INstabilità fl-Italja

"MHUX SE NIRTIRA, SE NIRDOPPJA L-IMPENN GĦALL-ITALJA"

Dan hu l-video messaġġ li xandar il-lejla l-Prim Ministru Silvio Berlusconi

www.forzasilvio.it

"WARA BERLUSCONI D-DILUVJU"

Hekk kienu jiktbu u jgħidu b'mod sarkastiku l-kritiċi u dawk kollha li ma jaħmlux lil dak li sal-bieraħ kien il-Prim Ministru mtella' demokratikament mill-ikbar maġġoranza li qatt kiseb gvern fl-Italja. Silvio Berlusconi warrab għax ried hu u mhux għax ġie sfiduċjat fil-Parlament jew fil-partit tiegħu – u huwa għalhekk li jiena personalment ma qbilt xejn ma' din d-deċiżjoni tiegħu. L-istess kif, naturalment, qatt ma għidt jew ktibt illi kieku hu jwarrab  kienet tkun l-Italja kollha li tispiċċa mkaxkra minn diluvju, u  mhux Ġenova biss! IŻDA minn dak li qed naraw iseħħ fl-aħħar sigħat, jekk mhux diluvju riesaq maltemp qalil fuq it-Taljani, l-aktar jekk tgħaddi ta' dawk li qed jinsistu li jbiegħdu kemm jistgħu d-dritt sagrosant li l-poplu Taljan jingħata ċ-ċans li jfittex jivvota, ġaladarba issa pajjiżu se jkun qed jiġi mmexxi minn gvern li m'għażilx hu.

Huwa għalhekk li s-Segretarju tal-PdL Angelino Alfano fil-laqgħa li kellu l-lejla mal-President tar-Repubblica Napolitano, infurmah li l-Popolo della Libertà kien se jappoġġa lill-gvern eventwali tekniku ta' emerġenza u temporanju sakemm

i) Dan jattwa u jimxi fuq il-programm ta' miżuri approvati mill-Parlament il-bieraħ, skond l-ittra li Berlusconi bagħat lill-Unjoni Ewropea;

ii) Ikun magħmul biss minn tekniċi u l-ebda politiku, u jkun ta' żmien limitat, u li

iii) L-ebda wieħed mill-ministri tiegħu ma jkunu jistgħu jikkontestaw l-elezzjoni bikrija kemm jistà ikun.

Jekk xi waħda minn dawn il-kundizzjonijiet ma jiġux rispettati, l-PdL jirtira l-appoġġ, hekk kif dan għandu maġġoranza żgura fis-Senat, u jkollha ssir elezzjoni.

Jingħad li l-ħsieb ta' Napolitano huwa li jaffronta l-emerġenza biex imbagħad issr l-elezzjoni fi żmien qasir.

It-tama ta' Napolitano ta' Parlament ta'"larghe intese" li suppost jappoġġa unanimament lil Monti ma teżistix, u dan mhux biss għax il-Lega Nord diġà ddikjarat li mhix se tappoġġah.

Id-Demokratiċi ta' Bersani diġà qed jiddikjaraw li ma jriduhx biss jaffronta l-emerġenza ekonomika, iżda li jagħmel riformi politiċi bħal dik tal-liġi elettorali u oħrajn li, però, ma jaqbilx magħhom il-PdL, bħalma ma jaqbilx mas-suġġeriment tal-kap tal-UDC Casini li l-gvern Monti jibqà sejjer sa' tmiem il-leġislatura fl-2013, skond kemm suppost baqa' il-gvern ta' Berlusconi, bid-differenza li dan eventwali ta' Monti ma ġiex elett mill-poplu.

Dan minbarra d-diskorsi u wirjiet ta' mibiegħda tal-bieraħ kontra Berlusconi u ċ-ĊentruLemin fil-Parlament u mill-partitarji Xellugin  organizzati barra, jistennew lil Berlusconi fi triqtu biex jirriżenja, ma tantx jawguraw tajjeb għar-rikonċiljazzjoni, għallinqas temporanja, biex jiġi salvat il-pajjiż, bħalma qal li xtaq Napolitano.

Għalhekk qed  ngħid li jekk il-poplu mhux se jingħata d-dritt li jivvota llum qabel għada, għall-Italja jekk m'hemmx dilluvju, żgur li riesaq żmien ta' instabbilità li tistà  veru twassal għal baħar imqalleb.

