Vjolenza u Abbużi fi Tripli (3)

IL-ĠENITURI TA' OBEIDI JGIDDBU LIR-REĠIM

Il-ġenituri ta' Eman  al-Obeidi li nhar is-Sibt ma tħallitx tirrakkonta lill-ġurnalisti barranin magħluqa f'lukanda fi Tripli  kif kienet ġiet stuprata minn suldati tar-reġim ta' Gaddafi, u reġġħet ġiet arrestata (mingħajr mhux magħruf fejn tinstab u x'sar minnha) giddbu dak li qal kelliem għar-reġim, Mussad Ibraħim, dwarha u dwarhom.
Aisha Aħmed, omm Iman, iddikjarat li għalihom binthom hija eroj. "Jiena kburija biha", qalet, waqt li ddeskriviet lil bintha bħala studenta fil-liġi fi Tripli.

Dimostrazzjoni favur Iman al-Obeidi f'Bengażi

Kelliem għall-gvern kien akkuża il Eman li kienet prostituta, omm divorzjata, u li l-istupru seħħ meta s-suldati ppruvaw isakkruha u sawwtuha wkoll, u li qed issir inkjesta dwar il-każ.
Il-familja ta' Eman, li jgħixu f'Tobruk, giddbu dawn l-akkużi, u missierha Atiq Saleħ al-Obeidi qal li l-awtoritajiet kienu ċemplulhom fit-3 ta' filgħodu biex jinsistu magħhom li jikkonvinċu lill-binthom li jekk tirtira dak li qalet, kienu se jagħtuha ħafna flus u dar ġdida.
Naturalment il-familja tagħha m'aċċettawx u Eman, li għandha 26 sena, qaltilhom li tippreferi tmut milli tigdeb dwar dak li sofriet.

Sadattant dawn ma setgħux jikkonfermaw jekk huwiex veru li, dak li qal Ibraħim, li Eman kienet inħelset u li qiegħda għand oħtha fi Tripli.

Vjolenza u Abbużi fi Tripli (2)

X'SAR MINNHA EMAN AL-OBEIDI? X'QED JISTENNEW AKTAR?

Kienu ħafna li l-bieraħ baqgħu impressjonati bil-filmati (li ġibt jiena wkoll hawnhekk) ta' Eman al-Obeidi, mara mbikkma li ppruvat tiddeskrivi dak li għaddiet minnu  tul jumejn li nżammet arrestata u interrogata mill-pulizija sigrieta ta' Gaddafi.
Ilum qed inġib filmat ieħor, din id-darba tas-CNN bil-kummenti tal-ġurnalisti li kienu preżenti.
Imma l-mistoqsija tiġi waħedha: X'qed jistennew iżjed – minn ta' quddiemnett l-Amerikani, anzi l-President tagħhom Obama – u l-pajjiżi tal-Punent li għadhom qed jiddubitaw x'jaqblilhom jagħmlu, biex jgħaqqdu s-servizzi ta' intelliġenza (aktar milli l-armati)  tagħhom flimkien, u permezz ta' operazzjoni 'kirurġika' li żgur kapaċi jwettqu, jeħilsu lill-poplu Libjan minn dan ir-reġim feroċi?
Li dan il-miġnun Gaddafi jkompli  jibdel Tripli f'ħabs tal-konċentrament bil-fuq minn żewġ miljun ruħ !!
X'QED TISTENNA IN-NAZZJONIJIET UNITI BIEX FL-AĦĦAR TISWA' GĦAL XI ĦAĠA???

X'SAR MINNHA EMAN AL-OBEIDI/ TGĦID GĦAD NERĠĦU NARAWHA ĦAJJA ?!?

Vjolenza u Abbużi fi Tripli

IMSAWWTA U STUPRATA GĦAX MINN BENGAŻI

Mara minn Bengażi wara li ġiet arrestata f'checkpoint fi Tripli minn suldati ta' Gaddafi, nżammet arrestata hemmhekk għal jumejn, fejn rabtuha, kellmuha ħażin, sawwtuha, urinawh fuqha u umlijawha, minbarra li madwar 15-il suldat abbużaw minnha., wkoll,
Wara li tellquha Eman al-Obadi kellha l-kuraġġ tibqà sejra mill-ewwel fil-Lukanda Rixos fejn hemm miġbura, anzi magħluqa, il-ġurnalisti barranin, u bdiet tirrakkontalhom dak li għaddiet minnu taħt in-nies tar-reġim.
Imbikkma Obaidi leħqet wriet is-sinjali tas-swat fuq wiċċha, daharha riġlejha u l-parti ta' fuq ta' kuxtejha,  minbarra l-marki tal-manetti fuq idejha u l-għekiesi, iżda ma damux ma tfaċċaw in-nies tas-sigurtà tal-lukanda u pulizija sigrieta li wara li mbuttaw u attakkaw lill-ġurnalisti li ppruvaw jiddefenduha (l-ewwel filmat), kaxkruha 'l barra mil-lukanda u xeħtuha f'karrozza bajda, b'Obaidi tgħajjat li se jsakkruha fil-ħabs, filwaqt li l-pulizija ta' Gaddafi qalu li se jieħduha fi sptar għax kienet fis-sakra u għandha "problemi mentali".
Araw ż-żewġ filmati  t'hawn taħt, wieħed ta' Channel 4 u l-ieħor, itwal, ta' Sky News:

