Climategate Part 2

JAĦBU L-FATT LI D-DINJA M'GĦADHIEX TISĦON

Ftit aktar inqas sentejn ilu kien faqqa' skandlu fil-kamp internazzjonali xjentifiku li sar magħruf bħala Climategate li minnu sar  magħruf li xi xjenzjati fil-Climate Research Unit (CRU) tal-Università ta' East Anglia fl-Ingilterra kienu jimmanipulaw u jaħbu data fir-riċerki tagħhom ħalli jsostnu t-teżi li huwa l-bniedem li jaħti għat-tisħin tal-globu, tad-dinja.
L-istess ħaġa sar dan l-aħħar, din id-darba fl-Istati Uniti, bħalma sar magħruf illum, minn rapport ippubblikat fil-Mail on Sunday tal-Ingilterra.
L-istorja bdiet il-ġimgħa l-oħra meta team ta' riċerkaturi mill-Berkeley Earth Surface Temperatures (BEST) immexxi mill-Professur Richard Muller fl-Università ta' Berkeley f'Kalifornja ppubblikaw riċerka li skond huma turi li l-pjaneta tagħna saħnet b'mill-inqas grad ċentigradu mill-1950, u qed tkompli tisħon.
Dan ir-rapport – li ġie pubblikat ftit ġimgħat qabel man-Nazzjonijiet Uniti terġà tlaqqa' summit ieħor dinji dwar il-klima, din id-darba f'Durban, fl-Afrika t'Isfel – ġie ikkwotata fid-dinja kollha bħala prova, li ħadd ma jistà imeriha, li huma biss aktar miżuri biex jitnaqqsu l-emissjonijiet tas-CO2 li jsalvaw iċ-ċiviltà tagħna kif nafuha, u li għalhekk ħadd ma jista jkun aktar xettiku dwar din il-ħaġa.
Iżda llum l-Mail on Sunday svelat li membru ewlenija tat-team ta' Muller akkużatu li qed jipprova jqarraq bil-pubbliku billi jaħbi l-fatt li l-istess riċerka tal-BEST turi li d-dinja m'għadhiex tisħon.
Il-Professoressa Judith Curry, Chairperson tal-Department of Earth and Atmospheric Sciences fil-prestiġġjiuż Georgia Institute of Technology, sostniet li l-pretesa tal-Prof Muller li b'hekk ipprova li x-xettiċi dwar it-tisħin tal-globu huma żbaljati, hija wkoll 'żball kbir' , mingħajr bażi xjentifika.
Fl-intervista mal-Mail on Sunday hi qabblet dan il-każ mal-iskandlu famuż Climategate.
L-istess bħax-xjenzjati Ingliżi tas-CRU , il-kollegi ta' Curry fil-proġett BEST qed jippruvaw jaħbu t-tnaqqis fir-rati tat-tisħin tal-globu.
Infatti, l-Prof Curry qalet, l-istess data tal-BEST  turi li mit-tmiem tas-Snin Disgħin ma kienx hemm żjieda fit-temperaturi tal-pjaneta tagħna.

Graff li juri li t-temperaturi tad-dinja m'għolitx f'dawn l-aħħar 10 snin
skond data ta' università ta' Kalifornja, data li ppruvaw jaħbu

Imma graff li ħareġ il-BEST juri li suppost li d-dinja baqgħet tisħon kontinwament.
Iżda rapport pubblikat illum fuq is-sit tal-Global Warming Policy Foundation jinkludi graff bit-temperatura medja globali ta' dawn l-aħħar għaxar snin, mislut mill-istess data tal-proġett tal-BEST, li t-temperatura baqgħet dejjem fl-istess livell – dan minkejja li l-livelli tas-CO2 fl-atmosfera  baqgħu jogħlew kontinwament.
Dan imur kontra dak li bassru mudelli tal-klima li fuqhom studjaw xjenzjati sal-lum. "Dak li qed jiġri hawnhekk ma jidhirx li huwa dominat mis-CO2", sostniet il-Prof Curry.
Meta kkuntattjat il-Prof Muller ammetta li veru li d-data tal-BEST turi li t-temperaturi tad-dinja ma għolewx f'dawn l-aħħar 13-il sena, iżda skond hu dan jistà ma jkunx 'statistikament sinifikanti', għalkemm, żjied, jista' ikun li hu sinifikanti – stqarrija li ħawwdet lix-xjenzjati!
Il-Prof Curry kompliet tgħid lil Mail on Sunday li Muller qabad u xandar riċerka li għadha ma ġietx verifikata u konfermata (peer reviewed) kif suppost isir, minn esperti oħra fil-qasam.
Għalhekk, għalkemm  Muller jiċħad dan, is-suspett huwa li hu ppubblika r-riċerka, anzi parti mir-riċerka tal-BEST, in viżta tas-summit tan-NU – biex jinfluwenza l-opinjoni pubbliku u lid-delegati li se jattendu, biex forsi fl-aħħar jilħqu ftehim dwar xi protokoll ġdid minflok dak fallut ta' Kjoto, u li s'issa sar kemm-il summit simili, għalxejn.
B'xorti tajba, iżda, anki din id-darba kien hemm xi ħadd ta' kuxjenza li, bħal fl-ewwel Climategate, leħaq kixef il-qerq!

