Ir-Rewwixta kontra d-Dittatur Gaddafi

LEJN BATTALJA DEĊIŻIVA FI TRIPLI ?

Wieħed mill-ħafna ritratti tad-dittatur Gaddafi li nħarqu
mill-bidu tar-rewwwixta tal-poplu fil-15 ta'  Frar

L-aħħar żviluppi dwar ir-rewwixta tal-poplu kontra l-ħakma tirannika ta' Muammar Gaddafi juru li llum minn Bengażi, iċ-Ċirenajka, u bliet u rħula oħra li jwasslu lejn il-kapitali Tripli beda marċ immexxi mill-ikbar tribù Libjana, il-Warfalla bl-iskop li jilliberaw il-kapitali u jaħtfu jew joqtlu lil Gaddafi, ħalli jwaqqfu l-massakru li dan qed iwettaq kontra l-poplu.
Mill-banda l-oħra, bi tħejjija għal din il-battalja li aktar ma jgħaddi l-ħin aktar qed tidher imminenti,  eluf ta' merċenarji, il-biċċa kbira minnhom Afrikani, u partitarji armati ta' Gaddafi qed jaslu wkoll fi Tripli f'tentattiv iddisprat ta' Gaddafi biex iżomm il-kontroll tal-kapitali taħt idejh, hekk kif dejjem  aktar qed jitlef partijiet mil-Libja.
Gaddafi nnifsu jingħad li, flimkien ma' madwar għaxar uffiċjali tas-sigurtà fedelissimi lejh, jinsab barrikat fil-bunker tiegħu taħt l-art fil-barracks qrib Bieb al-Ażiżija, subborg fin-naħa t'isfel ta' Tripli, minn fejn, skond il-President tal-Comunità del Mondo Arabo in Italia (Comai) Foad Aodi, qed jipprepara l-ajruplan privat tiegħu biex jaħrab mil-Libja lejn pajjiż Afrikan ħabib tiegħu. Dan wara messaġġ fuq ir-radju li fih hu akkuża lill-al Qajda li tinsab wara r-rewwixti kontra r-reġim tiegħu, filwaqt li wissa' lill-Amerikani kontra xi intervent militari bl-iskuża li jattakkaw lill-istess al Qajda!
Ta' min ifakkar li l-appell li hu għamel it-Tlieta biex dawk li jappoġġjawh l-għada l-Erbgħa (il-bieraħ) joħorġu jiddimostraw favurih jidher li waqa' fuq widjejn torox, għax ma saret l-ebda dimostrazzjoni kolossali fi Tripli favurih.
Li komplew żgur kienu attakki minn merċenarji u membri ta' milizji favurih, b'elmi u uniformijiet sofor, fi djar li dawn jikkunsidraw kontra Gaddafi, fejn jissakkeġġaw, isawtu lill-irġiel u jistupraw lin-nisa.

Żagħżugħ b'tabella bil-mappa
tal-Libja bil-bandiera
Libjana ta' qabel il-kolp
ta' stat ta' Gaddafi, tixxuttja
lid-dittatur

Filwaqt li rapporti minn imkejjen qrib Gaddafi u oħrajn jgħidu li s'issa l-vittmi jgħoddu l-mijiet, mhux aktar minn 300, in-network Għarbi bbażat fl-Emirati Għarab Uniti al Arabija (http://www.alarabiya.net/english) qed isostni li dawk li nqatlu mill-merċenarji u militanti ta' Gaddafi jlaħħħqu l-10,000 u li hemm 'l fuq  minn 50,000 feruti.
Sadattant quddiem dawn il-massakri minn Gaddafi kontra l-poplu Libjan, apparti l-kundanni tan-Nazzjonijiet Uniti, kemm l-Istati Uniti kif ukoll l-Unjoni Ewropea mhux qed jeskludu "opzjonijiet u interventi oħra", apparti sanzjonijiet biex jikkonvinċu lid-dittatur Gaddafi jwaqqaf ir-repressjoni mdemmija kontra x-xewqat leġittimi tal-poplu. Fi żvilupp ieħor tħabbar li l-gvern Svizzeru ffriża l-flus u l-ġid ta' Gaddafi.
Fl-aħħarnett qed joħroġ ċar ukoll li kontra dak li ġara f'Tuneż u l-Eġittu fejn l-armata kellha sehem fit-twaqqigħ tar-reġimi Soċjalisti, fil-Libja (fejn Gaddafi ppromwova dak li sejjaħ "Soċjaliżmu Islamiku") qed ikollhom parti importanti l-madwar 20 tribù li hemm fil-pajjiż li sa' ftit żmien ilu Gaddafi kellu kontroll fuqhom, iżda li ssa jidher li l-biċċa kbira minnhom daru kontrih u qed jingħaqdu biex ineħħuh. Saħansitra wieħed mill-piloti li qabżu mill-bomber fi triqtu lejn Bengażi, qabel ikkraxxjawh, għax ma riedux jobdu l-ordni ta' Gaddafi li jattakkaw il-popolazzjoni ta' dik il-belt, huwa mill-istess tribù tad-dittatur, il-Gadħadħfa.