 

Pass Ieħor lejn Libja Libera

JITWAQQAF GVERN TRANSITORJU U JINĦATAR PRIM MINISTRU

Maħmud Ġibril magħżul Prim Ministru
temporanju mill-Gvern Transitorju Libjan

Wara li dan l-aħħar il-ġellieda għall-ħelsien fil-Libja waqqfu Kunsill Nazzjonali Transitorju sabiex jorganizzaw l-oppożizzjoni ċivili (mhux militari biss) kontra r-reġim ta' Gaddafi, illum tħabbar li dan il-kunsill se jibda jissejjaħ "Gvern Transitorju" u li ħatru lil Maħmud Ġibril bħala Prim Ministru temporanju tal-Libja Libera.
Ġibril s'issa kien responsabbli għar-relazzjonijiet barranin tal-Kunsill, u fil-fatt l-ġimgħa l-oħra ltaqa' mal-President Franċiż Sarkozy li kkonvinċih jirrikonoxxi l-Kunsill bħala li jirrappreżenta lil Libja.

Kelliem għall-gvern provviżorju qal li waqqfu dan il-gvern, għax filwaqt li l-Kunsill kien korp leġislattiv, jeħtieġilhom korp esekuttiv biex jieħu l-kontroll temporanju tat-territorju liberat u jipprovdi l-amministrazzjoni.

Sadattant, wara tlett ijiem skiet, tfaċċa Gaddafi li kellem ċorma ta' partitarji tiegħu minn bini fil-fortizza-palazz tiegħu f'Bieb al-Ażiżija li kien ġie bumbardjat fis-Snin Tmemin mill-qawwa tal-ajru Amerikana.
Hu rrepeta li se joħroġ rebbieħ u appella lill-armati Islamisti (terroristi) biex  jingħaqdu miegħu kontra l-attakki faxxisti tal-"Kruċjati", kif hu issa qed isejjaħ lill-qawwiet tal-koalizzjoni tal-Alleati. Huwa magħruf li Gaddafi mhux qed jogħqod aktar fil-palazz-fortizza tiegħu, iżda fi bliet differenti fil-lbiċ tal-pajjiż, fosthom dik ta' Għadamis fuq il-fruntiera ma' Tuneż u l-Alġerija.
Il-qawwiet Alleati llum bdew jattakkaw lill-armata ta' Gaddafi li kienet qed tassedja l-bliet ta' Misrata, Aġdabija u Żintan li ntrebħu mill-ġellieda għall-ħelsien.
Bħalissa fil-Pjazza tal-Bidla f'Bengażi quddiem il-bini tal-gvern transitorju, qed issir dimostrazzjoni kbira ta' ringrazzjament lill-pajjiżi tal-koalizzjoni li qed jgħinuhom fir-rivoluzzjoni kontra r-reġim ta'  Gaddafi, hekk kif l-Alleati ħabbru li l-qawwa tal-ajru ta' Gaddafi ma tistax tintuza aktar kontrihom.

RAPPORTI LI GADDAFI DABBAR RASU

Rapporti li bdew ħerġin il-lejla minn Dubai, fl-Emirati Għarab Magħquda, qed jgħidu li d-dittatur Gaddafi m'għadux aktar fi Tripli fil-palazz-Fortizza tiegħu f'Bieb al Ażiżia, iżda jinsab fil-belt ta' Ghadamis fuq il-fruntiera ma' Tuneż.

Dan skond is-sit tal-moviment taż-żgħażagħ Libjani "17 ta' Frar" li qed jikkwota lis-sit ta' ekonomista Għarbi-Awstrjak, Iyad-elBaghdadi, li jgħix f'Dubai, iżda li jgħid li għandu ħafna kuntatti fuq l-internet fi Tripli.
Dan ikompli jgħid li dawn is-sorsi tiegħu qalulu wkoll li fid-dar ta' wieħed mill-uffiċjali tiegħu, Baxir Saleh, ma' Gaddafi m'hemmx membri tal-familja tiegħu.
Dawn x'aktarx jinsabu f'Sabha, flimkien mal-kmand ta' Gaddafi.
Rapporti oħra jgħidu li filwaqt li iben Gaddafi, Khamis inqatel, ibnu l-ieħor jinsab għall-kura minħabba ħruq serju li ġarrab, mhux magħruf jekk huwiex kawża ta' ġlied jew inkella l-attakki mill-ajru tal-qawwiet tal-ajru tal-koalizzjoni internazzjonali.
Meta staqsew lil elBaghdadi minn fejn qed iġib din l-informazzjoni, hu sempliċiment wieġeb hekk:
"Dawk ta' madwaru (Gaddafi) jafu li meta l-vapur qed jegħreq, u qed jippruvaw idabbru rashom, f'dan il-proċess tibda ħierġa l-informazzjoni!"
Jiena hawn hekk qiegħed sempliċiment nirrepeti dawn ir-rapporti, u, naturalment, m'għandi l-ebda mod nikkonfermahom jew le.