Persekuzzjoni Politika fl-Ukrajna (4)

QBIL BEJN IL-PPE U L-PSE FIL-PARLAMENT EWROPEW KONTRA S-SENTENZA TA' ĦABS LIL TIMOSHENKO

Kontra dak li soltu kien jiġri f'riżoluzzjonijiet dwar l-Ukrajna, fil-Parlament Ewropew illum kien hemm qbil bejn l-ikbar żewġ gruppi, dak tal-Partit Popolari Ewropew u tal-Partit Soċjalista Ewropew dwar riżoluzzjoni twila ta' kundanna għas-sentenza ta' seba' snin ħabs li nagħtat il-Kap tal-Oppożizzjoni fl-Ukrajna Julia Timoshenko u meqjusa bħala motivata politikament f'persekuzzjoni sistematika tal-oppożizzjoni mill-gvern awtoritarju xellugi pro-Russja tal-President tar-Repubblika Viktor Yanukovich.
Ir-riżoluzzjoni tal-Parlament Ewropew tinsisti li Timoshenko għandha titħalla teżerċita d-dritt tagħha li tieħu sehem b'mod sħiħ fil-proċess politiku minn issa u fl-elezzjonijiet li ġejjin fl-Ukrajna.
Id-deputati taż-żewġ naħat tal-Parlament Ewropew jaqblu li s-sentenza kontra Timoshenko hija ksur tad-drittijiet umani u l-liġi li ntużat kontriha tmur lura għal żmien l-era Komunista Sovjetika li m'hemmx lokha f'pajjiż li qed jaspira li jingħaqad fl-Unjoni Ewropea.
Għalhekk dawn jesiġu li l-eks Prim Ministru tiġi żgurata proċess legali fier, trasparenti u imparzjali fl-appell.
Il-Parlament Ewropew iħoss li jekk Timoshenko ma tinħelisx, dan ifixkel il-konklużjoni tal-Ftehim ta' Assoċjazzjoni mal-Unjoni Ewropea li suppost għandu jiġi ffirmat sa' tmiem din is-sena, u għal kuntrarju jbiegħed lill-pajjiż il-bogħod mill-UE, anki fid-dawl tat-tnaqqir tal-libertajiet demokratiċi, u l-użu tal-istituzzjonijiet statali għal skopijiet partiġġjani u vendetta politika.
Qabel għaddiet din ir-riżoluzzjoni, fl-Ukrajna dan l-aħħar inbdiet kampanja bl-iskop li l-poplu jiġi konvint li l-Unjoni Ewropea ma trudx lill-Ukrajna tissieħeb fiha, u li allura l-gvern ma kellux triq oħra għajr li ddur lejn ir-Russja.
Imma r-riżoluzzjoni tal-Parlament Ewropew tgħid li t-tisħiħ tar-relazzjonijiet bejn l-UE u l-Ukrajna u l-offerta lill-Ukrajna ta' perspettiva Ewropea huma fl-interess taż-żewġ naħat, basta l-Ukrajna tirrispetta l-kriterja kollha tal-prinċipji tad-demokrazija, drittijiet umani, libertajiet fundamentali u s-saltna tal-Liġi jiġu rispettati. Il-PE jitlob lill-Kunsill u Kummissjoni Ewropea biex jiffissaw data ġdida għal-laqgħa mal-President Yanukovich , wara li dik ippjanata dan ix-xahar tħassrtet bħala sinjal ta' protesta kontra s-senetnza li nagħtat lil Timoshenko.
Fi tweġiba l-lejla l-President Yanukovich kkonferma li l-pożizzjoni tiegħu għadha li l-Ftehim ta' Assoċjazzjoni li se jiġi ffirmat f'Diċembru għandu jwassal għat-tisħib sħiħ fl-UE, u li l-Ukrajna hija fit-triq li twettaq riformi ħalli ttejjeb is-sitwazzjoni, iżda dan mhuwiex proċess ta' malajr.
Tistgġu taqraw ir-riżoluzzjoni kollha hawnhekk:http://www.europarl.europa.eu/sides/getDoc.do?pubRef=-//EP//TEXT+MOTION+P7-RC-2011-0543+0+DOC+XML+V0//MT