"Sangue e lacrime", demm u dmugħ hemm lest għat-Taljani – dak li kienu lesti jfixklu kemm jifilħu fil-Parlament b'emendi u kontra-emendi għall-budget imsejjaħ Maxiemendamento b'dak li trid l-UE, iżda li, għax Berlsuconi wiegħed li kien se jwarrab malli dan jgħaddi, issa ivvutawlu kollha  mingħajr emendi.

Qal sewwa illum Vittorio Sgarbi – li mhux l-ewwel darba kkritika lill-gvern ta' Berlusconi – li b'riferenza għal dawk li marru jiffesteġġaw u jinsultaw għax ħelsu minnu, malli jindunaw li lanqas il-gvern Monti mhu se jirnexxielu jsolvi l-problemi kif riedu, u ma ħallewx lil Berlusconi jsolvi, fi żmien qasir se jibku lil Berlusconi ... imbagħad ikun jerġà imiss lilu li jidħak.

JUM TA' LIBERAZZJONI MINN XIX?

Il-Kap tad-Demokratiċi l-post-Komunista Bersani kellu l-wiċċ iqabbel il-jum tal-bieraħ wara li rriżenja, kif kien wiegħed, Berlusconi, mal-25 ta' April, ċelebrat mit-Taljani bħala jum il-liberazzjoni min-NażiFaxxiżmu. Imma jum il-ħelsien minn xix?

Berlusconi u l-gvern tiegħu, kif bdejt ngħid, ġie vvutat b'maġġoranza assoluta mill-poplu fl-2008. Maġġoranza li sfat imdajfa mill-Ġuda Fini u 32 deputati u 10 senaturi li ħarġu mill-grupp tal-Popolo della Libertà. Dak l-istess Fini li kien qal li lest jirriżenja mill-kariga ta' Speaker tal-parlament minuta wara li Berlusconi jagħmel l-istess, iżda li sakemm qed  nikteb għadu mwaħħal mas-siġġu.

Berlusconi warrab biex iżomm il-wiegħda li għamel nhar il-Ħamis, u żgur li mhux għax jaħti għas-sitwazzjoni ekonomika li tinsab fiha l-ekonomija tal-pajjiż.

Din, l-ekonomija Taljana, kienet ilha sejra lura għexiren ta' snin meta Berlusconi leħaq prim ministru. Imma tul it-tmexxija tiegħu beda jsir progress sakemm il-gvern kellu l-maġġoranza assoluta. Iżda mbagħad wasal it-tradiment ta' Fini, u faqqgħet wkoll il-kriżi finanzjarja-ekonomika globali.

Minkejja dan id-defiċit għall-2011 kien mistenni jinżel għal 4% tal-Prodott Gross Domestiku, wieħed mill-iżgħar fl-Ewropa, u terz inqas mill-medja tal-34 pajjiż tal-OECD (il-'klabb' tal-pajjizi sinjuri).

Skond id-Deutche Bank, mbagħad, dan mistenni jkompli niżel għal 2.2%. Mhux ħażin meta naraw li d-defiċit tal-Istati Uniti mistenni jlaħħaq 6.2% fl-2012, dak tal-Brittanja 6.9%, u ta' Franza u Spanja 5 fil-mija.

L-Italja għandha primary budget surplus (jiġifieri l-gvern idaħħal aktar milli jonfoq, kieku titnaqqas l-ispiża tal-imgħax fuq id-dejn). Id-dejn privat huwa baxx. Il-familji Taljani ġeneralment ma jonfqux aktar milli jdaħħlu, u l-ipoteki huma rari.

Dik tal-Italja hija ekonomija diversifikata u ma kellhix kriżijiet fil-housing bħal dawk li farrku lill-Istati Uniti, Spanja u l-Irlanda. Hija s-seba' l-ikbar ekonomija fid-dinja, f'pajjiż sinjur ħafna skond li-standards globali, bil-Financial Times dan l-aħħar tirraporta li valur medju ta' kull familja huwa €350,000; biżżejjed biex l-Italja ssalva lilha nfisha.

L-ikbar problema hija d-dejn nazzjonali, 120% tal-Prodott Gross Domestiku. Agħar minn hekk l-Italja trid toħroġ €233 Biljun  f'bonds is-sena d-dieħla, bil-yield jilħaq is-7.4%.

Imma ta min ifakkar li d-dejn nazzjonali ilu mill-inqas 20 sena jaqbeż l-100 fil-mija u ħadd ma deher qed jinkwieta żżejjed.

Iżda Berlusconi ma riedx li l-Italja ssir skjava tal-Ġermanja b'miżuri ta' awsterità li qed joqtlu l-ekonomija Griega u jagħmlu ħsara kbira lil Spanja, Portugall, Irlanda u Brittanja.

