Kumplott kontra Berlusconi

MISTENNI TERREMOT ĠUDIZZJARJU

Tiftakru kemm sar storbju dwar parties u orġi skandalistiċi li suppost seħħew f’waħda mir-residenzi tal-Prim  Ministru Taljan Silvio Berlusconi, u li fiha kienet imdaħħla prostituta magħrufa, Patrizia D’Addario?  Dan l-aħħar ftit bqajna nisimgħu dwar dik l-affari, forsi għax min xerred u ħeġġeġ kemm felaħ induna li dak l-iskandlu ftit li xejn effettwa l-popolarità ta’ Berlusconi fost il-poplu Taljan. Iżda l-istorja ma waqfitx hemm u min ipprova jagħmel il-ħsara  lill-Prim Ministru Taljan u lill-Italja jidher li se jkollu jħallas.

Infatti l-Procura della Repubblica ta’ Bari qed tinvestiga f’segretezza kbira l-każ u r-riżultat jistà  ikun dak li qed jissejjah “terremot ġudizzjarju” li mistenni jolqot mhux biss lid-D’Addario u l-kompliċi tagħha l-imprenditur Gianpaolo Tarantini, l-eks soċju tiegħu Massimiliano Verdoscia, li f’Awwissu spiċċa arrestat fuq traffikar ta’ droga, iżda anki professjonisti, ġurnalisti u, saħansitra politiċi u maġistrati.

Dan ħareġ minn rapport esklussiv li r-rivista popolari Taljana Panorama bdiet tippubblika fil-ħarġa ta’ din il-ġimgħa.

Panorama tgħid li dan  it-terremot ġudizzjarju li se jfaqqa’ minn hawn u ftit ieħor mistenni jheżżeż mill-pedamenti l-kastell li nbena madwar is-suppost rivelazzjonijiet ta’ D’Addario u l-gwida tagħha Tarantini.

Id-D’Addario hija l-persunaġġ ewlieni fil-faxxiklu ġudizzjarju dwar il-każ, li qed jissejjah “Modello 21”.

Naturalment impossibbli jkunu magħrufa d-dettalji kollha tal-inkjesta, iżda xi ħaġa qed toħroġ: Per eżempju li l-Maġistrat  Antonio Laudati, li qed imexxi l-inkjesta, qed jikkonċentra l-aktar fuq r-relazzjoni bejn D’Addario u Tarantini.

Jidher li kien Verdoscia li ppreżentaha lil Tarantini, li D’Addario hija esperta filli tirrekordjka u tiffilmja ‘klijenti’ bi  skop ta’ rikatt, u li “intgħażlet” apposta għal “missjoni” speċifika permezz ta’ Tarantini, kumplott bi skop preċiz: li tiġi kompromessa r-reputazzjoni tal-Prim Ministru Taljan, u jpoġġuh politikament f’diffikultà.

Mill-inkjesta maġisterjali qed joħorġu elementi interessanti dwar kontijiet bankarji f’isimha jew f’isem membri tal-familja tagħha, u ċaqliq ta’ somom kbar ta’ flus, qabel u wara l-intervisti li tat D’Addario lill-istampa u li qajmu l-irwiefen kollha fis-Sajf li għadda. Fosthom Miljun u nofs Ewro li fi Frar 2008 mill-Italja hi stess ħadet fil-kapitali tal-Qatar, Doħa.

Sar stħarriġ ukoll dwar il-vjaġġi tagħha, malli faqqa’ “l-iskandlu sesswali”, fosthom fi Franza, Spanja, Brażil, Gran Brittanja, Ċina u Emirati Għarab, bl-iskop li jimbarazzaw, jirridikolizzaw lil Berlusconi anki fil-kamp internazzjonali, l-aħħar feles  fil-kumplott. Qed jiġu investigati wkoll pagamenti ta’ flus trasferiti barra mill-Italja fuq kontijiet ta’ ċerti imprendituri u politiċi.

Is-sehem tal-istampa, ċerta stampa ukoll ġie mistħarreġ sew minn Laudati u l-maġistrati l-oħra fl-inkjesta maġisterjali.

Iżda min għażilha lil D’Addario? Min kien hemm wara dan il-kumplott?

Tarantini ma jidhirx li kien il-moħħ, iżda biss rota fil-kumplott. Kellu żgur interessi kummerċjali, kuntratti, negozji kbar li kien lest għal kollox biex jakkwistahom, u li ma rnerxxielux, minkejja li indiehes mal-Prim Ministru Berlusconi.

Biex għamel dan kien kera villa qrib dik tiegħu, u beda jorganizza parties biex jiġbidlu l-attenzjoni, fejn jingħad li nefaq mal-5 miljun Ewro, sabiex jibni d-dehra ta’ imprenditur żagħżugħ sinjur u ta’ suċċess.

Min kien jew kienu allura l-puppet masters tal-affari D’Addario? Min kellu interess jimbarazza lill-Prim Ministru u lill-gvern taċ-Ċentru-lemin? Il-loġika tgħidlek li dawn għandhom jinstabu fil-kamp avversarju tal-Popolo della Libertà.

Panorama ikompli jistħarreġ l-ġimgħa d-dieħla.