Sħab Iswed fuq l-Eġittu

IRIDU JIBDLU L-PAJJIŻ F'IRAN IEĦOR

Filwaqt li r-rewwixta kontra l-oppressuri Għarab (presidenti u rejjiet) qed dejjem tinxtered, fl-Eġittu bħalissa qed iħejju għal dak li għandu jsir wara li ħelsu minn Mubarak u r-reġim tiegħu, iżda l-ewwel passi li qed jittieħdu ma tantx jippromettu. Dan għax uħud mill-membri tal-kummissjoni li qed tħejji l-emendi għall-kostituzzjoni qed jinkwetaw bis-sħiħ lil dawk li ħasbu li wara t-tirannija, fl-aħħar l-Eġizzjani se jgawdu huma wkoll id-demokrazija u l-libertà bħal ġnus kollha ħielsa.
Għalkemm wieħed mill-punti fundamentali  tar-reviżjoni tal-kostituzzjoni se jkun li kemm in-nisa kif ukoll dawk li mhumiex Musulmani jistgħu jikkontestaw għall-kariga ta' President tar-Repubblika, fl-istess kummissjoni s'issa m'hemmx mara waħda, u l-ġenerali fil-poter bħalissa aċċettaw li fil-kummissjoni jkun hemm wieħed mill-mexxejja tal-Fratellanza Musulmana, Sobhi Saleh.
Dan Saleh hu magħruf minħabba li hu favur l-impożizzjoni ta' liġijiet Talibani, fosthom li jkunu projbiti wiri ta' imħabba fil-pubbliku, bħall-bews!
Barra minhekk bħala president tal-kummissjoni hemm maġistrat anzjan, Tariq al Bishri, meqjus mill-istampa Eġizzjana bħala 'moderat', iżda totalment kontra l-istat ta' Iżrael, u favur l-introduzzjoni tax-Xaria, il-liġi Islamika li tiddaħħal f'kollox, anki ħwejjeġ li f'pajjiżi liberali huma meqjusa strettament sekulari, bħall-kriminalità, il-politika, l-ekonomija, u dawk personali bħas-sesswalità, l-indafa, d-dieta, it-talb u s-sawm.
 Bishri huwa iben Iman, kap ta' al Azhar, u jikkritika ferm  il-"mudell tal-Punent" tas-soċjetà.
Fl-2004 f'intervista mal-ġurnal Al Aħram, faħħar lill-fundatur tal-Ħamas Aħmed Yassin. Iddikjara wkoll li "Kull forma ta' reżistenza, inkluża dik vjolenti,  għandha tiġi wżata kontra Iżrael.
Fil-ktieb tiegħu "The Islamic Law and Positive Law" kien ilmenta mill-fatt li r-reġim Eġizzjan kien "fired il-liġi mir-regolamenti morali" u li l-Eġittu għandu jerġà jibda japplika l-liġi tax-Xaria.
Il-membru l-ieħor tal-kummissjioni Saleħ tlett snin ili ħeġġeġ favur li l-inqas età biex xi ħadd jiżżewweġ titniżżel minn 18 għal 15-il sena! Dan baqa' magħruf l-aktar, però, għall-ġlieda 'qaddisa' tiegħu kontra l-Mużew ta' Lixandra. Tafu għaliex?
"Ma rridux dawk l-istatwi Griegi għarwenin hemm ġew...Din hija belt Islamika f'pajjiż Islamiku", u dawk l-istatwi għandhom jitneħħew għax joffendu l-għajnejn tal-Fratellanza Musulmana!
Meta l-blogger magħruf Eġizzjan Wael Abbas kien qed jikkummenta fuq dawn l-affarijiet u dwar Bishri, kiteb li "Ma teżistix xi ħaġa bħal Islamista moderat".
Fi kliem l-intellettwali ċelebri Svizzeru Tariq Ramadam meta bdiet kampanja favur is-sospensjoni tas-swat bħala kastig għal reati kriminali, Bishri  sejjaħ dik l-inizjattiva "ġuridikament infundata" u "bbażata fuq realtà tal-Punent" li ma tgħoddx għall-pajjiż Islamiku.
Dan biex ma nsemmix li l-ħames mexxej tal-Fratellanza Musulmana, bejn l-1996 u l-2002, fil-ħames volum tas-sensiela "Il-Liġijiet ta' Da'wa", li kien jismu "Il-Ġiħad hija t-Triq", kien kiteb li bħala skop aħħari hemm "il-konkwista globali mill-Islam" u "it-twaqqif mill-ġdid tal-Kalifat (stat globali) Islamiku".
Veru sħab iswed qed jinġabar fuq l-Eġittu, għax ta min ifakkar f'dak li kien qal Itamar Marcus, fundatur u direttur tal-Palestinian Media Watch, li l-Fratellanza Musulmana huma differenti minn al-Qajda biss fit-tattika mhux fl-iskop aħħari.

