabbar immens l-indħil tal-istat fil-qasam tas-saħħa u l-assigurazzjoni? Minn ta' quddiemnett il-kumpaniji tal-assigurazzjoni!
Dan għax issa KULL Amerikan irid ikun BILFORS inxurjat, u min ma jagħmilx dan jibda jiġi mmultat sa' 2% ta' dak li jaqla' kull sena, u b'hekk dawn il-kumpaniji qed jittamaw li jsalvaw mill-qagħda kritika li jinsabu fiha (għandhom 'ħofra' sitt darbiet ikbar mill-GDP tal-pajjiż!). Mhux ta' b'xejn li malli deher li l-liġi kellha ċans tgħaddi, x-shares tagħhom telgħu bi 30%
Iżda għal min suppost hi maħsuba din il-liġi? Suppost se twassal, għalkemm mhux immedjatament, biex 32  miljun ruħ li preżentement ma jintlaħqux mis-sistema tas-saħħa, jibdew jibbenefikaw ukoll. 
Min mhux midħla tas-sistema tas-saħħa fl-Amerika jista' jaħseb li din tista' twassal għall-mewt ta' xi ħadd minħabba li ma jingħatax kura. Fil-fatt jiżbalja min jaħseb li fl-Amerika min jiġi bżonn kura urġenti fi sptar  jistgħu jirrifjutaw li jikkurawh, bħalma jirrakkuntaw diversi politikanti injoranti fl-Ewropa.
 Bħalma probabbli hemm min ma jafx li li fl-Amerika kemm l-anzjani kif ukoll iż-żgħażagħ minn familji fqar huma koperti mill-Medicaid u l-Medicare introdotti minn Lyndon B Johnson fl-1965, wara li 'wiret' il-presidenza mingħand il-maqtul Kennedy – u allura Demokratiku, bid-differenza li dakinhar dik ir-riforma saret bi ftehim ma', u bil-voti tar-Repubblikani wkoll.
Dan għax dik ir-riforma ma kenitx qed 'tinnazzjonalizza' s-sanità, iżda twassalha (għall-ewwel darba), toffriha lil dawk l-aktar dgħajfa fis-soċjetà.
Li fl-Ewropa, u f'Malta, ftit jifhmu, huwa li l-maġġoranza tat-32 miljun li llum m'humiex koperti minn xi assigurazzjoni huma ċittadini tal-klassi medja  ta' bejn l-20 u l-40 sena li huma fost l-40% tal-Amerikani li ma jħallsux ċenteżmu f'taxxi, li minħabba d-dħul (income) mhumiex intitolati għall-Medicaid.
Dawn  minn dejjem ippreferew li ma jħallsu l-ebda assigurazzjoni tas-saħħa, u minflok, meta jinqalagħlhom xi bżonn ta' kura jħallsu għaliha. Bl-Obamacare dawn se jkollhom jinxurjaw ruħhom BILFORS.
Barra minhekk l-istess Kostituzzjoni Amerikana tgħid li ħadd ma jista' jiġi mġiegħel jixtri xejn bilfors – għax inkella jiġi penalizzat, intaxxat mill-istat.
Huwa għalhekk li kważi 40 mill-50 stat Amerikan mistennija jisifdaw l-Obamacare fil-Qorti Suprema.
Iżda apparti dan, apparti l-possibiltá li l-Obamacare tista' tispiċċa tissussidja l-abort, u apparti li  mhux ċar kemm din ir-riforma verament se tiġi tiswa' lill-istat (u allura lill-poplu), u minn meta effettivament għal min hi intenzjonata se jibda jgawdi minnha, hemm il-fatt ieħor importanti: mill-aħħar stħarriġ li għamel Rasmussen, 55 fil-mija tal-poplu jrid li din il-liġi tiġi revokata.
Jekk Obama u sħabu jibqgħu iwebbsu rashom filli jbellgħuhilu bilfors, il-poplu Amerikan għandu arma żgura: l-elezzjonijiet mid-term f'Novembru, fejn Obama jista' jispiċċa President  mingħajr saħħa biżżejjed biex jikseb l-awtorizzazzjoni mill-Kungres biex jiffinanzja l-liġi!