Immigrazzjoni u Kriminalità fl-Italja

Numru kbir tar-reati kriminali fl-Italja jitwettqu minn immigranti, l-aktar dawk klandestini.
Filwaqt li l-immigrati jagħmlu biss 6 fil-mija tal-popolazzjoni fl-Italja, in-numru ta' reati mwettqa minnhom huwa tassew għoli, bħalma jixhdu dawn iċ-ċifri:


40% tal-istupri
52.9% tas-serq minn djar; 49% tas-serq ta' karrozzi; 33% serq bi vjolenza/armi; 39% serq ieħor; 70% pickpocketing
30% tat-traffikar u produzzjoni ta' droga
24% tad-delitti; attentati ta' qtil 32%, swat 39%
li jseħħu fl-Italja huma mwettqa minn klandestini.
Minn ta'  quddiemnett fil-lista hemm ir-Rumeni (sa' ftit ilu kienu l-Albaniżi), imbagħad, warajhom jiġi l-Marokkini, l-Albaniżi, it-Tuneżini, Peruvjani u l-Ekwadorjani, f'din l-ordni.


Dan it-tagħrif sar magħruf fl-okkażjoni tal-pubblikazzjoni ta' ktieb ġdid ta' Marzio Barbagli bl-isem ta' Immigrazione e Sicurezza in Italia. Għal min diġà qed jaħseb li dan Barbagli huwa xi lemini xenofobu razzista, ta min ikun jaf li huwa xellugi magħruf, lecturer fis-soċjoloġija fl-Università ta' Bologna "il-ħamra".
Barbagli ilu snin twal jistudja l-fenomenu tar-relazzjoni bejn il-kriminalità u l-klandestini, u hu jsostni li dawn faċilment u inevitabilment jaqgħu fix-xibka tal-kriminalità – bħalma nstab kien il-każ dan l-aħħar wara l-inkwiet li nqala bejn l-immigranti u ċ-ċittadini fil-belt ta' Rosarno, f'Calabria – għax minħabba li, appuntu, jkunu  klandestini, ma jistgħux jimpjegaw ruħhom regolarment.
Barbagli jżied ukoll li fil-każi ta' stupri minn klandestini, dawn kienu l-aktar bejnithom stess, u mhux kontra t-Taljani.

"GLOBAL WARMING THE OTHER SIDE"

   Ħabib tiegħi dan l-aħħar bagħtli link għal video qasir iżda interessantissimu li fih John Coleman, espert fit-temp u fundatur ta' The Weather Channel fl-Istati Uniti jwaqqa' l-argumenti ta' dawk li jsostnu li l-bniedem hu responsabbli għat-tibdil fil-klima, li għalihom ifisser it-tisħin tal-globu.

   Coleman mhux qed jaqla' il-miljuni bħal per eżempju, Al Gore bil-kampanja tiegħu ta' twerwir bit-tbassir ta' kull katastrofi kawżata mit-tisħin tal-globu.

   Fi tmien minuti Coleman iwassal dik li tistà titqies fost l-aħjar spjegazzjoni dwar is-suġġett, sempliċi, loġika, skjetta, ċara, u mingħajr il-ħtieġa ta' ħabi jew falsifikar ta' data, bħalma aktar u aktar qed jinkixef li wettqu suppost xjenzjati tal-affari tagħhom (Climategate) li fuqhom qagħdu u fdaw tant politiċi, s'issa.

Arawh u isimgħuh ...u min għadu ma fetaħx għajnejh għandu jibda jbexxaqhom żgur.

Climategate fl-Amerika wkoll

U hawnhekk araw lill-istess John Coleman fuq l-istazzjon ta' San Diego KUSI-NEWS jikxef kif anki fl-Istati Uniti – bħal fl-Ingilterra (fl-East Anglia University) – ukoll sar tbagħbis tad-data biex jiġu akkomodati il-katastrofisti.

Il-Jum Internazzjonali tal-Olokawstu

Illum l-Erbgħa qed jiġi ċelebrat il-Jum Internazzjonali tat-Tifkira tal-Vittmi tal-Olokawstu, skond riżoluzzjoni tan-Nazzjonijiet Uniti approvata unanimament ħames snin ilu.

L-Olokawstu kien il-qtil tal-massa, ġenoċidju sistematiku, tal-Lhud fi żmien ir-reġim Nażista bejn l-1941-45 fl-Ewropa, matul it-Tieni Gwerra Dinjija. Il fuq minn sitt miljun Lhudi Ewropew, kif ukoll membri ta’ gruppi oħra persegwitati, bħal żingari u omosesswali, nqatlu f’kampijiet ta’ konċentrament bħal dak ta’ Auschwitz, fil-Polonja.

Infatti l-ġurnata tas-27 ta’ Jannar intgħażlet għax kien il-jum li fih it-truppi Alleati daħlu f’dan l-ikbar kamp Nażista eżattament 65 sena ilu, fl-1945, fejn sabu biss dawk li ħasbuhom iħirsa, ftit eluf moribondi, u oħrajn imwerwra, li l-iskwadra speċjali Nażista SS ħallew warajhom għax ħasbu li l-ġuħ, l-għatx, il-kesħa u l-mard kienu jeqirduhom xorta waħda, u b’hekk jiffrankaw ix-xogħol li jogħqodu joqtluhom huma bħalma hu kkalkulat li għamlu lil madwar Miljun u nofs oħra f’Auschwitz biss.

Dan għax f’pajjiż Ewropew, li għal żmien twil kien ammirat għall-filosfi u l-mużiċisti magħrufa tiegħu, kien ġie deċiż li miljuni ta’ rġiel, nisa u tfal jiġu gassjati u maħruqa f’fornijiet apposta. L-irmied tagħhom jinstab ukoll midfun f’oqbra fl-Ukrajna, il-Polonja, Litwanja, Belarus u postijiet oħra. Oqbra li l-Lhud kienu jiġu mġiegħla jħaffru huma stess.