L-Assedju kontra Berlusconi

ATTENTAT TA' KOLP TA' STAT MINN MĦALLFIN U MEDIA

Ix-Xellug, bl-għajnujna
ta' xi maġistrati preġudikati,
qed jipprova jasal fejn ma
wasalx fil-Parlament – iwaqqgħu
l-gvern imtella' mill-poplu

Jekk kien hemm min – wara li sar jaf li lill-Prim Ministru Taljan jridu jgħadduh ġuri f'April – ħaseb jew għamilha fatta li dan ifisser it-tmiem ta' Silvio Berlusconi jew il-gvern ĊentruLemini tiegħu, sejjer imqarraq għax qed jgħodd il-flieles meta għadhom lanqas biss faqqsu.
Jekk dawn  għandhom ħjiel ta' tfisser demokrazija parlamentari suppost jafu li gvern imtella' b'maġġoranza komda jista' jaqa' biss qabel iż-żmien jekk jirrriżenja hu stess, jew ma jibqagħlux appoġġ biżżejjed fil-parlament. Iżda l-gvern ta' Berlusconi, anki wara t-tradiment ta' Fini u l-kompliċi tiegħu, xorta fadallu maġġoranza li ma' kull vot li jittieħed qed terġà tikber.
Iżda anki kieku l-gvern tiegħu waqà, ma jistax jiġi ffurmat gvern ta' għamla politika differenti  milli l-poplu, l-elettorat kien wera ċar li jrid jiggvernah, fil-każ tal-Italja koalizzjoni ĊentruLeminija, u din fl-Italja ma tistax tiġi ffurmata mingħajr Berlusconi u l-partit tiegħu Popolo della Libertà.
Gvern imtella' mill-poplu jistà jinbidel biss mill-poplu, u l-unika triq f'dak il-każ hija elezzjoni, li kull tbassir li qed isir qed juri li terġà tintrebaħ minn koalizzjoni ĊentruLeminija b'Berlusconi bħala Prim Ministru.
Għalhekk dak li qed nassistu għalih fl-Italja f'dawn l-aħħar xhur m'huwa xejn għajr ATTENTAT TA' KOLP TA' STAT minn minoranza ta' imħallfin u maġistrati Xellugin u sezzjoni tal-Media, Xellugija wkoll, immexxija mill-ġurnal La Repubblica u r-RaiTre.
Il-persekuzzjoni kontra Berlusconi minn dawn it-talin ilha sejra 17-il sena, ċjoè minn meta hu ħareġ għall-politika, u l-poplu dejjem baqà jżiedlu l-voti, għax fl-aħħar hu offrilhom alternattiva kredibbli għal dik li qabel aktar milli demokrazija kienet PARTITOKRAZIJA, fejn il-poplu kien jivvota, iżda l-gvern kien jiġi ffurmat b'manuvri u intriċċi bejn il-partiti, liema gvernijiet għalhekk kienu inevitabilment jaqgħu wara ftit xhur. Ħaġa li kienet isseħħ regolarment tul 'l fuq mill-50 sena ta' dik li kienet magħrufa bħala l-Prima Repubblica.
Issa Berlusconi ġab l-istabbilità li tant ħtieġet l-Italja bl-ewwel amministrazzjoni li damet il-ħames snin sħaħ li l-poplu tella' biex tiggvernaħ. Gvern ĊentruLemini li beda jnaqqas dejjem aktar l-indil tal-istat fil-ħajja taċ-ċittadin, u li għalhekk, ftit inqas minn tlett snin ilu, reġà ivvutalu biex imexxih għal ħames snin oħra, b'dejjem aktar voti, minkejja l-persekuzzjoni u l-assedju ma jaqtgħu xejn ta' minoranza tal-ġudikatura u maġġoranza tal-media preġudikata kontrih.
Meta raw dan kollu, u meta rrealizzaw li anki bit-tradiment ta' Fini b'kollox, ma kienx se jirnexxilhom 'jeħilsu' fil-parlament minn dak li bir-riformi li qed jagħmel qed jolqot l-interessi ta' ċerti oligarkiji, allura bdew jinvestigawh aktar minn ċerti kriminali mafjużi, biex jaraw isibux xi ħaġa fuqiex jaqbdu.
Wara kważi sena ta' għassa u interċettazzjonijiet, ħasbu li sabu fuqiex, u f'April jridu jressquh fuq akkużi ta' abbuż tal-poter u prostituzzjoni tal-minuri!
Nibdew b'din tal-abbuż tal-poter, jew eżattament concussione: li tfisser "abbuż tal-pożizzjoni ta' uffiċjal pubbliku biex iġiegħel lil ħaddieħor jagħti jew iwiegħed lilu, jew lil ħaddieħor f'ismu, flus jew xi ħaġa oħra utli". L-akkuża ssostni li dan wettqu l-Prim Ministru meta ċempel lill-Questura ta' Milan biex minflok iżżomm arrestata lil Karima Mahroug (magħrufa bħala Ruby) mixlija b'serq, titpoġġa taħt il-ħarsien tal-kunsilliera Nicole Minetti, minħabba li t-tfajla kienet qalet li hi Eġizzjana u neputija ta' Mubarak, li dak iż-żmien kien għadu President, u b'hekk jiġi evitat xi inċident diplomatiku. Fuq kollox  l-istess kap tal-Procura, Ostuni, irrepeta kemm-darba li fl-ebda ħin ma ħassu mġiegħel jew mhedded minn Berlusconi – Dak kollox.