Fl-Aħħar Bdew!

JETS FRANĊIŻI BDEW JGĦASSU FUQ BENGAŻI

Ajruplani tal-gwerra Franċiżi tat-tip Rafale għal ħabta tat-3.15 ġew rappurtati li diġà qed jgħassu fl-ajru tal-belt ta' Bengażi u wkoll fuq it-territorju kollu tal-Libja.
Dawn huma l-ewwel qawwiet tal-ajru tal-Alleati li intervjena wara li l-mexxejja tagħhom ltaqgħu f'Parigi, u li jinkludu dawk fil-Kunsill tas-Sigurtà, u l-pajjiżi tan-Nazzjonijiet Uniti fil-qawwa ta' intervent militari li tinkludi wkoll pajjiżi Għarab, fosthom il-Qatar, il-Marokk, il-Ġordan u  l-Għarabja Sawdita.
Rapporti oħra jgħidu li t-truppi ta' Gaddafi bdew jirtiraw minn madwar Bengażi.
Il-periklu kien li dawn kienu jilħqu jidħlu fil-belt, u b'hekk kien ikun diffiċli li l-qawwiet Alleati jkunu jistgħu jattakkawhom mingħajr il-periklu li jinqatlu wkoll ċittadini innoċenti.
Filwaqt li s'issa ma jidhirx li kien hemm sparar, mal-Franċiżi fis-sigħat li ġejjin mistennija jingħaqdu wkoll ajruplani tal-gwerra Ingliżi, Taljani u Amerikani.

BDEW JISPARAW UKOLL !

Il-Ministeru tal-Affarijiet Barranin ħabbar li l-jets Franċiżi sparaw l-ewwel tiri kontra vettura tal-armata ta' Gaddafi fil-5.45 pm. Ma nagħtawx aktar dettalji.

X'Qed Jistennew ??!!

GADDAFI JIBDA JIBBUMBARDJA BENGAŻI

Il-Libjani jinsabu rrabjati ghax qed jistaqsu x'qed jistennew l-qawwiet militari f'isem in-Nazzjonijiet Uniti biex jattakkaw lil dawk tar-reġim ta' Gaddafi, wara li dalgħodu dawn bdew l-attakki fuq il-belt ta' Bengażi.

It-truppi ta' Gaddafi qed jippruvaw jidħlu mill-punent tal-belt. 

Sadattant xi osservaturi qed jissuspettaw li dan jistà juri wkoll li hemm xi firda fi ħdan l-amministrazzjoni, bejn dawk li jridu veru jwaqqfu l-ġlied u oħrajn li jridu jkompli jisfidaw lin-Nazzjonijiet Uniti.    

Il-"Waqfien mill-Ġlied" minn Gaddafi

IL-GVERN LIBJAN TALAB LIL MALTA TIKKONTROLLA

Minkejja li wara nofsinhar il-Ministru tal-Affarijiet Barranin Libjan ħabbar li kien waqqaf l-operazzjonijet militari tiegħu skond ir-riżoluzzjoni tal-bieraħ tal-Kunsill tas-Sigurtà tan-NU, gvernijiet oħra wrew xettiċiżmu kbir kemm dan kien se jżommu, u fil-fatt l-oppożiżżjoni Libjana qalet li l-attakki fuq il-bliet ta' Misrata kienu għadhom għaddejjin u li l-qawwiet ta' Gaddafi kienu għadhom qed javvanzaw lejn Bengażi.
Iżda d-deputat Ministru tal-Affarijiet Barranin Libjan, Kalid Kaim – l-istess wieħed li l-bieraħ bil-lejl ukoll kien ħabbar li l-gvern aċċetta l-waqfien mill-ġlied, fl-istess waqt li dan kien għadu qed jattakka l-istess Misrata – sostna li l-preżenza tat-truppi ta' Gaddafi barra l-belt ta' Bengażi, ma jiksrux il-waqfien mill-ġlied.
Dan wara li kemm l-President Amerikan Obama, l-Prim Ministru Ingliż Cameron, kif ukoll dak Malti Lawrence Gonzi, qed jinsistu li Gaddafi għandu jirtira t-truppi tiegħu minn barra Bengażi, u mill-bliet ta' Ajdabiġah, Misrata u Żawijah.
Waqt il-konferenza stampa Kaim qal li l-waqfien mill-ġlied li ddikjaraw kien "kredibbli, reali u validu", u  ħabbar li l-gvern tiegħu kien stieden osservaturi minn Malta, iċ-Ċina, it-Turkija u l-Ġermanja biex imorru l-Libja mill-aktar fis ħalli jikkonfermaw u jikkontrollaw li veru hemm dan il-waqfien mill-ġlied.
Il-gvern Malti tard il-lejla qal li kien qed jeżamina din it-talba, "fil-kuntest tal-implimentazzjoni sħiħa tar-riżoluzzjonijiet tan-NU".