Element ewlieni tal-ideoloġija Nażista, jew Nazzjonal-Soċjalista (jiġifieri xellugija u mhux leminija bħalma ġeneralment, b’mod żbaljat jingħad) kien l-anti-Semitiżmu. In-Nażisti kienu jaraw lill-Lhud bħala s-Satana jikkontrolla lill-għedewwa kollha tal-Ġermanja.

Emmnu li l-Lhud kienu qed jippruvaw jisfrattaw, ifixklu l-bini ta’ dik il-ħolma, utopja ta’ ħakma globali Arjana Ġermanika, li f’isimha l-maġġoranza tal-poplu Ġermaniż ġie konvint mill-ħtieġa ta’ ġenoċidji, mill-inqas tlieta: kontra l-Polakki, iż-żingari Rom u l-Lhud.

Ma nkunx qed nesaġera jekk ngħid li t-Tieni Gwerra Dinjija, l-imwiet ta’ għexiren ta’ miljuni, il-qirda ta’ pajjiżi u kulturi, it-tortura u l-mewt ta’ tfal u kbar, kienu kawża in parti tal-mibiegħda enormi kontra l-Lhud.

Qatt m’għandna ninsew li l-utopji jwasslu għad-delitti: utopji radikali universali bħan-Nazzjonal-Soçjaliżmu, il-Komuniżmu, u llum ir-radikali li jappoġġjaw it-terroriżmu Isklamiku globali, li joqtlu radikalment u universalment.

Il-Lhud kienu l-vittmi speċifiċi tal-ġenoċidju. Iżda l-implikazzjonijiet huma universali, għax min jaf min jistgħu kunu l-Lhud darb’oħra.

Id-differenza bejn l-Olokawstu u, per eżempju l-ġenoċidju f’Darfur, fis-Sudan hija li tal-ewwel kien twettaq fil-qalba taċ-ċiviltà Ewropea u dinjija. Filwaqt li hemm elementi komuni li jiġu ripetuti f’kull ġenoċidju, hemm oħrajn fl-Olokawstu li ma ssibhomx fil-ġenoċidji li twettqu qablu.

In-Nażisti ippruvaw isibu, jirreġistraw, jimmarkaw, jumiljaw, jisirqu, jikkallzraw u joqtlu kull persuna li kellha sa’ tlieta jew erba’ nanniet jew bużnanniet Lhud, sempliċiment għax kienu Lhud. Dan fl-aħħarnett kellu jsir kullimkien fid-dinja, sabiex, għall-ewwel darba  fl-istorja, kien hemm tentattiv ta’ ġenoċidju universali.

Qatt ma ġrat xi ħaġa bħall-Olokawstu qabel, u konna nittamaw li dak ma jsirx lanqas preċedent. Iżda għarralna. Sar preċedent, għax wara seħħew ġenoċidji oħra. Xi jfisser dan għall-umanità? Kif setgħa jiġri dan minkejja li llum għandna n-Nazzjonijiet Uniti, li proprju wieħed mill-iskopijiet tagħha huwa li ma jseħħux ġenoċidji?

Hemm xi possibiltà li l-bniedem ma jħallix jitwettqu ġenoċidji billi jitgħallem minn dak li sofrew il-Lhud? Il-bniedem għandu l-istint li joqtol, u aħna l-uniçi mammali li noqtlu lil dawk bħalna fi kwantità kbira. Frott il-mibegħda lkoll nistgħu nsiru qattiela tal-massa. Iżda jekk hu hekk, hemm xi mod realistiku kif nevitaw il-ġenoċidji?

L-Olokawstu li llum qed infakkru l-vittmi tiegħu jista’ jipprovdilna tweġiba. Mill-mijiet ta’ eluf ta’ każi mressqa lilha l-Yad Vashem (Awtorità Lhudija għat-Tifkira tal-Martri u l-Eroj tal-Olokawstu) s’issa onorat b’midalja (ritratt) ‘l fuq minn 22,000 individwi u gruppi msejħa “Virtużi” li salvaw Lhud mid-deportazzjoni f’kampijiet tal-konçentrament Nażisti u mill-mewt.

Dawn jixhdu li hemm il-possibiltà, li bnedmin jissugraw ħajjithom biex isalvaw dik ta’ bnedmin oħra, għalkemm il-każ ta’ Darfur juri kemm tassew dan huwa diffiċli. Iżda t-tama hemm tibqà, basta l-bniedem jibqà jiġi mfakkar, mgħarraf u edukat, biex b’hekk ma jibqax “gallarija” – anki għax wara kollox, għada jista’ imiss lilu, jista’ ikun hu l-“Lhudi”.                                                                                 Dan l-artiklu tiegħi ta’ tifkira kien deher, f’verżjoni itwal, f’In-Nazzjon is-sena l-oħra. 
Sadattant illum l-preġudizzji kontra l-Lhud għadu ħaj daqs 60-70 sena. Dwar dan segwu s-sit Honest Reporting.com f'dan l-indirizz  http://honestreporting.com/

Riħ ġdid tal-bidla fl-Istati Uniti

IT-TIELET TELFA GĦAL OBAMA

Dan il-bidu tas-sena, li jaħbat ukoll għeluq l-ewwel sena minn meta ħa l-ġurament, ma tantx jidher jipprometti għall-President Amerikan Barak Obama, u jekk, kif jgħidu t-Taljani, “il buon giorno si vede dal mattino”, allura bir-raġun għandu għalxiex jinkwieta, l-aktar meta jiftakar li proprju lejn tmiemha,  eżattament f’Novembru li ġej, l-Amerikani jerġgħu imorru jivvutaw biex jaħtru nofs il-membri tal-Kungress.