Niġu issa għat-tieni akkuża kontra Berlusconi: minn dak li joħroġ mill-istess ruxxmata karti tal-akkuża (22 boxfile!) imkien ma jiġi ppruvat li l-Prim Ministru Taljan kellu x'jaqsam sesswalment ma' tfajliet taħt l-età, jew li organizza xi ċirku ta' prostituzzjoni – Dawn huma l-fatti.
Berlusconi u l-ħbieb imsemmija fl-investigazzjoni-farsa (fosthom Lele Mora, il-ġurnalist veteran Emilio Fede u l-kunsilliera Nicole Minetti) veru kienu jistiednu tfajliet sbieħ għal ikliet u parties privati. Iżda dak kollox. Xejn kontra l-Liġi – Dawn huma l-fatti.
Veru illi li kieku kont jiena fil-pożizzjoni ta' responsabbiltà u delikata ta' Prim Ministru, u naf li l-oppożiżżjoni parlamentari u dik ekstra-parlamentari, qegħdin fuqi bħal seqer, kont nogħqod daqsxejn aktar attent, ħalli ma nagħtihomx porvli biex jippruvaw joqtluni.
Intant dak li qed jippruvaw iwettqu  dawn huwa KOLP TA'  STAT kontra s-sovranità tal-poplu u tal-Parlament, permezz ta' att ta' ġustizzja żbrigattiva, lil hinn mill-proċeduri normali tal-ġustizzja.
Huma DAWN li qed iwettqu skandlu ta' aggressjoni ġudizzjarja frott preġudizzju politiku, antroploġiku u personali kontra l-figura tal-Prim Ministru Taljan u dak li jirrappreżenta;
Huma DAWN li qed jheddu l-istituzzjonijiet demokratiċi billi joħolqu konflitti bejnithom.
Huma DAWN li qed jabbużaw mill-poter.
Iżda mhumiex se 'jeħilsu' daqstant faċilment u malajr minnu, u dan jafuh.
Mhux ta b'xejn li l-uniku kumment li għadda Berlusconi wara li tħabbret id-data li suppost jibda l-ġuri kien li "Mhux qed ninkwieta".
Qabel, u jekk, jibda l-ġuri jrid jiġi deċiż jekk il-każ huwiex kompetenza tal-Procura ta' Milan jew inkella tat-Tribunal tal-Ministri (bħalma qed issostni d-difiża tal-Prim Ministru), li minkejja ismu, mhuwiex magħmul minn xi ministri, iżda minn tlett maġistrati mtella' bix-xorti minn fost il-maġistrati kollha  b'5 snin servizz fil-Qorti tal-Appell fid-distrett fejn seħħew l-allegati ksur tal-liġi.
Barra minhekk, proprju l-bieraħ tħabbar li l-Popolo della Libertà  qed iħejji biex iressaq mozzjoni biex, skond l-artiklu 96 tal-Kostituzzjoni Taljana, "il-Prim Ministru u l-Ministri, anki meta ma jibqgħux f'dik il-kariga, jistgħu jiġu ġudikati għal reati li wettqu fl-eżerċizzju tal-funzjinijiet tagħhom, għall-ġurisdizzjoni ordinarja, basta jkun hemm l-awtorizzazzjoni tas-Senat tar-Repubblika jew il-Kamra tad-Deputati".
Dan ġara qabel, meta fl-2006 Altero Matteoli bħala Ministru kien se jitressaq il-Qorti, iżda l-Camera dei Deputati vvutat kontra li jittieħdu proċeduri kontrih, b'kumbinazzjoni wkoll fuq każ (bħall-akkuża lil Berlusconi) ta' telefonata li l-Ministru kien għamel bħala ministru.
Jekk din il-mozzjoni, kif probabbli, tgħaddi – għax proprju din il-ġimgħa l-gvern ĊentruLemini qed ikompli jkabbar il-maġġoranza (s'issa jinsab bi 320 deputat, meta jkunu biżżejjed 316) – allura l-ġuri ta' Milan jisfaxxa.
Għaliex allura, forsi tistaqsu, dawn l-imħallfin u media Xellugija jibqgħu jinsistu b'dan l-assedju kontra l-maġġoranza, meta jafu li dan kollu jista' jinfaqa' bħal bużżieqa tas-sapun?

Għax li jinteressahom ukoll huwa li rnexxilhom iħammġu lil Berlusconi, iżda l-oxxenità hija li miegħu ħammġu wkoll l-isem tal-Italja quddiem id-dinja kollha. MIN SE JĦALLAS GĦAL DIN IL-ĦSARA? HADD?!?