Kieku t-Taljani jivvutaw illum

NOFS L-ITALJA ĊENTRU-LEMINI  U NOFSHA XELLUGIJA

Il-programm popolari ta' diskussjoni Porta a Porta immexxi minn Bruno Vespa l-bieraħ kien jinkludi stħarriġ tal-opinjoni pubblika minn tlett istituti tar-riċerka li sostanzjalment ikkonfermaw l-istess ħaġa: li kieku t-Taljani jmorru jivvutaw illum dawn jinqasmu kważi eżatt minn nofs bejn, fuq naħa l-partiti taċ-Ċentru-Lemin u fuq in-naħa l-oħra dawk tax-Xellug: 50.1% favur iċ-Ċentru-Lemin u 49.4% għall-partiti xellugin.
ĊENTRU-LEMIN
Popolo della Libertà: 26.5%; Lega Nord: 8.3%; La Destra: 1.5%; Alleanza di Centro/Grande Sud:1.2%   = 37.5%
Unione di Centro (UDC): 7.1%; Futuro e Libertà (FLI) : 2.3%; All. per l'Italia+Mov. per le Autonomie: 3.2% = 12.6%
Total: 50.1%
XELLUG
Partito Democratico: 27.2%; Italia dei Valori (IdV): 6.5% = 33.7%
Sinistra e Libertà: 7.0%; Rifondazione Comunista: 2.6%; Pannella/Bonino: 1.9%; Partito Socialista: 0.4%; Movimento 5 Stelle-Grillo: 3.8%;  =  15.7%
Total: 49.4%
Filwaqt li tajjeb ngħid mill-ewwel li meta mistoqsija lil min jivvutaw kieku kellha ssir elezzjoni issa, kien hemm bejn 25 u 30% li jew qalu li għadhom ma ddeċidewx jew inkella li mhux beħsibhom jivvutaw, minn dan l-istħarriġ joħroġ l-orjentament politiku tal-elettorat Taljan bħalissa.
Jiġifieri ma jfissirx li wara elezzjoni b'dawn ir-riżultati, il-partiti taż-żewġ skjeramenti bilfors jingħaqdu flimkien kif jidhru hawn fuq biex jippruvaw jiffurmaw gvern.
Dan għax sal-lum jidher li l-uniku qbil li hemm huwa bejn il-partiti li hemm bħalissa fil-gvern mal-Popolo della Libertà, u li skond l-istħarriġ jistgħu jiksbu 37.5%.
Mill-banda l-oħra l-ikbar partit fl-oppożizzjoni bħalissa, il-Partito Democratico għad m'għandu ftehim mal-ebda partit, u l-iktar li jinsab qrib huwa l-partit ta' Di Pietro, IdV li bejnithom imbassar li ma jaqbżux t-33.7%. Il-ħames partiti l-oħra xellugin, apparti dak ta' Grillo (li l-voti li jikseb huma l-aktar fir-reġjun tal-Emiglia-Romagna) diġà kienu fil-gvern mal-Partito Democratico (dak iż-zmien Democratici di Sinistra u l-Margherita ta' Bindi u Rutelli) fi żmien Prodi.
Dawn kienu f'dik li kienet issejħet l'Unione, meta però ma saddewx wisq flimkien, li kien inevitabbli meta tqies il-qawsalla jew balbuljata ta' ideat li jirrappreżentaw is-sitt partiti, minn Komunisti sa' Demokristjani xellugin. Aħseb u ara kemm jistgħu jiftiehmu u jsaddu bi Grillo magħhom bl-ideat populisti u anti-partitokratiċi tiegħu.
Dak iż-żmien l-unika ħaġa li kienet għaqqdithom kienet l-"anti-Berluskoniżmu", iżda x'se jagħmlu issa li Berlusconi diġà ħabbar li mhux se jikkontesta fl-elezzjoni li jmiss?!
Fuq in-naħa l-oħra l-ftehim għall-gvern ieħor taċ-Ċentru-Lemin jidher aktar possibbli għax teżisti aktar minn omoġenjità, għax kemm l-UDC ta' Casini, l-FLI ta' Fini, u l-MpA huma msieħba fl-istess Partit Popolari  Ewropew bħall-Popolo della Libertà, minbarra l-fatt li sal-elezzjoni li jmiss, kif ktibt qabel, Berlusconi ħabbar li se jkun warrab, u b'hekk tispiċċa l-pika li jidher li għandhom miegħu Casini u Fini.
Mill-istess stħarriġ imħabbar waqt Porta a Porta ħarteġ ukoll li dawk li qalu li se jivvutaw lil dawn il-partiti li bħalissa jinsabu flimkien fl-hekk imsejjaħ Nuovo jew Terzo Polo, jixtiequ li dawn ma jingħaqdu mal-ebda skjerament, iżda jekk dan isir l-maġġoranza jridu li dawn jingħaqdu mal-Popolo della Libertà.
Fl-aħħarnett l-maġġoranza ta' dawk li ma jafux lil min, jew mhux se jivvutaw (37%), huma eletturi taċ-Ċentru-Lemin, li d-deċiżjoni finali x'se jagħmlu jieħduha fl-aħħar ġimgħa tal-kampanja elettorali.
L-importanti issa huwa li l-partiti  minn  issa sa' meta tasal l-elezzjoni jiddikjaraw x'tip ta' gvern, koalizzjoni, se jiffavorixxu, jżommu kelmithom u ma jittradixxux lill-elettorat li jkun ivvutalhom – bħalma għamlu Fini u sħabu.
Hawn Casini jrid ikun ċar u onest għax il-votanti tiegħu huma Ċentru-Lemini bħalma wara kollox huma wkoll dawk ta' Fini, u żgur ma jridux li ħtija tal-aġir pikuż taż-żewġ mexxejja jispiċċa jiggverna x-Xellug.