Il-ġimgħa li għaddiet kompla jberraq għalih u għall-partit tiegħu. F’Massachusetts saret l-elezzjoni biex jimtela’ l-post ta’ senatur li spiċċa vojt wara l-mewt ta’ Ted Kennedy. Għal kważi 50 sena dan dejjem intrebaħ mill-partit Demokratiku, u li minħabba f’hekk l-istat kien meqjus bħala fortizza tad-Demokratiċi.

Iżda issa l-eletturi minflok għażlu lill-kandidat Repubblikan ftit magħruf Scott Brown b’maġġoranza ta’ 52%. Dan wara żewġ telfiet oħra umiljanti għal Obama ftit xhur ilu f’żewġ stati oħra meqjusa żguri għad-Demokratiċi, li peró ukoll kienu spiċċaw ħaduhom ir-Repubblikani: New Jersey u f’Virginia, minkejja li, bħal fil-każ ta’ dik f’Massachusetts, Obama mar personalment jappoġġjahom tul il-kampanji rispettivi tagħhom.

Minkejja dan hu spiċċa tilef  il-maġġoranza kwalifikata ta’ 60 siġġu li kellu matul din is-sena li għaddiet, u li mingħajra issa mhux se jkun daqstant faċli għal Obama li jiggverna bil-kumditá u jevita t-tfixkil, is-sabutaġġ parlamentari , jew filibustering tar-Repubblikani f’liġijiet kontroversjali.

Bħal, per eżempju, dik tar-riforma fil-qasam tas-saħħa, li hu kien diġá għamilha fatta li għaddiet, għalkemm għad trid tgħaddi wkoll mill-Kamra tar-Rappreżentanti. Iżda jekk din il-liġi tiġi emendata b’xi mod, ikollha terġa’ titressaq quddiem is-Senat, fejn allura issa Obama tilef il-maġġoranza

Imma minbarra mir-Repubblikani, Obama issa jeħtieġlu jogħqod attent anki minn dawk ta’ madwaru. B’vapur qed jegħreq kulħadd jibda jaħseb biex isalva ġildu.

Li rrid ngħid huwa li fi ħdan il-partit Demokratiku qed jikber it-tgergir, l-iskuntentizza u n-nervużismu kontra ċerti għażliet politiċi ta’ Obama.

Il-bniedem li 15-il xahar ilu biss kien intqal li xegħel il-ħolm tal-folol bl-għajta tal-“Bidla”, issa qed inissel delużjoni, frustrazzjoni, dieqa jekk mhux ukoll irritazzjoni fost anki dawk ta’ madwaru.

Anki dwar il-liġi tas-saħħa l-verżjoni approvata fis-Senat ma tantx niżlet tajjeb ma’ diversi deputati Demokratiċi, ibda bl-istess speaker Nancy Pelosi li nhar l-Erbgħa stqarret dan fil-miftuh u qed tinsisti li l-liġi għandha terġá tiġi studjata mill-ġdid.

Dan għalih ifisser diżastru għax il-pjan ta’ Obama kien li tul l-ewwel 24 xahar tal-leġislatura tiegħu jgħaddi l-aktar riformi delikati u importanti, iżda dan issa jista’ jinsih tant kemm spiċċa dgħajjef.

Ma jistax aktar jibqà jipppreżenta ruħhu bħala l-president tal-bidla. F’għajnejn l-Amerikani Obama fi żmien rekord sar il-president tal-establishment. Mhux ta b’xejn li l-istħarriġ tal-opinjoni pubblika kollu issa ilu żmien juri l-popolarità dejjem nieżla, mis-70% ta’ madwar sena ilu, għall-inqas mill-50% ta’ bħalissa., rekord fl-istorja tal-ewwel sena ta’ kull president.

Ir-riħ tal-bidla jidher qed idur 90 grad favur ir-Repubblikani bi Scott Brown jirbaħ bi kważi l-istess slogan li kellu Obama ftit aktar minn sena ilu: “Change! Change! Change!

U jibqgħu jinsistu li d-dinja qed tisħon!

STAQSU LILL-INGLIŻ, U MHUX LILHOM BISS!

Bħalma rrimarkajt fis-Sunday Times dan l-aħħar – bi tweġiba lill-qarrej li kien, u baqa’ jinsisti li l-bniedem jaħti għat-tisħin tal-globu u bil-konsegwenzi katastrofici li hemm jistennewna jekk ma nisimgħux minn dawn il-profeti foloz – l-ikbar trux hu dak li ma jridx jisma’.

Infatti, minkejja li jiġu wiċċ’imb’wiċċ mar-realtà, xorta waħda jibqgħu jaħsbuha u jgħidu l-istess. Hekk reġà għamel il-Ħadd li għadda George Debono, minkejja li stedintu għat-tieni darba biex jaqra l-paper “Caught Green-Handed” u tajtu wkoll l-indirizz tal-link jidher ukoll fil-ġenb ta’ dan il-blog.