Mill-ġdid l-armi tal-qirda tal-massa (WMD)

Dan mhux blog li proprjament jitttratta dwar films jew id-dinja tal-ispettaklu, iżda, bħalma hemm miktub fil-profil tiegħi, jiena wkoll il-kritiku ċinematografiku ta’ ġurnal lokali, u kultant jitfaċċa xi film li, apparti l-valur artistiku jew tekniku tiegħu , ikollu l-istess suġġett li jkun ħaqqu kummenti li ma jkollhomx strettament x’jaqsmu mal-arti ċinematografika.

Iżda kemm minħabba li ma nkunx nixtieq inwettaq l-istess żball ta’ min ħadem il-film (li jħoss li għandu jwassal l-opinjoni tiegħu jew il-preġudizzji tiegħu billi jinqeda b’film), kif ukoll għax mhux dejjem ikolli spazju biżżejjed fil-paġni li jagħtini l-ġurnal, ma nikkummentax dwar dawk l-elementi tal-film. Għalhekk kultant fil-blog issibu dawk il-kummenti wkoll.

MIT-TERTUQA GĦALL-VERITA’ : GREEN ZONE

Bħalissa f’Malta qed jintwera l-film GREEN ZONE, biċċa fantasija xellugija dwar il-gwerra fl-Irak, diretta minn Paul Greengrass ibbażata fuq ktieb miktub minn Rajiv Chandrasekaran bl-isem ta’  “Imperial Life in the Emerald City”.

Huwa veru li dan mhux dokumentarju, imma film, iżda dan ma jagħti lil ħadd dritt jgħawweġ il-fatti u jivvinta minn żniedu, għal skopijiet purament politiċi.

Dan jerġa’ jirxoxta l-polemika dwar l-armi tal-qirda tal-massa (Weapons of Amed Destruction - WMD) li minħabba fihom l-Irak maħkum mid-dittatur Saddam Hussein fl-2003 kien ġie attakkat mill-qawwiet tal-koalizzjoni mmexxija mill-Istati Uniti, u spiċċa tneħħa mill-poter.

Imma dan il-fatt li poplu sħiħ ħeles minn wieħed mill-aktar tiranni kiefra ta’ żmienna, għal xi wħud mogħmija minn  preġudizzji politiċi u minn dejjem kontra l-Amerika u l-Punent b’mod ġenerali, ma kienx raġuni biżżejjed għall-‘indħil’ tal-Punent f’dak il-pajjiż Għarbi.

Dawn għadhom itambru dwar il-fatt li mhux veru li Saddam kellu l-WMD, li dik kienet biss skuża tal-Punent biex jinvadu l-Irak, u li l-amministrazzjoni Amerikana sserviet b’ġurnalista biex ixxerred il-qlajja tal-WMD.

U hawn twettqet biċċa qerq ewlenija fil-film: filwaqt li l-karattru tal-ġurnalista huwa bbażat fuq waħda vera, Judith Miller tan-New York Times, fil-film din jingħad li taħdem mal-Wall Street Journal. Dan għax il-ġurnal favorit xellugi (NYT) fil-film ma setgħax jiċċappas b’rappurtaġġ falz. Ħalliha li fil-fatt lanqas Miller ma kienet mazzuna daqskemm jagħti x’jifhem il-film, għax fil-verità l-istejjer tagħha qatt ma tgiddbu, kif, ukoll, iridna nemmnu x-Xellug.