Mubarak fl-Aħħar Telaq

IL-FUTUR TAL-LIBERTÀ U D-DEMOKRAZIJA F'IDEJN L-ARMATA

Anki tfal telgħu jiċċelebraw fuq it-tankijiet !

Wara aktar minn ħmistax protesti mill-poplu, f'xi mumenti anki mdemmija, dittatur ieħor Soċjalista Għarbi, wara dak tat-Tuneżija, tneħħa mill-poter fost il-ferħ tal-folol miġbura l-lejla fi Pjazza Tahrir. L-Għajta, is-slogan  prinċipali kienet "Mubarak Irriżenja" u ftit dwar libertà u demokrazija, u dan iġiegħlek titħasseb.
F'Tuneż, wara l-ħarba tad-dittatur Soċjalista l-ieħor Ben Ali, il-qawwiet fl-eks oppożizzjoni mill-ewwel wiegħdu li beħsibhom jibnu d-demokrazija billi jibdew bil-Kostituzzjomi tal-1957 – li kien sfiguraha Burgiba billi daħħal il-presidenza għal għomru – li tinkludi l-prinċipji tal-lajċità, tal-ugwaljanza taċ-ċittadini indipendentement minn reliġjon, sess u razza, bħala sur kontra kull tentattiv li xi ħadd jittanta jagħmel l-liġi Islamika tax-xarija l-ispirazzjoni ta' xi stat klerikali Taliban.
Imma jekk ir-rewwixta f'Tuneż waqqgħet l-istat despota modern, u rrifjutat l-istat teoloġiku medjevali u jrid iżomm distinzjoni bej  il-politiku u r-reliġjuż, fl-Eġittu hemm – minkejja li suppost taħt Mubarak kien illegali - moviment qawwi Islamiku radikali, il-Fratellanza Musulmana, u  minn diversi stħarriġ tal-opinjoni pubblika li sar tant għandu għeruq fost il-poplu illi kieku kellha ssir elezzjoni  tintrebaħ bil-kbir minnhom – udan kien qabel bdiet ir-rewwixta fil-Kajr.
Iżda llum hemm min jemmen li dawn inbidlu, saru moderati, bħall-Kap tas-Sigurtà Amerikan James Clapper li – waqt li l-bieraħ il-President Amerikan Obama għaġġel għamilha fatta li fi ftit minuti Mubarak kien se jirriżenja (il-bieraħ) – quddiem il-Kumitat tas-Senat dwar is-Sigurtà iddikjara li l-Fratellanza Musulmana kienet filp-maġġoranza tagħha sekulari, li ċaħdet il-vjolenza u kkundannat lil al-Qajda bħala perverżjoni tal-Islam, l-ġimgħa l-oħra wieħed mill-mexxejja tagħhom iddikjara li huma jridu li l-Eġittu jsir bħall-Iran, u li l-President Eġizzjan ikun bħal Aħmadineġad, u sena ilu mexxej ieħor qal li jridu jwaqqfu stat Ġiħadista,
Imbagħad ta' min ifakkar li lorganizzazzoni terroristika Ħamas li qed taħkem f'Gaża u qed tibdel dak it-territorju fi stat klerikali Taliban hija fergħa, kustilja tal-Fratellanza Umana!
Fl-Eġittu s'issa, qagħdu attenti li ma jidhrux ħafna, biex appuntu għall-mument ma jgerrxux lil min belagħha li huma nbidlu,  iżda ibqgħu żguri li issa li Mubarak darrab rasu, huma mhux se jdumu ma jerfgħu rashom.
Malli bdew ir-rewwixti fl-Eġittu, Muħammad Ghannem, membru ewlieni tal-Fratellanza waqt li kien qed jitkellem fuq in-network Iranjan Al-Alam li l-poplu Eġizzjan għandu jkun preparat għall-gwerra kontra Iżrael. Dan kollu jġib fix-xejn dik li allura nistgħu nsejħulha inġenwità ta' min hu responsabbli mis-sigurtà tal-Istati Uniti.
Jekk issa li l-Eġizzjani ħelsu minn dittatur Soċjalista, se jkollhom perjodu ta' transizzjoni fejn l-Eġizzjani jiktbu mill-ġdid il-kostituzzjoni, fejn iħejju għal elezzjonijiet ħielsa, b'partiti politiċi varji, stampa u media ħielsa u sistema ġudizzjarja indipendenti, tajjeb. Iżda x'jiġri jekk minflok ikollna perjodu ta' kaos u vojt tal-poter, min se joħroġ rebbieħ? Forsi l-aktar grupp organizzat u dixxiplinat bħalissa fl-Eġittu, apparti l-Armata? Appuntu l-Fratellanza Musulmana?
Quddiem l-inġenwità tal-amministrazzjoni Amerikana ta' Obama (wieħed mill-konsulenti tiegħu, Bruce Riedel, jgħid li huma jistgħu jgħixu ma' gvern tal-Fratellanza Musulmana!) u t-titubanza tal-Punent, jidher li t-tama tal-futur tal-libertà u d-demokrazija fl-Eġittu se tkun, appuntu l-armata (mħarrġa fl-Amerika anki fil-prinċipji liberali u demokratiċi), il-Kunsill Suprem tal-Qawwiet Militari immexxi mill-Feldmarixxal Moħammed Tantawi. Nittamaw!