Iżda dan jippreferi jagħmel bħas-suppost esperti fil-klima li jaħbu rashom fir-ramel bħan-nagħma, l-“esperti” li, minkejja li diversi pajjiżi bħalissa qed jintlaqtu mill-agħar xtiewi f’dawn l-aħħar 100 sena, qed jibqgħu xorta jippruvaw jinkkonvinċuna li d-dinja qed dejjem aktar tisħon.

Għax ma jistaqsux lill-miljuni ta’ Brittanici, iżda mhux lilhom biss, li f’dawn il-jiem, kuljum, qed ikollhom jeħduha ma’ borra u silġ bħalma qatt ma raw biex imorru għax-xogħol? Kif jistgħu qatt jikkonvinċu lil dawn li l-kundizzjonijiet ta’ kesħa estrema m’għandhomx jintużaw bħala provi li jgiddbu li l-bniedem hu responsabbli għat-“tisħin” tal-globu?

Il-fatti jibqgħu li l-emisferu fit-Tramuntana, mill-Amerika sal-Ewropa u l-Asja, għaddej mill-agħar xtiewi li niftakru: fiċ-Ċina u l-Korea t’Isfel, tul lvant, iċ-ċentru u l-punent tal-Ewropa, u wkoll fl-Amerika, anki fi stati l-aktar sħan bħal Florida, qed ikollhom iħabbtuha ma’ temperaturi rekord ta’ friża.

Diffiċli f’sitwazzjonijiet bħal dawn, jirnexxielek tibqa` tbellagħha li għal dan kollu jaħti l-bniedem. Bħalma kkummentajt darbi oħra, trid tkun mogħmi b’suppervja u arroganza kbira jekk temmen li l-bniedem jista’ qatt jeffettwa l-klima jew ibiddel il-kors tan-natura!

Ix-xjenza tat-Tisħin tal-Globu  kawżat  mill-bniedem hija waħda falluta, ibbażata fuq data falsifikata, bħalma qed dejjem aktar joħroġ mill-iskandlu Climategate. Huwa qerq li wieħed isostni li dan qed jikkawżah il-bniedem.

Christopher Booker, awtur tal-ktieb best-seller u fost l-aktar komprensiv dwar is-suġġett “The Real Global Warming Disaster” jgħid li “Hija ħaġa tal-għaġeb kif dawn il-lobbyists tat-tibdil fil-klima kawżat mill-bniedem, jibqgħu jinsistu meta qed jiġu kostantement imgiddba mill-fatti. Is-sena l-oħra fl-Arabja Sawdita għamlet il-borra, iżda dawn l-eko-katastrofisti xorta waħda jibqgħu jippersistu li t-temperatura qed togħla", bħalma qal fl-ewwel paġna il-ġurnal Daily Express (06/01/10, ritratt)

Anzi oħroġ il-għaġeb sa’ jinsistu wkoll li dan it-temp kiesaħ hu kkawżat mit-tisħin tal-globu !!!!

Taf biex jonqos joħorġu issa? Li dan it-taqlib fit-temp huwa twissija tat-tieni miġja ta’ Kristu fid-dinja! Iżda, bilħaqq ….din diġà kien hawn min iddikjaraha!

Il-verità hija li d-dinja ħierġa minn ċiklu mill-aktar naturali, u probabbli resqin lejn era glaċjali ġdida, altru milli xi waħda tropikali, u l-bniedem jaqblillu jħejji biex jadatta ruħu għaliha. Dwar din, iżda, nikteb darb’oħra.

Terroriżmu Islamiku: Aħjar “Uff” inkella “Aħħ”

verifika kulturali (Cultural Profiling)

Abdulmutallab, it-terrorista suwiċida fallut ta’ Jum il-Milied fuq l-Istati Uniti, huwa Niġerjan ta’ 23 sena, edukat fi skola Brittanika u msieħeb f’al Qajda tal-Jemen. Jiġifieri żviluppa l-karattru tiegħu fi tlett kontinenti differenti (Afrika, Ewropa, Asja), u tlett kulturi distinti, ingħata l-ordni mill-Jemen, iżda wettaq il-vjaġġ tiegħu tal-mewt minn Niġerja għall-Olanda u lejn l-Amerika.

Fl-Ewropa ma mponejniex aktar restrizzjonijiet speċjali fuq min jasal mill-Afrika, filwaqt li l-Amerikani jippermettu dħul relattivament faċli f’pajjiżhom lil min imur hemm mill-Ewropa. Fl-ajruporti jkollna nneħħu ż-żraben, u ma nġorrux fuqna fliexken kbar mimlija b’xi likwidu. Iżda Abdulmutallab kien ħeba’ l-isplussiv fil-qalziet ta’ taħt!

Wara l-massakru fallut tal-Milied, is-sigurtá fl-ajruporti kompliet tiżdied bil-kbir. Iżda kemm verament se jirnexxielha twaqqaf attentat ieħor bħal dak? Il-veritá hija li dan it-tkabbir fil-miżuri ta’ sigurtá dejjem seħħew WARA l-ideat li vvintat l-al Qajda biex tiżgiċċahom.

Minħabba fit-terroristi qed ikollna dejjem innaqqru mil-libertajiet l-aktar sempliċi tagħna. Issa bniedem li qed jivvjaġġa fuq xogħol, għal bżonn jew inkella għall-pjaċir, lanqas jista’ imur fit-toilet tal-ajruplan fl-aħħar nofs siegħa tal-vjaġġ, lanqas jekk ikollu bżonn urġenti. Dan għax Abdulmutallab mar fit-toilet biex jarma l-bomba li kellu, hekk kif l-ajruplan kien wasal biex jillandja. Minħabba fih ukoll se jkollna wkoll nogħqodu għal scanning komplut ta’ ġisimna, ġaladarba hu ħeba l-isplussiv fil- qalziet ta’ taħt.