Aktar ma tnaqqas fl-infieq aktar se jonqos it-tkabbir tal-pajjiż, bil-konsegwenti tkabbir tal-kriżi tad-dejn nazzjonali.  Hawnhekk żgur ħadd ma jistà jgħid li Berlusconi għamel inqas minn ħaddieħor fiż-żona tal-Ewro biex jikkontrolla d-dejn.

Dan minkejja t-tfixil minn min kellu madwaru u telqu, u mill-oppożizzjoni uffiċjali, oppożizzjoni distruttiva għax ad personam, bħalma issa ġie ippruvat malli rajnihom "jimmansaw" wara li warrab Berlusconi.

Imma l-problema hija: KEMM SE JDUMU mansi, malli jibdew jirrealizzaw li l-mediċina Monti hija mediċina, qarsa, anki jekk issa mhux qed ikun iressaqha Berlusconi.

Imbagħad,  hawn naqbel ma' Sgarbi, veru jkun każ ta' min jidħak l-aħħar jidħak l-aħjar. 

Kieku t-Taljani jivvutaw illum (2)

ĊENTRU LEMIN 47.8% ; XELLUG 46.2%; INDEĊIŻI 39.6%

Għal darb'oħra, bħalma kien għamel lejn tmiem ix-xahar l-ieħor, fil-programm popolari tiegħu Porta a Porta tal-bieraħ Bruno Vespa nkluda r-riżultati ta' stħarriġ tal-opinjoni pubbliku minn tlett istituti ta' riċerka dwar kif jivvutaw it-Taljani fl-elezzjoni bikrija li trid issir dalwaqt.
Minn dan jerġà jirriżulta li l-elettorat Taljan jinsab maqsum kważi minn nofs eżatt, b'vantaġġ żgħir għall-partiti taċ-ĊentruLemin fuq dawk tax-Xellug: 47.8% kontra 46.2%. Iżda tajjeb wieħed jinnota wkoll li fost dawk li wieġbu lit-tlett istituti kien hemm persentaġġ għoli ta' 39.6% li għażlu li ma jwieġbux għax għadhom indeċiżi lil min se jivvutaw u jekk jivvutawx.
Dawn huma r-riżultati tas-sondaggi magħmula minn Ispo Srl, Ipr Marketing u EuroMedia Research li hawnhekk ġbart il-medja tagħhom:

ĊENTRU-LEMIN
Popolo della Libertà: 25.7%; Lega Nord: 8.0%; La Destra: 1.9% = 35.6%
Unione di Centro (UDC): 6.9%; Futuro e Libertà (FLI) : 3.7%; All. per l'Italia+Mov. per le Autonomie: 1.7% = 12.4% (miġbura fin-Nuovo Polo per l'Italia/Terzo Polo)
Total: 47.8%


XELLUG
Partito Democratico: 27.1%; Italia dei Valori (IdV): 7.2% = 34.4%
Sinistra e Libertà: 7.0%; Rifondazione Comunista: 1.8%; Pannella/Bonino: 1.3%; Partito Socialista: 0.7%; Verdi: 0.8% 
Total: 46.2%
Movimento 5 Stelle-Grillo: 3.6%.


Dwar id-39.6% indeċiżi x'se jagħmlu ta min wieħed jgħid li dawk li intervistawhom staqsewhom lil  min kienu vvutaw fl-aħħar elezzjoni tal-2008: 65% minnhom wieġbu li kienu vvutaw lil xi partit taċ-ĊentruLemin, li dawn jissarfu f'madwar 22% favur dawn il-partiti, kemm-il darba dawn fl-aħħar  mill-aħħar jiddeċiedu li jmorru jivvutaw u jerġgħu jivvutaw lill-istess partiti.
Ta min jinnota wkoll li terz tal-elettorat fl-Italja jiddeċiedi lil min se jivvota matul il-kampanja elettorali, u mhux qabel.
Fl-aħħarnett infakkar li dawn is-sondaggi jagħtu biss indikazzjoni, ħjiel, lejn fejn hu mxaqleb l-elettorat, u mhux bilfors li l-iskjeramenti t'hawn fuq jissarfu f'koalizzjonijiet qabel jew wara eventwali elezzjoni, speċjament fejn jirrigwardja lill-partiti tax-Xellug.
Infatti skond ma ħareġ mid-dibattitu tal-bieraħ, xejn m'hi ħaġa ċerta li, per eżempju, s-Sinistra e Libertà (SEL) u Rifondazione Comunista jiġu aċċettati f'xi koalizzjoni mal-Partito Democratico għall-elezzjoni. Minħabba li mhux żgur jaqbeż l-4% meħtieġa f'voti, il-moviment ta' Grillo, li mistenni jikkontesta għal rasu ma jikseb l-ebda siġġu. B'hekk ix-Xellug fil-fatt ikollu siġġijiet ekwivalwenti għal biss 42% tal-voti (PD+IdV+Soċjalisti+Pannella f'koalizzjoni elettorali, u s-SEL).
Dan, naturalment, jgħodd ukoll għall-partiti taċ-ĊentruLemin. Huwa għalhekk li Casini, Fini, Rutelli, u l-Movimento per le Autonomie  diġà ingħaqdu f'koalizzjoni, Nuovo Polo per l'Italia jew Terzo Polo, għax f'dan il-każ ikun biżżejjed li partit jikseb 2% tal-voti biex jirbaħ siġġijiet, basta l-koalizzjoni sħiħa tikseb 10% jew aktar tal-voti. 