Persekuzzjoni Politika fl-Ukrajna (3)

L-OPPOŻIZZJONI TRID ELEZZJONI BIKRIJA

Wieħed mill-mexxejja tal-Partit "Patrija" tal-kap tal-Oppożizzjoni Julia Timoshenko ħabbar il-bieraħ li se jressaq mozzjoni biex il-parlament tal-Ukrajna jiġi xolt u jsiru elezzjonijiet qabel iż-żmien.
Is-sit ta' Timoshenko http://www.tymoshenko.ua/en  ħabbar li waqt konferenza stampa Oleksandr Turchynov sostna li skond il-kostituzzjoni il-parlament jistà jxolji lilu nnifsu, filwaqt li qal li l-Ukrajna m'għandhix bżonn parlament li jobdi ordnijiet illegali, jissekonda persekuzzjoni politika, jeqred il-futur ekonomiku u soċjali taċ-ċittadini, u mhux kapaċi jieħu deċiżjonijiet kontra l-kriżi.
"Kull ġurnata li dawn jibqgħu fil-poter hija perikoluża wisq għall-pajjiżna. Jiena ċert li filwaqt li din il-mozzjoni tagħna mhix se tiġi appoġġjata mill-maġġoranza favur il-President tar-Repubblika Yanoukovich fil-parlament, se ssib l-appoġġ sħiħ tal-poplu Ukren, u li dan mhux se jonqos milli jkabbar il-pressjoni fuq l-istess parlament."
Sadattant, fiwaqt li d-difiża tal-eks prim Ministru Timoshenko lestiet l-appell mis-sentenza ta' seba snin ħabs kontriha, l-Unjoni Ewropea pposponiet żjara li Yanukovich kellu jagħmel fi Brussels nhar il-Ħamis li għadda, b'kelliem għall-Kummissarju tal-Politika Barranija tal-UE Ashton, qal li din id-deċiżjoni ttieħdet biex Yanukovich u r-reġim tiegħu jirrealizzaw li "jeħtiġilhom jagħmlu progress biex jiżguraw li fl-Ukrajna ssaltan il-liġi (rule of law) u l-indipendenza tal-ġudikatura."
L-Unjoni Ewropea diġà għamlitha ċara li tqies is-sentenza kontra Timoshenko bħala motivata politikament biex teqred mix-xena politika l-ikbar avversarju ta' Yanukovich, u li dan se jkollu implikazzjonijiet serji fuq ir-relazzjonijiet bejn l-UE u l-Ukrajna, inkluża l-konklużjoni tal-Ftehim ta' Assoċjazzjoni li kellu jiġi ffirmat sal-aħħar tas-sena.
Is-sentenza ġabet reazzjoni negattiva mhux biss mill-UE u l-Punent, iżda saħansitra mir-Russja, meqjusa bħala alleata ta' Yanukovich.
Għal tagħrif sħiħ dwar dan il-ġuri-farsa ta' Timoshenko ara l-posts tiegħi tat-8 u l-11 ta' Ottubru, u dan il-video, li nħadem qabel ma nagħtat is-sentenza fil-11 tax-xahar:

THE TRIAL OF YULIA TYMOSHENKO. THE TRUE STORY

I T - T M I E M  T A'  T I R A N N

Ħadd issa ma fadallu l-iċken dubju li d-dittatur-tirann Muammar Gaddafi mejjet. Hawn jidher il-kadavru tiegħu f'kamra-freezer fil-belt ta' Miżrata (ritratt), sakemm għada suppost li għandu jindifen bir-ritwali kollha Musulmani, mhux bħall-eluf li r-reġim tiegħu qatel tul 42 sena u li ħadd ma kien ikun jaf x'sar minnhom.
Li għadu mhux ċar huwa kif inqatel, ħaġa li sinċerament, personalment qajla jinteressani, u ma nifhimx l-għaġeb kollu li qed isir dwar dan. Forsi kien ikun aħjar li għadda ġuri bħal ma għamlu lil Saddam Hussejn tal-Irak.  Imma issa li hemm hemm.
Il-Ħadd il-Kunsill Transitiorju Nazzjonali se jiċċelebra uffiċjalment il-ħelsien tal-Libja mill-ħakma ta' Gaddafi u r-reġim tiegħu, u wara l-festi trid tibda l-biċċa xogħol iebsa tal-bini mill-ġdid ta' Libja demokratika u liberali, ħalli la t-tribù u lanqas l-estremisti Islamiċi ma jingħataw ċans jisfrattaw u jġibu fix-xejn dak li kisbu b'demmhom mal-50,000 Libjan. Nistennew u nittamaw.  