[[Fir-ritratt Abdulmutallab (bi flokk aħmar xellug) jidher meta, ta’ 15-il sena biss, kien ingħaqad fi protesta kontra s-sanzjonijiet mill-gvern Ingliż kontra l-Iraq fl-2001, organizzata mill-“paċifista” Brian Haw (lemin bilqiegħa wara t-tabella) f’Parliament Square, Londra]]

Allura kieku xi terrorista ieħor ifettillu jaħbi l-isplussiv f’xi toqba f’ġismu, nibdew niġu spezzjonati hemm ukoll?! U jekk ieħor jittanta jisplodi lilu nnifsu f’nofs l-oċean, allura jkollna nibqgħu bilqiegħda tul is-siegħat kollha tal-vjaġġ?

Probabbli hekk ikollna nagħmlu. Nannietna kienu jgħidu Aħjar “Uff” inkella “Aħħ”, jiġifieri aħjar tiddejjaq tagħmel xi ħaġa, milli tbati  l-konsegwenzi jekk ma tagħmilhiex. Aħjar id-dwejjaq milli l-uġigħ.

Iżda allura se nibqgħu sejrin hekk, innaqqru mill-libertajiet tal-maġġoranza minħabba minoranza fanatika li m’għandha l-ebda rispett lejn il-ħajja, lanqas dik tagħhom stess? Possibbli m’hemmx soluzzjonijiet oħra. Dażgur li hemm. Imma l-mexxejja politiċi responsabbli għandhom ir-rieda, biex ma ngħidx kuraġġ iwettquhom?

Sfortunatament ix-Xellugin fil-Punent għal snin twal irnexxielhom jiddominaw mhux biss politikament, iżda anki kulturalment, u l-ikbar żewġ saħtiet li wikkewna bihom kienu l-political correctness u l-multikulturaliżmu. Dwar il-ħrafa ta’ din tal-aħħar nikteb aktar fit-tul darb’oħra, għalkemm anki din mas-suġgett tal-lum għandha x’taqsam ukoll.

Bħala reazzjoni għal dawn l-attentati l-gvernijiet tal-Punent, bħalma qed nikteb, dejjem wara jimponu aktar restrizzjonijiet fuq dak li kull vjaġġatur  ­– indistintament minn nazzjonalitá, kulur tal-ġilda jew twemmin – jistgħu iġorru magħhom.

Wara l-attentat tal-Milied, u wara li l-offerta ta’ l-“id miftuħa” li għamel il-President Obama sena ilu malli ħa l-ġurament, baqgħet tintlaqa’ bil-ponn magħluq. Obama kellu joħroġ lista “sewda” ġdida ta’ 14-il pajjiżi meqjusa bħala perikolużi, jiġifieri li jistgħu ikunu għejun ta’ terroriżmu: il-Jemen (l-uniku pajjiż fid-dinja fejn al Qajda taġixxi fil-miftuħ, torganizza meetings politiċi, eċċetra), Somalja, Afghanistan, Pakistan, Iran, Sirja, Libanu, Iraq, Niġerja, Sudan, Arabja Sawdita, Ċina, Kuba u Korea Komunista.

Il-lista ma tagħmel ebda distinzjoni ta’ razza, sess jew reliġjon. It-turista u l-missjunarju Nisrani li fuq il-passaport ikollhom it-timbru ta’ wieħed mill-pajjiżi fuq din il-lista sewda jiġu ttrattati fil-fruntiera eżattament bħal min jippriedka l-mibiegħda  jiħadista.

Fil-veritá la l-ethnic u lanqas il-country profiling (jiġifieri li wieħed jiġi ċċekkjat għax twieled f’xi pajjiż partikulari jew hu ta’ razza partikulari) ma jistgħu iserħulna rasna għal kollox kontra t-terroristi. Dan għax al Qajda jistgħu jinqdew biċ-“ċelluli b’għajnejhom koħol” fl-Ewropa, magħmula minn individwi mill-Punent, Bojod u mwielda fl-Ewropa. 

L-al Qajda, peró, ma tista’ qatt tasal tuża Musulman moderat, Lhudi, Nisrani, Komunista, ateu jew Liberali biex iwettaq attentat suwiċida. Dan għax huwa biss musulman partikolarment radikali, appuntu jihadista konvint, li jasal jemmen li billi joqtol lilu nnifsu (u lil għajru) b’hekk se jmur il-ġenna mdawwar b’għexiren ta’ verġni!

Għalhekk bħala miżura oħra, żgur aktar effettiva ta’ sigurta’ preventiva, s-servizzi sigrieti tal-Punent jeħtieġ li jibdew immedjatament iħaddmu sistema ta’ cultural profiling, iċċekkjar jew verifika kulturali. X’jiġifieri?

Abdulmutallab fl-iskola kien magħruf bħala propagandista ta’ ideat jiħadisti. Kien sostenitur dikjarat tal-gwerra qaddis tal-Islam kontra l-infidili, il-“Kruċjati u s-Sijonisti”, tant li kienu jsejħuku “il-Papa”, u hu fil-Milied sempliċiment wettaq att ta’ gwerra, skond it-twemmin tiegħu.