In-N.U. Tivvota Favur Libja Libera

F L - A Ħ Ħ A R   I D D E Ċ I D E W  !!

Hekk kif proprju llum il-Libjani daħlu fit-tieni xahar tal-ġlieda għall-libertà ta' pajjiżhom, fil-11.25pm tħabbar li l-Kunsill tas-Sigurtà tan-Nazzjonijiet Uniti ivvota favur Riżoluzzjoni li mhux biss tawtorizza n-No-Fly Zone fuq il-Libja, iżda wkoll "il-miżuri kollha neċessarji" biex titħares il-popolazzjoni Libjana minn aktar attakki tal-qawwiet armati tar-reġim tad-dittatur Gaddafi.
Mill-15-il membru tal-Kunsill tas-Sigurtà, 10 ivvutaw favur ir-Riżoluzzjoni 1973/2011; kontra ma vvota ħadd, filwaqt li 5 astjenew. Dawn kienu, kif kien mistenni, ir-Russja, iċ-Ċina, il-Ġermanja, Brażil u l-Indja.
Issa d-dinja kollha qed tistenna l-ewwel azzjoni militari, li skond Franza, li flimkien mar-Renju Unit u l-Libanu, kienu l-aktar li qed jinsistu għall-azzjoni,  din tistà tibda sseħħ fi żmien anki siegħa.
L-Italja diġà ħabbret li se tpoġġi għad-dispożizzjoni tal-qawwiet tan-NU il-bażi tal-ajru f'Sigonella, u anki tiftaħ il-portijiet tagħha għas-Sitt Flotta Amerikana.
Tajjeb infakkar li l-Lega Għarbija wkoll insistiet għal No-Fly Zone kontra r-reġim ta' Gaddafi, u ssemmew żewġ pajjiżi partikulari, minbarra l-Libanu, l-Emirati Għarab Magħquda u l-Qatar, li lesti joffru l-qawwiet militari tagħhom lill-qawwiet tan-NU. Din tkun mossa importanti 'psikoloġika' biex ma jidhrux li huma biss pajjiżi tal-Punent li "qed jindaħlu" militarment f'pajjiż Għarbi.
F'konferenza stampa li ta d-Deputat Ministru tal-Affarijiet Barranin Libjan Khalid Kaim siegħa biss wara, dan qal li se jassiguraw lin-NU u lid-dinja li huma għandhom għall-qalbhom lill-poplu Libjan u l-indipendenza u l-għaqda tal-pajjiż, li lesti jaċċettaw it-talba tan-NU għall-waqfien mill-ġlied.
Meta iżda, ġie mistoqsi jekk Bengażi hix se tkompli tiġi attakkata,  Kaim wieġeb li dik ħaġa li jrid jiddeċidiha l-kmand militari.

Folol kbar jifirħu fil-Pjazza tal-Bidla f'Bengażi, hekk kif tħabbar li għaddiet ir-Riżoluzzjoni favur in-No-Fly Zone u
anki azzjoni militari kontra l-qawwiet tar-reġim ta' Gaddafi biex ma jitħallix jibqà jimmassakra lill-poplu

Gaddafi Mhuwiex f'Sensieħ

JEKK IN-NATO JATTAKKAWĦ 
          JINGĦAQAD MA' AL QAJDA!!!

Jekk kien hemm bżonn ta' xi prova oħra ta' kemm id-dittatur Gaddafi mhuwiex normali, din ta llum waqt intervista man-network Taljan Mediaset.
Meta kien qed jiġi intervistat, taħt is-solita tinda, minn Fausto Biloslavo tal-Mediaset għat-TGCom u dan staqsieħ jekk jibżax li jiġrilu bħal Saddam Ħussejn, hu sempliċiment wieġbu li ma jibżax  mill-mewt.
Qal ukoll li jiddispjaċih għall-atteġġjament tal-ħbieb Ewropej fosthom l-Prim Ministru Taljan Silvio Berlusconi, filwaqt li dwar il-President Framċiż Nicolas Sarkozy, għax dan kien minn ta' quddiemnett favur in-No-Fly Zone u rrikonoxxa lill-ewwel lill-Kunsill Nazzjonali f'Bengażi, lil Sarkozy għajjru li "m'aħniex"!
Mistoqsi minn Biloslavo x'jagħmel jekk fil-fatt tiġi imposta din in-No-Fly Zone, Gaddafi wieġeb li jekk in-Nato u l-Amerikani jatttakkawh, u b'hekk ipoġġuh dahru mal-ħajt, ikollu jingħaqad ma' al Qajda !!!!
Dan wara li xebgħa jgħid li r-ribelli ta' kontrih huma mxewxa u mmexxija mill-istess al Qajda! Imma dan tusta' tgħidlu bniedem f'sensih?!? Povru poplu Libjan jekk tgħaddi tiegħu!