RAPPORTI LI GADDAFI NQABAD/INQATEL

Skond rapporti li qed jaslu minn Sirte, id-dittatur Muammar Gaddafi nqabad ferut wara ġlied qalil, u li nstab moħbi f'ħofra. Rapporti oħra qalu li hu ġie ferut waqt attakki minn ajruplani tan-Nato fuq konvoj ta' karrozzi li kienu qed jaħarbu mill-belt, u nqabad u nqatel fi ġlied fl-art.
Waqt li qed nikteb il-Viċi president  tal-Kunsill Nazzjonali Transitorjiu Ghoga ikkonferma li Gaddafi huwa mejjet.

Ritratt li juri lil Gaddafi hekk kif inqabad mill-ġellieda għall-ħelsien

... u ritratt ieħor li juri lil Gaddafi mejjet meħud minn filmat li wera l-istazzjon AlJazeera ftit minuti ilu

Il-Ħelsien ta' Suldat Lhudi

M'GĦANDUX ISIR NEGOZJAR MAT-TERRORISTI

Palestinjani tal-Ħamas f'Gaża jiċċelebraw il-ħelsien ta'
mijiet ta' priġunieri Palestinjani minn Iżrael il-bieraħ
bħala tpartit għall-ħelsien ta' suldat wieħed Lhudi

Il-bieraħ id-dinja kollha rat lil suldati ta' Iżrael jifirħu flimkien mal-ġenituri u l-ħbieb tas-suldat Lhudi Ġilad Shalit li nħeles mill-Ħamas wara ħames snin li ħatfuh. Imma rajna wkoll lil dawn tal-aħħar jifirħu ...u kellhom tassew għalxix: għal suldat wieħed li nqabad mhux waqt ġlied iżda waqt li qed jgħasses il-fruntera ta' pajjiżu, sw jkunu nħelsu 1,027 Palestinjan, 477 minnhom li kienu kundannati wara li nstabu ħatja ta' atti terroristiċi.
Dan se jinkuraġixxi lit-terroristi tal-Ħamas u oħrajn jerġgħu jaħtfu ostaġġi oħra, anki mhux suldati, barra l-fatt li issa dawk it-terroristi meħlusa se jkunu jistgħu ikomplu bl-aġir tagħhom mhux biss kontra Lhud, iżda kontra nies ċivili fid-dinja kollha.
Dan in-negozjar mat-terroristi li jpoġġi l-ħajja ta' bniedem wieħed fuq l-interess ta' nazzjon u ta' poplu sħiħ għalija huwa tradiment tal-patrija u l-prinċipji ta' demokrazija, libertà u s-saltna tad-dritt (rule of law).
Tal-mistħija, u l-mexxejja Iżraelijani  misshom jafu aħjar. Iżda din mhux l-ewwel darba li l-politikanti Lhud abbandunaw il-prinċipji u s-sens komun għall-benefiċċji temporanji. Infatti ilhom jagħmlu dan mill-1982, u hu kalkulat li mal-10,000 Palestinjan inħelsu.

Stabbilità fl-Italja (2)

IL-GVERN JIRBAĦ VOT TA' FIDUĊJA IEĦOR

Wara dak tat-28 ta' Settembru, li ma nafx il-kemm il-wieħed kien, il-Gvern Ċentru-Lemini Taljan immexxi mill-Prim Ministru Silvio Berlusconi wara nofsinhar reġà kiseb vot qawwi ta' fiduċja fil-Kamra tad-Deputati, minn wara t-tradiment politiku tal-iSpeaker Fini u xi deputati oħra li telqu mill-Popolo della Libertà  wara li l-poplu kien tellagħhom biex jiggvernaw flimkien ma' Berlusconi.