Trid tiġi rfinata, għalhekk, sistema teknika u metodi biex issir magħrufa l-viżjoni tad-dinja ta’ passiġġier qabel dan jitħalla jitla’ fuq ajruplan, ferrovija jew vapur.

Li kieku saret din il-verifika kulturali fuqu, Abdulmutallab kien żgur jispiċċa fin-no-fly list tas-CIA/FBI, u lanqas biss kien jitħalla jitla’ fl-ajruplan li ttanta jisplodi. Dejjem kieku dawn għamlu dmirhom kif suppost, u kieku Obama ma ppruvax, quddiem it-theddid terroristiku, jaħbi rasu fir-ramel bħan-nagħma, u ta’ taħtu għamlu bħalu u naqqsu l-allerta.

Iżda wisq nibżá li sistema bħal din ta’ cultural profiling ma ssirx għax, skond idea ripetuta bla waqfien f’dawn l-aħħar għaxar snin, il-kulturi kollha għandhom l-istess dinjitá, illi jekk niddikjaraw gwerra lill-jiħadisti naħsbu li b’hekk qed noffendu l-Islam kollu kemm hu, u rridu nevitaw “battalja ta’ ċiviltá”.

Allura nippermettu lil jiħadisti dikjarati jippriedkaw l-mbiegħda kontra l-Punent 24 siegħa kull 24 siegħa, nħalluhom jirkbu ferroviji, ajruplani u vapuri wara li jgħaddu minn kontrolli l-istess għal kulħadd, joqtlu indistintament Lhud, Insara u Musulmani f’isem l-ideoloġija totalitarja qattiela tagħhom! Hekk sewwa!
Jidher, peró, li minkejja l-indotrinazzjoni Xellugija, il-popli qed jiftħu għajnejhom u jirribellaw: stħarriġ tal-opinjoni pubblika li sar minn Rasmussen din il-ġimgħa juri li 71% tal-Amerikani jemmnu li għallinqas għandu jsir xi tip ta’ racial, ethnic profiling jew dehra ġenerali, sabiex jiġi determinat fuq liema passiġġieri għandha ssir tfittxija fuq il-persuna tagħhom fl-ajruporti. Aħjar mix-xejn. Avolja hemm jista’ ikun diġá tard.

Obama jerġa’ isib l-Amerika

Erba’ ġimgħat ilu (eżattament fit-13 ta’ Diċembru) ikkummentajt dwar id-diskors stramb (meta tqies min kien qed jagħmlu u f’liema okkażjoni) tal-President Amerikan Obama meta aċcetta l-Premju Nobel għall-Paċi u kif dan jipprova kemm huwa veru li bejn il-paroli u l-fatti hemm baħar jikkumbatti. Obama ddikjara li “…fid-dinja hawn il-ħażen…” u li “ …il-movimenti paċifisti ma rnexxilhomx iwaqqfu l-armati ta’ Ħitler…” u li għalhekk “… li jkun hemm żminijiet meta n-nazzjon – waħdu jew ma’ oħrajn – isibu li l-użu tal-forza mhux biss ikun neċessarju iżda moralment ġustifikat”. Diskors li, wara li fis-sustanza kien jgħidu l-predeċessur tiegħu George W. Bush, tgħidx kemm qajmu rwiefen, kundanni, żeblieħ u tgħajjir ta’ ġellied (warmonger) kien jaqla’, anki mill-istess Obama, sħabu d-Demokratiċi, u x-Xellugin psewdo-paċifisti mid-dinja kollha.

Wara dak id-diskors il-qawwa tal-ajru Amerikana attakkat bażijiet ta’ taħriġ tal-al Qajda, u wara l-attentat fallut tat-terrorista Niġerjan Abdulmutallab fuq ajruplan li kien wasal biex jillandja fl-Istati Uniti, nhar it-Tnejn li għaddew Obama reġa “sab l-Amerika” meta ddikjara li “dan l-inċident serju huwa twissija tal-periklu li qegħdin niffaċċjaw, u min huma dawk li qed jheddu l-patrija tagħna.”

Iżda forsi aktar interessanti huwa l-mod kif Obama irreaġixxa meta qalulu l-ewwel darba bl-attentat. Għax għandkom tkunu tafu li dak il-ħin hu kien, u hemm għadu sal-lum il-Ħadd meta qed nikteb, fil-bajja ta’ Kajlua, fil-Ħawaj għall-vaganzi (fir-ritratt jilgħaq il-ġelat favorit tiegħu fil-Ħawaj)!

Infatti l-istqarrija li ħareġ l-istaff tiegħu mill-White House kienet qalet li wara li Obama ġie infurmat bl-attentat tlett sigħat wara li falla, dan kien “qed isegwi” is-sitwazzjoni, u li l-iskeda tiegħu ma kenitx se tinbidel – jiġifieri li kien se jibqa’ jgawdi l-vaganzi fil-Ħawaj.
(Tiftakru xi storbju kienu għamlu (anki fid-dokumentrju politiku ta' Michael Moore) għar-reazzjoni ta' Bush meta kien fi skola mat-tfal u nfurmawh bl-attakki ta' 9/11?!)

Dan l-atteġġjament taparsi kalm, iżda fil-fatt ta’ suppervja, kważi infantili, biex ma jammettix mal-elettorat li tellgħu, li al Qajda xorta baqgħet tittrattah bħal Bush, beda jinkwieta bil-kbir lil dawk ta’ madwaru, tant li Doug Schoen, li kien ħadem għad-Demokratiku Bill Clinton fis-Snin 90, iddikjara li “Obama assolutament missu affronta s-sitwazzjoni bħala emerġenza ta’ sigurta’ nazzjonali, ġie lura Washington u sejjaħ laqgħa għolja bipartiġġjana, mal-Oppożizzjoni Republikana.”