Iwerwru 'l-Ulieda bit-Tibdil fil-Klima

VERU QED NGĦIXU FL-ERA TAL-ISTUPIDI !

Sakemm in-Nazzjonijiet Uniti jiddeċiedu li jiċċaqalqu qabel ikun tard wisq biex il-poplu ġar Libjan tagħna  jeħles mill-ħakma ta' dittatur feroċi li xejn mhu qed jiddejjaq jibbumbardjah bl-ajruplani, ħelikoper u tankijiet, illum se nikkummenta fuq aħbar li – f'nofs din il-kriżi internazzjonali, inqas minn 100 kilometru biss bogħod minn xtutna – forsi ftit taw każha.
Qed nirreferi għad-donazzjoni mill-Kummissjoni Għolja Ingliża  ta' suppost dokumentarju drammatiku lill-iskejjel sekondarji u terzjarji kollha f'Malta. Dan jismu The Age of Stupid, u ma setgħux semmew aħjar!
Jirrakkonta dak li jsib bniedem fis-sena 2055: dinja meqruda għal kollox, tort tal-bniedem għax ma semgħax mill-katastrofisti u l-ekoterroristi tal-ambjent li fi żmienna, żmien l-istupidi, mhux qed jaqtgħu qalbhom milli jkomplu jwerwru lill-bniedem, u issa wkoll lill-uliedna Maltin.
Imma l-veri stupidi huma dawk imdaħħla fil-produzzjoni ta' films bħal dawn, li jaħsbu li l-poplu tistà tibqà tittrattah ta' stupidu u tibqà tidħak bih għal dejjem.
Għalhekk ma nistax nifhem kif dan The Age of Stupid nagħta din l-importanza mill-gvern Ingliż, meta, ġustament, gvern Ingliż ieħor ma kienx tħalla jqassam fl-iskejjel tiegħu film ieħor allarmistiku u preġudikat bħal dan, An Inconvenient Truth ta' Al Gore, għax kien joffri opinjoni waħda, qarrieqa, dwar it-tibdil fil-klima jew it-tisħin tal-globu.
The Age of Stupid kien ħareġ fl-2009, ftit qabel il-Konferenza dwar il-Klima li n-Nazzjonijiet Uniti kienet organizzat f'Kopenħagen; konferenza li rriżultat fi fjask kbir, u allura, ovvjament, dan il-film ma kienx laħaq l-iskop tiegħu; li jinfluwenza lill-politiċi u eluf ta' delegati li kienu marru għall-konferenza, u tant, allura, pproduċew gassijiet CO2!
L-istess qed tagħmel Franny Armstrong, ir-reġista ta' dan il-film, bil-vjaġġi tagħha mad-dinja kollha biex tippromwovih!
Dan fil-fatt mhu dokumentarju xejn u huwa diżonest mill-bidu tiegħu, għax appuntu mhuwiex dokumentarju. Huwa film fantaxjentifiku minn dawk maħduma biex iwerwru, li bħala premessa għandu dik li huwa l-bniedem li qed jikkawża tibdil fil-klima, meta dan mhux ippruvat biżżejjed xjentifikament u mhux veru li hemm kunsens dwar dan.
Perikoluż, minbarra li ipokritu, huwa l-messaġġ li biex dan it-tibdil jieqaf, allura l-pajjiżi li qed jiżviluppaw ma jitħallewx jiżviluppaw, jibqgħu jgħixu fil-faqar ta' qabel l-era industrjali, u minflok nippromwovu l-imtieħen li spiċċa żmienhom mijiet ta' snin ilu! U dan isejħulu progress!
Imbagħad huwa veru fi pjaneta stupida li xi ħadd jipproduċi film li jwissi li "apparti li wieħed jikkawża ħruq fil-foresti, li wieħed jittajjar bl-ajruplan huwa l-ikbar delitt li l-bniedem jista' iwettaq biex ibiddel il-klima" – u mbagħad, kif ktibt, jittajjar mad-dinja kollha biex jagħmel pubbliċità lill-istess film!
Biex tkun kostanti u kredibbli Armstrong missha tivvjaġġa fuq frejgatina jew xini bl-imqadef, u fuq karrijiet miġbuda minn żwiemel; imma bilħaqq lanqas dan aħjar ma tagħmel, għax iż-zwiemel u l-bhejjem iħammġu u jniġġsu l-ambjent bil-bżonnijiet naturali tagħna ...bħall-bniedem ukoll, bilħaqq!
Iżda apparti l-battuti – din tal-indotrinazzjoni ta' wliedna (għax mhi xejn aktar minn hekk) hija serja. Tifhmuniex ħażin.Bħalma ktibt drabi oħra, jiena m'inhix kontra li jinżamm ambjent nadif u san, jew miżuri bħal riċiklaġġ jew kontra t-tniġġis (xi FTIT dawn dejjem jgħinu), u kontra l-ħela fl-enerġija, speċjalment fil-każ ta'pajjiżna, iżda mhux fl-estremiżmi, fil-fundamentaliżmu (ipokrita) ambjentali.
Imma lill-uliedja, u lill-poplu in ġenerali, m'għandnix inbellgħulu stampa waħda biss. Għalhekk, tajjeb l-awtoritajiet joffru opinjonijiet alternattivi dwar is-suġġett, bħal, appuntu dan id-dokumentarju NOT EVIL, JUST WRONG The True Cost of Global Warming Hysteria ta' Phelim McAleer u Ann McElhinney, li tistgħu taraw billi tniżżluh minn hawnhekk:
files.me.com/jocal/2b0od3