It-Theddida Nukleari mill-Iran

IL-VIDEO LI R-REĠIM MA JRIDEKX TARA

Il-programm  nukleari Iranjan huwa ta' theddida għall-istabbilità internazzjonali. Iżda kemm qed jieħduha bis-serjetà xierqa din it-theddida l-Istati Uniti u l-Punent b'mod ġenerali?
Kemm hu perikoluż Iran nukleari, anki jekk qatt ma jisplodi din il-bomba? X'inhuma l-prinċipji li jiggwidaw lir-reġim Iranjan? Safejn lesti jaslu dawn biex imexxu l-aġenda tagħhom? Kemm qed jiffinanzjaw lill-aktar organizzazzjonijiet terroristiċi qawwijin fid-dinja?
F'madwar 60 minuta, il-filmat IRANIUM jirraporta dwar id-diversi aspetti li qed jheddu lill-Punent, lid-dinja, permezz ta' filmati rari tal-mexxejja Iranjani, u intervisti ma' 25 politikanti ewlenin, dissidenti Iranjani u esperti  fil-politika tal-Lvant Nofsani, it-terroriżmu u l-proliferazzjoni nukleari.
IRANIUM jurina
• l-iżvilupp tat-theddida nukleari Iranjana, bil-bidu tar-Rivoluzzjoni Islamika tal-1979 u l-ideoloġija li impona l-Mexxej Suprem l-Ajatollaħ Komejni;
• l-użu tat-terrur bħala l-għodda tal-politika tiegħu, bil-bidu fil-ħtif tal-ambaxxata Amerikana f'Tehran, u r-rewwixti fl-Iraq u fl-Afganistan;
• fid-dettal n-natura brutali tar-reġim Iranjan kontra ċ-ċittadini tiegħu, u x-xewqa tal-poplu Iranjan li jerġà jibda jagħmel parti mill-komunità internazzjonali;
• id-diversi xenarji li l-Lvant Nofsani u l-Punent ikollhom jiffaċċjaw kieku l-Iran isir nukleari.
Il-filmat jakkwista ċerta attwalità inkwetanti, bil-periklu reali li l-Eġittu jistà jispiċċa wkoll repubblika Islamika, l-istess bħal, jekk mhux ukoll sottomessa għal dik Iranjana.

Diskors Realistiku ta' David Cameron

IL-MULTIKULTURALIŻMU FALLA FL-INGILTERRA WKOLL

F'diskors waqt il-Konferenza ta' Munich dwar is-Sigurtà, il-Prim Ministru Ingliż David Cameron iddikjara li l-multikulturaliżmu fl-Ingilterra falla. Dan wara diskors simili tal-Kanċillier Ġermaniża Angela Merkel f'Ottubru tas-sena l-oħra liż-żgħażagħ Demokristjani Ġermaniżi (Ara l-post tat-23.10.10).
Id-diskors ta' Cameron, b'dak li eżatt qal, tistgħu tarawh hawn taħt (is-silta dwar il-multikulturaliżmu tibda fit-8 minuta tad-diskors tassew tajjeb u realistiku tal-Prim Ministru Ingliż, li hawn itul xi 18-il minuta :

100 Sena mit-Twelid ta' Ronald Reagan

  

  IRRESTAWRA PAJJIŻU U 

 GĦEN BIEX SALVA D-DINJA

Illum jaħbat il-100 Anniversarju mit-twelid tal-mibki  Ronald Reagan li kien twieled fis-6 ta' Frar, 1911 (u miet fil-5 ta' Ġunju 2004).

L-40 President tal-Istati Uniti (1981-89) kien Repubblikan veru, magħruf għall-anti-Komuniżmu ferventi tiegħu, l-istil personali tiegħu, karatterizzat minn karattru affabbli u ferrieħi li jsaħħrek.

Kellu ħila kbira bħala oratur, tant li kienu jsejħulu "il-Komunikatur Kbir". Il-politika tiegħu ikkontribwit għall-waqgħa tal-Komuiżmu.

"Kellu l-kuraġġ tal-konvinzjoni", kif qal l-eks President George E. Bush, "is-saħħa li tiġi  minn karattru sod, il-grazzja li tiġi mill-umiltà, u l-umoriżmu li jiġi mill-għerf. Ħalla warajh nazzjon li rrestawra u dinja li għen biex salva.

"Maltul is-snin tal-President Reagan, l-Amerika warrbet era ta' firda u dubji. U grazzi għat-tmexxija tiegħu , id-dinja warrbet era ta' biżà u tirannija." kompla Bush.

It-Tibdil fil-Klima

ID-DINJA QED TISĦON ...GĦALHEKK QED TIFFRIŻA !!!