Iżda Obama webbes rasu u baqa’ vaganza mal-familja, għalkemm wara li nduna, jew qalulu, li għaxxaqha meta, nhar it-Tnejn ukoll, sejjaħ lil Abdulmutallab “an isolated extremist” (!), il-bieraħ kellu jammetti li dak tħarreġ mill-grupp al-Qajda tal-Peniżola Għarbija ta’ al Awlaki, li bħal Abdulmutallab u tant oħrajn, qed jiġu edukati fil-Punent, biex imbagħad f’daqqa waħda jinbidlu f’terroristi suwiċidi!
Sadattant, l-ewwel opinion polls li saru wara l-attentat, juru li l-popolarita' ta' Obama kompliet tonqos, tant li skond dak ta' Rasmussen 56% tal-Amerikani ma japprovawx it-tmexxija tieghu, u huma biss  44% li jaqblu miegħu. Dan f'inqas minn sena minn meta ħa l-ġurament!
Huwa wkoll wieħed mill-aktar ratings baxxi (anki skond il-poll l-iehor influwenti, Gallup) ta' kull president fil-bidu tat-tieni sena tal-mandat tiegħu!

Annimal timmansaħ, Terrorista LE!

F’Mejju tas-sena l-oħra l-President Obama ħabbar il-pjan tiegħu biex, bl-iskuża ta’ investigazzjoni dwar allegati abbużi ta’ priġunieri tal-gwerra kontra t-terroriżmu taħt l-amministrazzjoni ta’ Bush, iwaqqaf unita’ ġdida biex tinterroga l-priġunieri  u b’hekk minn taħt is-CIA dawn jgħaddu taħt l-FBI, bil-kontroll dirett tan-National Security Council tal-President fil-White House.

Proprju wara l-attentat fallut tat-terrorista Abdulmutallab f’Jum il-Milied fuq ajruplan tal-passiġġieri li kien wasal biex jinżel f’Detroit, sar magħruf li t-terrorista rnexxielu, mingħajr ebda tfixkil, jitla’ fuq l-ajruplan, minkejja li missieru stess (fost l-ikbar sinjuri fl-Afrika) kien ilu li wissa’ lill-ambaxxata Amerikana fin-Niġerja kontra ibnu. Kif ġrat ħaġa bħal din, meta tqies li wara l-attakk terroristiku bl-ajruplani fuq l-Istati Uniti fil-11 ta’ Settembru, tul iż-żmien li damu jiggvernaw ir-Repubblikani b’Bush, l-ebda attakk jew attentat ta’ attakk ieħor simili ma seħħ?

Ta’ min ifakkar li xahar qabel dak l-attakk, li fih kienu inqatlu l fuq minn 3000 ruħ, is-CIA kienet wissiet lill-FBI dwar tnejn mill-ħames terroristi li, iżda, dan ma kenux ħadu dik it-twissija bis-serjeta’ biżżejjed. Għalhekk waħda mill-miżuri li kien ħa Bush kien it-twaqqif tan-National Counter Terrorism Centre (NTCC) biex jikkordina x-xogħol bejn dan iż-żewġ agenziji u oħrajn.

Jidher, iżda, li wara li Obama leħaq president u beda jwettaq riformi politiċi fil-qasam delikat tas-sigurta’ li jimminaw lill-istess sigurta’ u żġur ħallew effetti devastanti fuq is-CIA, reġa’ beda d-diżgwid u tħarbit tal-komunikazzjoni bejn din u l-FBI.

Infatti din il-ġimgħa sar magħruf li wara r-rapport ta’ missier Abdulmutallab, saret laqgħa għolja fl-ambaxxata li għaliha kien hemm preżenti uffiċjal tas-CIA, iżda mhux tal-FBI, u meta ntbagħat rapport lin-NCTC, dawn ma qiesux lil Abdulmutallab perikoluż biżżejjed biex jinkluduh fil-listi tat-Terrorist Screening Centre tal-FBI, la f’dik ġenerali ta’ individwi suspettużi, la f’dik li dwarhom irid isir iċċekkjar massimu qabel jitilgħu fuq ajruplan lejn l-Amerika, u wisq inqas f’dik ta’ madwar 3000 li m’għandhom qatt jitħallew jivvjaġġaw fuq ajruplan, in-"no fly list"!

Barra minhekk fuq l-ajruplan tad-Delta Airways ma kien lanqas Air Marshal wieħed Amerikan (jiġifieri aġent tas-sigurta’ pajżan għassa f’każ ta’ xi attentat terroristiku), u kellu jkun passiġġier, reġista Olandiż, li b’kuraġġ kbir qabeż fuq it-terrorista u waqfu qabel leħaq sploda lilu nnifsu u l-ajruplan.

     Issa Obama qed jgħid li se jżied in-numru ta’ dawn il-Marshalls fit-titjiriet lejn u ‘l barra mill-Istati Uniti, wara li, bħal fi żmien l-aħħar amministrazzjoni Demokratika (dik ta’ Clinton), fil-pajjiż tnaqqset l-allerta, il-viġilanza, għax ħasbu li la minflok Bush kien leħaq Obama, it-terroristi mmansaw ukoll.