L-Għarab Kontra Gaddafi Wkoll

JITOLBU LIN-NAZZJONIIET UNITI TIMPONI N-NO-FLY ZONE

Il-mexxejja tal-pajjiżi fil-Lega Għarbija
waqt il-konferenza stampa tal-lum

Żvilupp ieħor importanti fil-kamp internazzjonali favur il-ħelsien tal-poplu Libjan biex ifittex jeħles mir-reġim ta' Gaddafi: il-biċċa l-kbira tal-pajjiżi Għarab illum qablu li filwaqt li ddikjaraw li Gaddafi tilef is-sovranità u qed jirrikonoxxu l-Kunsill Nazzjonali Transitorju Temporanju f'Bengażi, kważi b'sorpriża qablu wkoll li jitolbu lin-Nazzjonijiet Uniti jfittxu jimponu n-No-Fly Zone fuq il-qawwa tal-Ajru Libjana, biex joħolqu żoni ta' ħarsien fuq l-aktar postijiet vulnerabbli għall-attakki fuq il-popolazzjoini u l-ġellieda għall-ħelsien Libjani.
Din hija dikjarazzjoni importanti wara li l-bieraħ l-Unjoni Ewropea u l-Istati Uniti nsistew dwar l-importanza tal-approvazzoni tal-pajjiżi Għarab u Afrikani, qabel il-Kunsill tas-Sigurtà jivvota favur li jimponi n-No-Fly Zone, permezz tal-pajjiżi fin-Nato u, preferibbilment anki ta' pajjiżi Għarab, sabiex jipproteġu liċ-ċivili mill-attakki tal-qawwiet ta' Gaddafi.

Żviluppi importanti dwar il-Libja

L-UE U L-AMERIKANI MA JRIDUX JAFU AKTAR B'GADDAFI

Filwaqt li l-ġellieda għall-ħelsien fil-Libja u anki ċittadini komuni qed jiġu massakrati mir-reġim ta' Gaddafi, il-komunità internazzjonali għad ma rnmexxilhix tiftiehem dwar azzjoni konkreta biex jitwaqqaf dan il-masskru, iżda bejn il-bieraħ u l-lum għallinqas ittieħdu pass importanti mill-mexxejja Ewropej u dawk Amerikani: dawn għamluha ċara li għalihom Gaddafi tilef kull dritt leġittimu li jibqà jiggverna fuq il-poplu Libjan. Fi kliem sempliċi u nieqes mit-tidwir tad-diskors tad-diplomazija, dawn ma jridux jafu aktar bih.
Mhux hekk biss: Fi kliem il-President tal-Kummissjoni Ewropea "Il-problema għandha isem wieħed: Gaddafi". Għalhekk dan għandu jfittex iwarrab.
Barra minhekk – wara li l-Parlament Ewropew il-bieraħ approva, b'maġġoranza assoluta, mozzjoni li titlob lill-gvernijiet Ewropej biex jirrikonoxxu l-Kunsill Nazzjonali Transitorju Temporanju mwaqqaf mill-qawwiet tal-Liberazzjoni – il-mexxejja Ewropej, waqt l-istess summit urġenti tal-lum  tal-Kunsill Ewropew, irrikonoxxa l-istess Kunsill Nazzjonali Libjan f'Bengażi bħala interlokutur politiku validu tal-poplu Libjan, filwaqt li għamillu kuraġġ.
Il-President Nicolas Sarkozy sa wasal biex ħabbar li Franza hija l-ewwel pajjiż li qed jagħraf uffiċjalment lill-Kunsill Nazzjonali Libjan bħala l-gvern leġittimu tal-Libja.
Wara dawn id-dikjarazzjonijiet, il-President Amerikan Barak Obama sostna li d-dinja hija obbligata li ma tħallix li jitwettqu massakri bħal dawk li kienu seħħew fir-Rwanda u fil-Bosnja. Għalhekk id-dinja qed tkompli "tissikka l-ingassa m'għonq Gaddafi", bl-iskop ċar li dan ikollu jwarrab.
"Għal dan l-iskop qed inkomplu naħdmu mal-komunità internazzjonali u se nikkonsultaw ukoll mal-oppożizzjoni, hekk kif qed jorganizzaw ruħhom, sabiex inħaffu t-tmiem tar-reġim ...m'aħna qed neskludu l-ebda opzjoni", reġà tenna Obama.