Ma jifilħux jaqgħu iżjed għaż-żufjett: Minn xi snin 'l hawn kull avveniment atmosferiku ftit aktar qawwi minn xi żiffa tar-rebbiegħa jew ħalba xita tal-ħarifa, tarahom jiġru jiddikjarawh bħala effett, prova li d-dinja qed tisħon! B'hekk wasalna fir-ridikolaġni li jsostnu li meta tagħmel kesħa tremenda bħal f'dawn il-jiem, li ffriżat lill-Amerika, wasslet għaċ-ċiklun qawwi fl-Awstralja u kessħet lid-dinja. anki lil Malta, allura dan kollu effett tal-global warming kawżat mill-bniedem!
Skond dawn l-ekokatastrofisti jew terroristi, il-Pol ta' Fuq qed jinħall bis-sħana li qed jipproduċi l-bniedem mill-ħruġ tal-gassijiet serra, tas-CO2. B'hekk naqraw u nisimgħu b'kurrenti kesħin li jitilqu mill-Pol ta' Fuq u jiffriżaw lill-Amerika u l-Ewropa u ċ-ċiklun li ħakem l-Awstralja bħala speċi ta' Armageddon, katastrofi li se teqred lid-dinja u l-umanità ma ddumx!
Veru li ilu mal-50 sena ma tinżel daqshekk borra fuq Chicago, iżda bħalma jiddikjaraw klimatologi tal-affari tagħhom bħat-Taljan Franco Prodi  – (ħu l-politiku Romano Prodi) direttur tal-Istituto di Scienze dell'Atmosfera e del Clima (ISAC-CNR), lecturer fil-fiżika tal-atmosfera fl-università ta' Ferrara u membru tal-kunsill xjentifiku taċ-Ċentru Ewro-Mediterranju dwar it-Tibdil fil-Klima – il-fenomenu jagħmel parti minn "eventi estremi normali", li bħahom seħħew minn dejjem ta' dejjem.
Prodi jkompli billi jwissi li għandna nogħqodu attenti li ma nħalltux il-metereoloġija u l-klima, bħalma spiss qed jiġri. "Biex wieħed  isemmi l-klima ħalli jispjega avveniment meteoroloġiku, dan jistà jagħmlu biss fuq bażi ta' studju ta' mill-inqas għaxar snin, u jiżbalja min jasal għal konklużjonijiet billi jħawwad fenomeni eċċezzjonali waħdanin mat-tibdil fil-klima.
Il-Professur Prodi għamel snin jistudja l-għargħar fl-Ewropa, u sab li  "m'hemmx provi ta' żjieda ta' dawn il-fenomeni f'dawn l-aħħar snin, jew li qed iseħħu aktar spiss". Hemm  min isostni li ċ-ċikluni tropikali qed ikunu aktar qawwijin, iżda anki jekk dan hu hekk, xorta dan ma jistax jingħad li qed iseħħ  minħabba li d-dinja qed tisħon".
Iżda x'qed jiġri fl-East Coast tal-Amerika imblukkata bil-kesħa? Hija veru prova oħra li l-klima qed tiġġennen?
It-tenent kurunell tal-ajronawtika militari Taljana Guido Guidi, li għandu wkoll il-blog tajjeb ferm Climate Monitor, jgħid li l-borra u silġ li qed jiksu t-toroq ta' Chicago huma parti minn "oxxillazzjoni tat-temp kawżati mill-varjabilità interawtunnali. Meta staqsewh jekk din hix in-norma, Guidi wieġeb "Xejn m'hu normali, il-klima u t-temp minn dejjem kienu 'imġienen". Huwa aħna li nippruvaw nidentifikaw x'inhu u x'mhux medju, normali".
Ma nistgħux nitkellmu dwar temp atmosferiku "medju", għax inkunu qed insemmu xi ħaġa li ma teżistix. ħlief f'okkażjonijiet eċċezzjoinali: il-medja hija dejjem ir-riżultat ta' żewġ jew aktar estremi reali. Apparti kollox, ikompli Guidi, "fl-Amerika  din is-sena qed nassistu għal xitwa fin-norma.
Xi ħadd għandu jispjegalna għaliex, meta s-sena l-oħra f'Vancouver ma kienx hemm borra kien tort tal-global warming, u din is-sena, li borra hemm iżżejjed, xorta waħda qed jintqal li tort tal-global warming!"
Il-borra li tinżel bl-abbundanza mhix xi fenomenu straordinarju: "Diversi studji juru li ma kienx hemm varjazzjoni fil-kwantità ta' art miksija bil-borra/silġ matul dawn l-aħħar għaxar snin. Għalhekk huwa diffiċli twaħħal fis-sħana għall-maltemp ta' dil-ġimgħa.
L-istess argumenti jgħodd għall-Awstralja "mgħarrqa" jew aħjar parti minnha milquta miċ-ċiklun Yasi. L-għargħar tax-xahar l-ieħor huwa fenomenu "naturali" kawżat mill-preżenza tan-Niña – it-tkessiħ tal-ilma tal-Oċean Paċifiku kull  bejn 3 u 7 snin.
Lanqas mhu veru li l-oċean qed jisħon minħabba li d-dinja qed tisħon. "M'hemm l-ebda studju li jipprova din it-teorija - kull sena ċ-ċikluni jaslu f'dan il-perjodu", temm jgħid Franco Prodi.