Imma niġu għall-każ tal-armi qerrieda: Green Zone jgħawweġ il-fatti mingħajr ebda mistħija: kull min huwa infurmat sewwa jiftakar li, qabel l-attakk fuq l-Iran, diversi servizzi sigrieti – inklużi l-Franċizi, il-Ġermaniżi, l-Ingliżi, u saħansitra r-Russi u ċ-Ċiniżi – kienu konvinti li l-Irak kellu l-WMD, u s-CIA kienet fosthom ukoll.

Barra minn hekk ir-rapporti li kellha din kienu jmorru lura sa’ qabel l-ammninistrazzjoni ta’ Bush – u r-rifjut ta’ Saddam li baqa’ sal-aħħar ifixkel lill-ispetturi tal-armi tan-Nazzjonijiet Uniti milli jagħmlu xogħlhom (bħalma qed jagħmel illum Aħmadineġad tal-Iran dwar l-armamenti nukleari), kompla jsaħħaħ is-suspetti tal-Punent li hu veru kellu x’jaħbi.

Għalhekk, hija ħaġa li taħdem film mimli fantasija bogħod mill-fatti, u miżgħud b’insulti u disprezz kontra l-Istati Uniti, il-Punent u l-militar tagħhom. Imma huwa aktar gravi li studjo Amerikan (Universal) ixxerred, waqt li għaddejja gwerra bħal dik kontra t-terroriżmu, gideb oxxen bħal dan mistur bħala divertiment, tajjeb kemm hu tajjeb, bħal Green Zone.

Il-film infatti donnu jrid jgħid lit-truppi Amerikani u alleati li l-isforzi tagħhom kienu bbażati fuq qerq intenzjonat. Agħar minn hekk, jagħti t-tort għar-rewwixti li rriżultaw f’tant suldati maqtula fuq xi ngann Amerikan.

Fi Green Zone lejn tmiem-il film Iraki jinstema’ jgħid li jridu jkunu l-Irakini li jiddeċiedu l-futur tagħhom. U dan huwa li setgħu jagħmlu wara l-“indħil’ tal-Alleati, permezz tal-ewwel żewġ elezzjonijiet ħielsa, l-aħħar waħda ftit ġimgħat ilu, b’konkorrenza qawwija ta’ l fuq minn 60%.

Ma jistax jingħad li Green Zone bħala film mhuwiex maħdum tajjeb jew li ma jirnexxix bħala thriller tal-gwerra. Mhuwiex xi ħaġa fantastika, imma jgħaddi. Dnub li għad jitniżżel fl-istorja bħala wieħed mill-aktar films anti-Amerikani/Punent li qatt ħarġu minn studjo ewlieni Amerikan.

Iżda jekk tridu film tal-gwerra veru tajjeb, minflok araw The Hurt Locker rebbieħ assolut fl-Oscars ta’ din is-sena. Mhuwiex politiċiżżat bħal Green Zone, u jagħti stampa preċiża u realistika ta’ kif is-suldati Amerikani u Alleati ssugraw ħajjithom, biex isalvaw ħajjet il-poplu Iraki u jroddulhom lura l-libertà u d-demokrazija.

INVESTIGAZZJONI DWAR IL-ĦIDMA TAL-IPCC TAN-N.U.

IN-NAZZJONIJIET UNITI FL-AĦĦAR              IRRIKONOXXIT IL-CLIMATEGATE

Wara l-iżbalji, cover-ups u l-iskandli xjenzjati ewlenin qed imexxu investigazzjoni indipendenti dwar il-ħidma u l-aġir tal-International Panel on Climate Change (IPCC).
L-InterAcademy Council (IAC), għaqda li tirrappreżenta xjenzjati minn madwar id-dinja, se tinvestiga kif fir-rapport ewlieni li l-IPCC ħarġet fl-2007 kien hemm numru kbir ta' żbalji fattwali.


Dawn l-iżbalji nkixfu wara li ġew pubblikati eluf ta' e-mails li xi ħadd ħareg mill-Climate Research Unit (CRU) tal-East Anglia University, magħruf aħjar bħala CLIMATEGATE.