Il-Prim Ministru Silvio Berlusconi ...kuntent

Il-vot, mitlub mill-Prim Ministru innifsu, irriżulta fi 316-il vot favur il-fiduċja (wieħed aktar minn f'Settembru) u 301 kontra, meta l-gvern kellu bżonn biss 309 biex jirbaħ il-fiduċja.
Jiġifieri l-IVA għaddew lil LE bi 15-il vot, filwaqt li l-gvern ta' Berlusconi kiseb 7 voti aktar milli kellu bżonn, li jfissru li l-gvern Ċentru-Lemini bħalissa qed igawdi minn maġġoranza assoluta.
Wara l-vot Berlusconi innota li fil-fatt l-maġġoranza hija ta' 318-il vot, għax żewġ deputati ma setgħux jattendu u kienu skużati. Fost dawn kien hemm Pietro Franzoso li jinsab l-isptar wara inċident tat-traffiku.
B'kollox kien hemm 13-il deputat li ma kienux preżenti fl-awla waqt il-votazzjoni.
Tajjeb illum nagħtu daqqa t'għajn kif inhuma maqsumin bħalissa l-gruppi fil-Camera dei Deputati:
Il-gruppi li jiffurmaw il-koalizzjoni taċ-Ċentru-Lemin huma tlieta:
L-ikbar grupp huwa dak tal-Popolo della Libertà (PdL) b'218-il deputat;
Lega Nord (LN) b'59 deputat; u
Popolo e Territorio (PT - magħmul minn 6 gruppi li kull wieħed waħdu ma kellux 20 deputat) b'29 deputat
Dawn it-tlett gruppi regolarment jivvutaw favur il-gvern, u jgħoddu 306 deputati bejnithom.
Mill-banda l-oħra dawk li normalment jivvutaw kontra l-gvern huma erba':
Partito Democratico (jinkludi post-Komunisti, Soċjalisti, Demokristjani Xellugin, Ħodor) b'206 deputat
Italia dei Valori (IdV) bi 22 deputat
Unione di Centro (UDC) b'35 deputat; u
Futuro e Libertà per l'Italia (FLI) b'27 deputat li kienu telqu mill-Popolo della Libertà is-Sajf l-ieħor .
Dawn  il-gruppi flimkien jgħoddu 290.
Hemm imbagħad l-Gruppo Misto magħmul minn ħames partiti li ma jaqbżux l-20 kull wieħed (Alleanza per l'Italia, Liberali Democratiche; Minoranze Linguistiche, Autonomie/Sud, Repubblicani/Azionisti), u 16-il deputat indipendenti,  u allura ma jistgħux jiffurmaw grupp għalihom. Dawn ilaħħqu 34.
Il-membri ta' dan l-aħħar grupp ma jivvutawx dejjem u kollha l-istess, fis-sens li daqqa jivvutaw favur il-gvern u liġijiet li jressaq, u daqqa jivvutaw kontra. Dan il-grupp dan l-aħħar baqa' dejjem jikber, u probabbli li issa jingħaqdu miegħu ukoll is-sitt deputati Radikali ta' Pannella .
Dan wara li dan l-aħħar r-Radikali mhux qed jogħqodu għad-dixxiplina tal-Partit Demokratiku fil-parlament, u llum, kontra d-direttiva tal-PD, daħlu mill-ewwel fl-awla biex b'hekk intlaħaq il-kworum meħtieġ ħalli l-votazzjoni tkun valida, iżda r-Radikali Marco Beltrandi l-lejla ċaħad dan u qal li ċ-ĊentruLemin waħdu xorta kien laħħaq il-kworum għas-seduta.

Persekuzzjoni Politika fl-Ukrajna (2)

TIMOSHENKO KKUNDANNATA SEBA' SNIN ĦABS

Julia Timoshenko eskortata llum barra l-awla fost protesti
qawwija ta' partitarji tagħha

Il-Kap tal-Oppożizzjoni fl-Ukrajna Julia Timoshenko illum instabet ħatja li abbużat mill-poter tagħha meta kienet Prim Ministru ffirmat ftehim dwar il-gass mir-Russja, u ġiet kundannata seba' snin ħabs.
Barra minhekk  hi trid tħallas $186 Miljun li ntqal li tilfet kumpanija parastatali bil-ftehim, u ma tistax tieħu sehem fil-politika għal tlett snin, biex b'hekk ma tkunx tuista' tieħu sehem fl-elezzjonijiet tas-sena d-dieħla jdew tikkontesta għall-President tar-Repubblika.
Infatti kemm l-Unjoni Ewropea kif ukoll l-Istati Uniti kkundannaw mill-ewwel din is-sentenza u l-ġuri bħala motivati politikament biex il-President attwali Yanukovich jeħles minn avversarju politiku.
Timoshenko se tappella mis-sentenza, u tressaq il-każ tagħha quddiem il-Qorti Ewropea tad-Drittijiet Umani.
Malli nqrat is-sentenza kemm fil-qorti kif ukoll barra kien hemm proitesti qawwija u għajjat ta' "Misskom Tistħu!", u t-toroq tal-madwar f'Kiev jinsabu mgħassa minn pulizija u suldati kontra l-irvellijiet fost tensjoni kbira.