Sadattant il-filosofu-kittieb famuż Franċiż Bernard-Henri Levy il-bieraħ ta intervista interessantissima dwar is-sitwazzjoni fil-Libja – fejn mar biex jara b'għajnejh x'qed jiġri – u x'għandha tagħmel il-komunità internazzjonali, li nirrakkomanda li tarawha (hawn taħt):

Ultimatum lil Gaddafi

ŻMIEN TLETT JIEM BIEX IDABBAR RASU

Il-Kunsill Nazzjonali Transitorju Temporanju llum ta żmien 72 siegħa lid-dittatur Muammar Gaddafi biex jitlaq mil-Libja. Jekk immedjatament, qabel jgħaddu dawn it-tlett ijiem, jagħmel dan, il-Kunsill qed iwiegħed li minn naħa tiegħu ma jieħux passi kontra tiegħu u l-familja tiegħu.
Dan ħabbru Mustafa Abdul Ġalil, li bħalissa qed imexxi l-Kunsill, li qal dan illum wara nofsinhar: 
"F'ġieħ il-ġid u l-imħabba li għandna lejn pajjiżna urejna t-tama tagħna man-negozjaturi indiretti ta' Gaddafi li soluzzjoni setgħet tinstab"
"Il-kundizzjonijiet huma li l-ewwelnett iwaqqaf il-ġlied kollu; it-tieni li Gaddafi jrid jitlaq fi żmien 72 siegħa; it-tielet li aħna nirrinunċjaw għad-dritt tagħna li nieħdu passi kontrih... għall-krimini ta' oppressjoni, persekuzzjoni, massakri, u talli żamm lill-poplu Libjan nieqes mill-ikel".
"Aħna se nistennew u naraw x'se tkun it-tweġiba tar-reġim, iżda mhux aktar miż-żmien li tajnih, filwaqt li dan l-ultimatum mhu se jirrepeti ruħu", iddikjara Ġalil.
Din il-pressjoni kontra d-dittatur Gaddafi tiżdied ma' dik li qed jiffaċċja minn barra l-pajjiż, inkluża wkoll dik mid-dinja Għarbija, fejn qed issir dejjem aktar probabbli l-impożizzjoni ta' "no-fly zone" biex ir-reġim ta' Gaddafi ma jkunx jista' jibqa' jimmassakra lill-poplu Libjan mill-ajru.


Sadattant araw dan il-video li xandret AlJazeera dwar dak li kien iseħħ taħt ir-reġim ta' Gaddafi, u li wassal għar-rivoluzzjoni ta' bħalissa:

Lejn id-Demokrazija fil-Libja

  L-EWWEL LAQGĦA TAL-KUNSILL NAZZJONALI                                                  TRANSITORJU TEMPORANJU  

Il-laqgħa tal-Kunsill Nazzjonali Transitorju Temporanju li saret il-bieraħ
indirizzata minn Mustafà Abdul Ġalil (fin-nofs)