Il-mexxejja tal-IPCC li ċ-chairman tiegħu huwa l-Indjan Rajendra Pachauri, ddikjaraw li din l-investigazzjoni kien hemm bżonnha sabiex jiġi żgurat li l-proċeduri tal-IPCC huma metikolużi, dixxiplinati u mħarsa mix-xjenzjati li jipproduċu r-rapporti influwenti tagħha – u, b'mod immedjat, tiġi restawrata r-reputazzjoni tal-IPCC li ġiet mxellfa mir-rivelazzjonijiet ta' qerq li ħarġu mill-Climategate.
Iżda aktar mill-IPCC, huwa l-istess kap tagħha li ftit li xejn nissel  fiduċja fiha minħabba kunflitt ta' interess tiegħu personali, u li għalhekk suspettat b'interessi ta' gwadann personali.
Infatti Pachauri ġie akkużat li qed jagħmel flejjes kbar grazzi għall-irbit li għandu hu personali ma' kumpaniji mdaħħla fin-negozju tal-karbonju (carbon trading) li jiddependu fuq ir-rakkomandazzjonijiet tal-istess IPCC.
Dawn jinkludu banek, kumpaniji taż-żejt u l-enerġija, u fondi ta' investiment involuti bil-kbir fil-carbon trading u 'teknoloġiji sostenibbli', li flimkien jiffurmaw l-aktar suq li qed jikber fid-dinja, u li ma jdumx ma jiġi jiswa' triljuni ta' Ewro fis-sena.
Pachauri jokkupa wkoll karigi għolja oħra ta' direttur jew konsulent f'korpi ewlenin f'dik li saret magħrufa bħala 'l-industrja tal-klima'.
Barra minhekk huwa ħaġa waħda mat-TERI, jew The Energy and Resources Institute, organizzazzjoni 'non-profit' li għandha bħala skop li tittratta "il-problemi kbar u akuti li l-bniedem x'aktarx ikollu jiffaċċja minħabba l-iskarsezza dejjem tikber tar-riżorsi enerġetiċi, u l-metodi fl-isfruttar tagħhom li qed iniġġsu l-pjaneta". Żewġ problemi artifiċjali, bħalma jkolli okkażjoni nuri darb'oħra.

It-Twaqqif ta' Gvern 'Ġdid' fl-Ukrajna

YANUKOVICH DIĠÀ KISER IL-KOSTITUZZJONI

Bħalma kien mistenni l-President il-ġdid tal-Ukrajna Viktor Yanukovich ma tantx għandu 'grazzja' mal-kostituzzjoni ta' pajjiżu, u l-ewwel liġi li rnexxielu jgħaddi mill-parlament fil-fatt tmur kontriha.
Kif irrapurtajt fl-4 ta' dan ix-xahar, din il-liġi ried jgħaddiha biex ikun jista' jifforma gvern ta' koalizzjoni, ħaġa li, skond il-kosituzzjoni tal-Ukrajna, tista' issir biss bejn koalizzjoni u oħra u mhux bejn koalizzjoni u deputati individwali. 
Infatti l-gvern tiegħu Yanukovich sata' jiffurmah biss billi deputati li qabel kienu f'xi partit jew koalizzjoni li kienet fil-gvern tal-eks Prim Ministru Yulia Timoshenko, jittradixxu l-vot li permezz tiegħu telgħu fil-parlament, u jagħtu  l-vot ta' fiduċja lill-gvern ta' Yanukovich. Għalhekk ressaq u għadda fil-parlament liġi biex deputati individwali setgħu jivvutaw għal rashom, u mhux kif kienu obbligati, kif jivvota l-partit/koalizzjoni li kkontestaw l-elezzjoni magħhom.
Iżda din il-liġi fil-fatt temenda l-kostituzzjoni, ħaġa li ma setgħatx issir b'maġġoranza sempliċi fil-parlament bħalma sar, u għalhekk Yanukovich b'hekk kiser il-kostituzzjoni.
Il-Blokk ta' Yulia Timoshenko 'Patrija' (BYuT) u l-Blokk 'Ukrajna Tagħna' (NUNS) – li t-tnejn huma osservaturi fil-Partit Popolari Ewropew (PPE) – ressqu l-każ quddiem il-Qorti Kostituzzjonali.
X'aktarx hija l-istennija għad-deċiżjoni tal-qorti li għadha ma wasslitx lil Timoshenko u sħabha jiddeċiedu li jibbojkottjaw l-parlament.
Il-gazzetta ewlenija ta' kull ġimgħa bl-Ingliż, KyivPost ikkummentat hekk dwar il-mossa ta' Yanukovich:

“Adherence to constitutional niceties doesn’t appear to be high 

on the list of priorities for the new government,”

F'editorjal l-bieraħ l-istess gazzetta kompliet tikkummenta hekk dwar il-ksur tal-kostituzzjoni minn Yanukovich:

"If Ukraine’s citizens, Western friends and investors continue turning a blind eye to such blatant infringements on democracy for the sake of so-called stability, then they will share blame for what could be a nasty outcome. Rather than being blamed for financing such an undemocratic plot, the International Monetary Fund should make clear to Yanukovych’s team that they won’t bail out an “illegitimate coalition.”
There is a reason why millions withstood freezing temperatures to protest a fraud-marred vote in Yanukovych’s favor during the 2004 Orange Revolution. People stood up for democracy, justice, rule of law and fairness. Without these key ingredients, few countries are able to demonstrate the stability needed for sustained economic growth."

Sadattant ħarsa lejn il-kabinett li ħabbar Yanukovich ma tantx jagħti idea ta' gvern 'ġdid', li kiseb vot ta' fiduċja wara li xi deputati tan-NUNS u tal-BYuT ittradew l-elettorat tagħhom. 

Infatti l-gvern mimli b'uċuħ mill-gvernijiet ta' qabel ir-Rivoluzzjoni Oranġjo, l-aktar dawk tar-reġim tal-aħħar prim ministru Leonid Kuchma, filwaqt li l-prim Ministru li ħa post Timoshenko, Mykola Azarov, imwieled ir-Russja 64 sena ilu, fejn kiseb ukoll l-edukazzjoni, hu meqjus kapaċi bħala maniġer bi stil Sovjetiku, u li kien ġie kkundannat minn għadd ta' għaqdiet internazzjonali tad-drittijiet tal-bniedem, minħabba li meta kien kap tal-gwardja tal-finanzi fi żmien Kuchma, kien jużaha bħala arma kontra l-oppożizzjoni.

Azarov kien ukoll l-ewwel kap tal-Partit tar-Reġjuni, li għadda l-kmand tal-istess partit lil Yanukovich, kif għadu sal-lum, minkejja li bħalha President tar-Repubblika ma jistax jibqà jmexxi partit politiku, u b'hekk ukoll dan qed jikser il-kostituzzjoni.

Għalhekk ħafna qed jistaqsu, bħali, KEMM SE JDUM IL-PUNENT, l-UNJONI EWROPEA JISTAPORTU DAN IT-TKASBIR TAD-DEMOKRAZIJA FL-UKRAJNA?

Yulia Timoshenko ħalfet li se jkunu bħal seqer fuq il-avversarji li ħatfu l-gvern b'mossi illeġittimi."Se nagħrblu, niġġudikaw kull mossa tal-gvern. Se jkunu taħt il-mikroskopju tagħna kuljum...". Kif tgħid din il-karikatura li dehret fil-KyivPost: Lanqas fil-ħolm m'hu se jeħles minnha Yanukovich (isuq it-trakk, b'Azarov  maġenbu).