Il-Polakki Poplu Matur

KONFERMA GĦALL-GVERN ĊENTRU-LEMINI

Il-Prim Ministru Donald Tusk ma' martu jifirħu bir-riżultat tal-elezzjoni

Il-poplu Polakk ta prova oħra ta' poplu matur meta l-bieraħ reġà ta maġġoranza ta' voti u siġġijiet liż-żewġ partiti taċ-Ċentru-Lemin li ggvernaw il-pajjiż f'dawn l-aħħar erba' snin. B'hekk il-partit ewlieni Pjattaforma Ċivika (PO) tal-Prim Ministru Donald Tusk, bħalma kien mistenni, sar l-ewwel partit li rebaħ darbtejn fuq xulxin fil-Polonja.
Riżultati mhux uffiċjali qed jagħtu lill-PO 39.6% tal-voti li jissarfu f'212-il siġġu fil-parlament ta' 460. Il-Partit Popolari Polakk (PSL) li jinsab f'koalizzjoni fil-gvern kiseb 8.2% u 27 siġġu. B'hekk il-gvern mistenni jkollu maġġoranza ta' 239 siġġu, kważi eżatt daqskemm kellu qabel.
L-agħar li mar kien l-partit Alleanza Demokratika tax-Xellug (SLD) li naqqas il-voti minn 13.2% għal 7.7%, perikolożament lejn il-minimu ta' 5% biex partit ikun rappreżentat fil-parlament. Minn 53 siġġu spiċċa bi 23 biss, telf ta' 30 siġġu.
Jidher ċar li din it-telfa kienet kawżata minn partit ġdid antiklerikali, il-Moviment ta' Palikota (RP), imwaqqaf Janusz Palikot li telaq mill-partit ta' Tusk għax ried li l-PO ikun aktar liberali. Dan ġabar 10% tal-voti u mistenni jkollu 39 siġġu, u mistenni jappoġġja xi miżuri ekonomiċi tal-gvern Ċentru-Lemini.
Tusk mexxa b'suċċess il-Polonja matul il-kriżi finanzjarja tal-2008-09, u fil-fatt kien l-uniku pajjiżi Ewropew li m'għaddiex minn riċessjoni. Hu wiegħed li se jkompli fit-triq tar-riformi ekonomiċi.
Il-partit l-ieħor fil-parlament se jkun l-lemini Partit tal-Liġi u l-Ġustizzja (PiS) li kiseb 30% u 158 siġġu.

In-Nixfa u t-Tisħin tal-Globu

RICK PERRY JGĦADDI LIL OBAMA ...FIX-XJENZA

Il-Gvernatur ta' Texas Rick Perry jidher li se jkun wieħed minn żewġ kandidati li minnhom ir-Repubblikani jridu jagħżlu min se jisfida lill-kandidat Demokratiku li ovvjament se jkun il-President in kariga Barak Obama. Dan tal-aħħar, iżda, diġá ħareġ tellief kontra Perry meta dan l-aħħar fettillu jikkritika lil Perry bħala il-gvernatur li filwaqt li l-istat tiegħu qed jinħaraq minħabba n-nixfa, nuqqas kbir ta' xita, dan jiċħad it-tibdil fil-klima, it-tisħin tal-globu kawżat mill-bniedem.

Rick Perry, Gvernatur ta' Texas

Fil-veritá huwa Perry li għandu raġun għax ż-żjieda fil-gassijiet serra, CO2, fil-fatt ikkawża TNAQQIS fin-nixfa fid-dinja f'dawn l-aħħar 30 sena, tant li xjenzjat ewlieni tal-istess gvern ta' Obama, Dr. Robert Hoerling iddikjara ċar u tond li "Din in-nuqqas ta' xita f'Texas mhuwiex kawżat mit-tibdil fil-klima".
Hoerling huwa riċerkatur meteoroloġista tan-National Oceanic and Atmospheric Administration (NOAA) u kien kittieb ewlieni tal-US Climate Change Science Plan Synthesis & Assesment Report.
"L-aħbar tajba hija li din m'għandhix x'taqsam mat-tisħin tal-globu. Texas esperjenza bil-kbir in-nuqqas ta' xita fl-imgħoddi, u dan tal-aħħar m'għandux x'jaqsam mat-tibdil fil-klima".
"In-nixfa laqtet lil 80 fil-mija tal-pajjiż kollu fl-1934, meta mqabbla ma' 25% fl-2011".
"Ir-rekords juru li n-numru ta' nirien kbar naqsu tul dawn l-aħħar  40-50 sena, u n-numru tagħhom kien ferm ikbar fis-Snin Sebgħin meta kien hemm min kien beżżá li l-globu kien qed jiksaħ!"
Kelliem għal Perry, Ray Sullivan, qal li "Huwa tal-mistħija li l-President Obama juża l-ħruq ta' 1500 dar, l-agħar nirien fl-istorja tal-istat,  għal attakk politiku.
"Dan minn President," kompla Sullivan, " li pajjiżu qed jiffaċċja problemi finanzjarji serji, u s-soluzzjonijiet tiegħu qed jiswew flejjes kbar lill-familji billi jgħollilhom it-taxxi, lilhom u lin-neguzjanti żgħar."
F'Awwisu Perry kien sostna li din tat-tibdil tal-klima kawżat mill-bniedem hija qerq.

Il-President Barak Obama

Il-kliem eżatt ta' Perry kien dan:

"I do believe that the issue of global warming has been politicized. I think there are a substantial number of scientists who have manipulated data so that they will have dollars rolling into projects, and I think we're seeing almost weekly or even daily scientists who are coming forward and questioning the original idea that man made global warming is what is causing the climate to change. 
Yes, our climate's changed, but it's been changing ever since the Earth was formed."