It-Tbassir dwar il-Gvern Taljan

BEJN IL-LANŻIT, IX-XEWQAT U L-FATTI

Bħal f'kull pajjiż b'demokrazija parlamentari
bħall-Italja, huwa l-parlament mhux xi
kumitat tiegħu li jagħti vot deċziv dwar liġi

Meta se tieqaf  ċerta media internazzjonali tagħmel profeziji katastrofiċi dwar il-gvern CentruLemini Taljan li puntwalment ma jseħħux?! Ma jingħaddux d-drabi li fihom bassru li "Il-Gvern ta' Berlusconi fil-Periklu"; "Berlusconi se jkollu jirriżenja"; "Aktar Gwaj għal Berlusconi"; "It-Tmiem tal-Era Berluskonjana"; "Vot Deċiżiv għall-Gvern Taljan"!

U llum erġajna koppi: Dalgħodu kumitat parlamentari magħmul mill-gvern u l-oppożizzjoni ħadet vot fuq liġi li kellha tkompli r-riforma tal-gvern lejn stat Taljan aktar federalizzat kif tixtieq il-Lega Nord. Il-vot spiċċa draw, 15 favur u 15-il vot kontra. Il-Lega Nord ta' Bossi ilha żmien tgħid li jekk ma tgħaddix din ir-riforma, aħjar li allura l-poplu Taljan jintalab jivvota mill-ġdid f'elezzjoni bikrija, ħalli l-gvern ĊentruLemini jerġà jikseb maġġoranza komda bħalma kellha qabel Fini waqqaf partit għalih u miegħu wassal numru ta' deputati joħorġu mill-maġġoranza, u jmorru fl-oppożizzjoni.
Għalhekk il-media internazzjonali anti-Berlusconi għaġġlu jagħmluha fatta li "Bossi kien se joħroġ ukoll mill-gvern" u jkollha ssir elezzjoni bikrija għax il-gvern b'hekk jitlef il-maġġoranza!
Iżda bħalma jaf kull min għandu l-iċken idea ta' kif taħdem sistema parlamentari demokratika, anki f'pajjiżna, ix-xogħol ta' kumitat parlamentari huwa li jiddiskuti liġijiet wara li jħabbarhom il-gvern, bil-ħsieb li tiffaċiltà l-istudju u tħaffef id-dibattitu dwar dik il-liġi, biex forsi anki jintlaħaq ftehim dwarha mal-oppożiżżjoni, qabel din il-liġi titressaq għal aktar dibattitu, u l-votazzjoni fil-parlament. Wara l-istess kumitat iressaq biss l-opinjoni, il-parir tiegħu.
Dan ifisser li l-vot finali fuq liġi jieħdu l-parlament mhux xi kumitat! U dan jgħodd għall-Italja wkoll, u dan huwa eżattament dak li ġara llum.
Fil-fatt il-Kabinett tal-gvern Taljan iltaqa' l-lejla stess u qabel li jkompli bir-riforma fiskali federali li se jressaq għall-firma tal-President tar-Repubblika u wara l-pubblikazzjoni fil-Gazzetta tal-Gvern.
Ta' min jgħid ukoll li l-kummissjoni bħalissa mhix komposta skond il-Kostituzzjoni, għax meta Fini u sħabu ħarġu mill-gvern, ir-rappreżentanti tal-gvern li llum marru ma' Fini, b'hekk spiżżaw kabbru r-rappreżentanza tal-oppożizzjoni fl-istess kummissjoni, u kien għalhekk li l-votazzjoni tal-lum spiċċat b'parità.

Iżda llum kien hemm vot ieħor aktar importanti li minnu l-gvern ĊentruLemini reġà ħareġ rebbieħ u b'maġġoranza assoluta. Fil-fatt l-Camera dei Deputati vvutat favur bi 315 u kontra 298, b'deputat jastjeni, dwar  "il-każ Ruby", biex il-proċeduri legali jkomplu skond il-liġi, li tgħid li l-Procura di Milano m'għandhix dritt tmexxi l-każ hi. B'hekk issa l-koalizzjoni governattiva żdiedet b'deputat ieħor fuq l-aħħar votazzjoni ta' ġimgħa ilu. Dan ifisser li potenzjalment issa l-gvern ĊentruLemini reġà għandu l-maġġoranza assoluta, għax meta ma' dawk it-315 jiżdied il-vot ta' Berlusconi innifsu (li llum ma ħassx li kellu jivvota għax il-każ jolqot lilu direttament) il-maġġoranza titla' għal 316. Dawn huma l-FATTI, ferm bogħod mix-xewqat ta' min għandu lanżit ikbar mill-preżunzjoni tiegħu!