Sal-lum is-sitwazzjoni fil-Libja għadha inċerta għall-aħħar, bil-pajjiż maqsum fi tnejn, iżda bi 80 fil-mija tal-pajjiż f'idejn il-ġellieda għall-ħelsien b'bażi f'Bengażi, u l-kumplament fi Tripli u madwarha f'idejn Gaddafi u l-minoranza li għadhom leali lejh tiegħu; żewġ jew tlett battaljuni, iżda mħarrġa u armati ferm tajjeb, anki b'tankijiet, ħelikopter u ajruplani tal-ġlied, flimkien ma' mijiet ta' merċenarji, b'lealtà waħda: lejn Gaddafi u l-familja tiegħu.
Minkejja dan, u proprju l-bieraħ, f'jum fejn l-attakki tal-qawwiet ta' Gaddafi wettqu l-aktar attakki ħorox fuq bliet maħtufa mill-oppożizzjoni b'numru kbir ta' vittmi, saret l-ewwel laqgħa tal-Kunsill Nazzjonali Transitorju Temporanju mwaqqaf u magħmul mill-ġellieda għall-ħelsien li matulha, quddiem rappreżentanti tal-istampa internazzjonali, iddikjara lilu nnifsiu bħala l-uniku rappreżentant tal-Libja kollha.
Il-konferenza saret fil-bini ewlieni tal-qorti f'Bengażi, li dan l-aħħar fil-fatt serva bħala l-kwartier ġenerali. u l-kunsill huwa magħmul minn 30 membru magħżula mill-kumitati li twaqqfu wara li l-gvern ta' Gaddafi tilef il-kontroll tal-lvant tal-pajjiż.
Il-kunsill, li qed jissejjaħ "il-wiċċ politiku tar-rivoluzzjoni", huwa mmexxi minn Mustafà Abdul Ġalil, eks- Ministru tal-Ġustizzja tal-amministrazzjoni ta' Gaddafi li kien fost l-ewwel personalitajiet li rriżenja u ingħaqad mal-oppożiżżjoni fl--ewwel jiem tal-protesti.
L-istess kunsill waqqaf kumitat ta' kriżi magħmul minn tlett membri.
Omar Ħariri, wieħed mill-uffiċjali li kien ħa sehem fil-kolp ta' stat  ta' Gaddafi fl-1969, iżda li wara l-istess Gaddafi kien xeħtu l-ħabs, ġie inkarigat mit-tmexxija tal-militari li daru kontra r-reġim, u l-organizzazzjoni taċ-ċivili li daħlu voluntiera fl-armata.
Ali Essawi, eks ambaxxatur fl-Indja li rriżenja xahar ilu, ġie nominat kap tal-Affarijiet Barranin, biex jieħu ħsieb il-kuntatti mal-gvernijiet u organizzazzjonijiet barranin.
Maħmud Jebril, li kien imdaħħal fi proġett bejn intellettwali Libjani biex jitwaqqaf stat demokratiku, inħatar kap tal-kumitat ta' kriżi, li għandu l-iskop li li jtejjeb u jħaffef il-proċess ta' deċiżjonijiet li jridu jittieħdu f'sitwazzjoni li qed tinbidel minn ħin għall-ieħor.
Skond d-dikjarazzjoni tat-twaqqif tal-Kunsill dan għandu wkoll jissuperviżjona l-elezzjoni ta' assemblea kostitwenti li trid tfassal kostituzzjoni ġdida li mbagħad għandha titressaq b'referendum popolari; kostituzzjoni li għandha tkun bbażata fuq ir-rieda tal-poplu, il-kisbiet tar-Rivoluzzjoni tas-17 ta' Frar, ir-rispett tad-drittijiet tal-bniedem, is-separazzjoni tas-setgħat, ġudikatura indipendenti, u t-twaqqif ta' istituzzjonijet nazzjonali li jipprovdu parteċipazzjoni wiesgħa u pluralistika, it-transizzjoni paċifika tal-awtorità u d-dritt ta' tappreżentanza għal kull settur tas-soċjetà Libika.
Kull belt u raħal li huma jew jispiċċaw taħt il-kontroll tal-qawwiet tal-ħelsien, qed jingħataw ħames siġġijiet f'dan il-kunsill nazzjonali, iżda l-ismijiet ta' uħud mill-membri qed jinżammu sigrieti biex ma jiġux mhedda l-familjari tagħhom f'arji li għadhom maħkuma minn Gaddafi. Mill-inqas ħames siġġijiet jridu jkunu riservati għaż-żgħażagħ.
F'Bengażi twaqqaf kumitat ieħor ta' 15-il membru magħmul minn avukati, mħallfin u persuni lokali prominenti u rispettati, sabiex jipprovdu l-amministrazzjoini ċivika fil-belt, f'dawk li huma sigurtà, saħħa, edukazzjoni, banek, finanzi u reliġjon.
Residenti organizzaw ruħhom biex jidderieġu t-traffiku u jiġbru l-iskart, filwaqt li beda jiġi pubblikat ġurnal u fetħu żewġ stazzjonijiet tar-radju.
Kumitati simili qed jitwaqqfu fil-bliet u rħula li qed jaqgħu taħt il-kontroll tar-ribelli.
Wara li faqqgħet ir-rivoluzzjoni, r-reġim qered l-infrastruttura, u qed ikollha terġà tinbena mill-ġdid soċjetà ċivili u l-bażi ta' stat.
Sadattant, dalgħodu Abdul Ġalil ddikjara li qed jistennew għarfien imminenti formali minn diversi pajjiżi Ewropej u Għarab,  u li l-qawwiet tal-ħelsien, magħmula minn eks militari tar-reġim se javvanzaw lejn il-belt strateġika Mediterranja ta' Sirte (fejn kien twieled Gaddafi), biex aktar tard jerħula lejn Tripli.