Persekuzzjoni Politika fl-Ukrajna

IS-SENTENZA KONTRA TIMOSHENKO X'AKTARX GĦAT-TLIETA

Lejn tmiem il-ġimgħa l-oħra l-Kap tal-Oppożizzjoni Yulia Timoshenko temmet id-difiża tagħha quddiem il-qorti fejn tinsab akkużata li abbużat mill-poter fl-2009, meta bħala Prim Ministru tal-Ukrajna, ffirmat ftehim dwar l-importazzjoni tal-gass mir-Russja. Il-ġuri ġie aġġornat għal nhar it-Tlieta li ġejjin 11 ta' Ottubru, meta x'aktarx tingħata s-sentenza, li l-akkuża qed titlob li tkun ta' sebgħa' snin ħabs.

Yulia Timoshenko waqt l-aħħar seduta
tal-ġuri f'ritratt meħud b'mobile u li fih
xejn ma tidher f'saħħitha wara 10 ġimgħat
fil-ħabs u anki bid-deni

Dan il-ġuri, però, ġie kritikat ferm barra l-pajjiż, l-aktar mill-Unjoni Ewropea u l-Istati Uniti, bħala ġuri motivat politikament.
Il-ġuri jagħmel parti minn kampanja sistematika, mill-President xellugi u pro-Russu Viktor Yanukoviċ, ta' persekuzzjoni tal-oppożizzjoni lejn twaqqif ta' sistema awtoritarja simili għal dik ta' Putin fir-Russja. Hu qed jikkonċentra dejjem aktar poter f'idejh, jagħmel minn kollox biex ifixkel u jagħlaq ħalq l-midja ħielsa, u jippersegwita, permezz tal-qrati lill-eks Prim Ministru Timoshenko, bl-iskop ikun li tiġi newtralizzata l-ikbar avversarju politiku tal-gvern.
Infatti f'Awwissu l-imħallef kien bagħat lil Timoshenko fil-ħabs minħabba dak li ssejjaħ 'disprezz lejn il-Qorti', fejn issa ilha magħluqa 10 ġimgħat, u kienet qed tinħareġ biss biex tattendi l-ġuri.
Dan wassal għall-protesti fil-pajjiż u barra l-pajjiż b'uffiċjali tal-UE iwissu lil Yanukoviċ li jekk Timoshenko tiġi kundannata l-ħabs l-Ukrajna ma tibqax tiġi kunsidrata għas-sħubija fl-Unjoni Ewropea.
Stefan Fule, il-Ministru tal-UE responsabbli mit-tkabbir, wara laqgħa privata ta' sagħtejn ma' Yanukoviċ fil-Polonja iddikjara li jekk l-akkużi kontra Timoshenko ma jiġux irtirati, "ir-relazzjonijiet bejn l-UE u l-Ukrajna ma jibqgħux l-istess".
Il-Ministru tal-Affarijiet Barranin Svediż Carl Bildt qal li "Jidher ċar li dan il-ġuri qed isir taħt liġijiet li m'għandhomx lok fl-ebda pajjiż ieħor Ewropew, u m'għandux ikollhom f'pajjiż li qed jaspira li jissieħeb fl-UE."
Waqt li kien qed jieħu sehem fl-Eastern Partnership Summit fil-Polonja l-ġimgħa l-oħra Yanukoviċ ġie kwotat li qal lill-mexxejja tal-UE li ħadu sehem li l-gvern tiegħu lest jaċċetta emendi mressqa mill-oppożizzjoni għal-liġi biex Timoshenko tinħeles, basta hi "tammetti pubblikament l-iżbalji tagħha u "tħallas għat-telf li sofriet il-kumpanija statali Naftogaz", li jlaħħqu mal-$200 Miljun.
Din hi ħaġa li Timoshenko lanqas biss qed tikkunsidraha, u fl-aħħar diskors tagħha fl-awla imballata b'ġurnalisti, diplomatiċi barranin u partitarji, baqgħet tinsisti li hi innoċenti u akkużat lil Yanukovich b'linċaġġ biex jeħles minn avversarju politiku qawwi.
L-avukati tagħha qed isostnu li ħadd m'għandu jiffaċċja akkużi bħal dawn fuq deċiżjonijiet jew azzjoni politika u li Timoshenko ma wettqet l-ebda delitt jew offiża. Huma għamluha ċara wkoll li mhux se jaċċettaw sentenza ta' ħtija, anki jekk tiġi rranġata l-liġi biex Timoshenko ma teħilx ħabs, imma mbagħad ma tkunx tista tkompli tieħu sehem fil-politika, kif jista' jagħti l-każ li jsir biex Yanukovich isalva wiċċu quddiem il-Punent.
Sadattant dawn qalu wkoll li jinsabu nkwetati ferm dwar saħħet Timoshenko fil-ħabs fejn tinsab f'ċella li hemm ħajt biss jifridha mill-infermerija li fiha hemm ħabsin b'fażi attiva tat-tuberkolożi. Kellha wkoll deni għoli, mingħajr għajnuna medika, għax ma ħallewhix, kif għandha dritt, tara speċjalisti tal-fiduċja tagħha, għax ma tridx li jinviżtawha t-tobba tal-isptar.