Stabbilità fl-Italja (4)

"L-EWWEL U FUQ KOLLOX L-INTERESS TAL-PAJJIŻ"

"Jekk isir kollox kif suppost, fi Frar li ġej immorru nivvutaw, avolja dejjem irid ikun il-President tar-Repubblika li jiddeċiedi. Naraw kif se jkun il-finali. Minn naħa tiegħi poġġejt l-interess tal-pajjiż fuq dak tiegħi personali, tal-gvern tiegħi u dak tan-naħa politika tiegħi".
Hekk ikkummenta dalgħodu l-Prim  Ministru Taljan Silvio Berlusconi waqt il-Giornae Radio 1 tar-Rai wara li l-bieraħ, waqt laqgħa mal-President Napoletano, b'sorpriża qallu li hu kien lest biex, wara li l-gvern iżomm kelmtu mal-Ewropa u jgħaddi l-Liġi ta' Stabbilità fil-parlament, jirriżenja u jitlob lill-President biex isejjaħ elezzjoni  bikrija għal Frar li ġej.
Din kienet deċiżjoni sorpriża għax ħafna kienu dawk li kienu qed jistennewh jitlob vot ta' fiduċja fil-parlament, vot li probabbli kien jikkonvinċi lil uħud minn dawk li l-bieraħ astjenew fil-vot dwar ir-rendikont finanzjarju tal-pajjiż, din id-darba jivvutaw favur il-fiduċja.
Jidher, però, li l-Prim Ministru xeba' bil-kapriċċi ta' uħud minn dawk li hu kien għażel personalment biex jilħqu deputati, li meta jfettlilhom jinsew il-lealtà li għandhom lejn min ivvutalhom – biex ma ngħidx ir-rikonoxxenza lejn l-istess PM – u bħal Ġuda, tradituri (bħalma sejħilhom hu) jmorru kontra d-dixxiplina tal-partit li ħarġu u telgħu miegħu.
Fil-programm Mattino 5 ta' Canale 5 Berlusconi ħabbar ukoll li għalkemm mhux se jirtira għal kollox mill-politika, għallinqas tul il-kampanja elettorali li ġejja – hu mhux se jerġà jikkontesta  u floku fit-tmexxija tal-Popolo della Libertà u bħala futur Prim Ministru, se jkun hemm is-Segretarju tal-PdL Angelino Alfano.
Għalkemm l-aħħar kelma tkun tal-President tar-Repubblika, l-Prim Ministru qal li l-unika triq li fadallu hija elezzjoni bikrija, biex ikun il-poplu li jiddeċiedi min għandu jmexxih f'dawn iż-żminijiet diffiċli, u mhux xi gvern tekniku, provviżżorju, jew ta' xi koalizzjoni nazzjonali, li tmur kontra l-verdett li l-maġġoranza tal-poplu fl-aħħar elezzjoni li riedet gvern ĊentruLemini.
Dan apparti li l-Partit Democratico fl-oppożizzjoni diġà kien qal li ma jaqbilx mal-programm ta' riformi liberali li qed tesiġi mill-Italja l-Unjoni Ewropea biex jitnaqqas id-dejn tal-pajjiż.
Barra minhekk ma jistà jiġi ffurmat l-ebda gvern mingħajr is-sehem tal-PdL.
Għalhekk Berlusconi qed jinsisti li l-ewwel jgħaddi l-liġi ta' stabbilità bil-miżuri ekonomiċi-finanzjarji-soċjali anti-kriżi li l-gvern tiegħu wiegħed lill-UE fl-ittra li bagħat aktar kmieni dax-xahar, u mbagħad il-partiti Xellugin fl-Oppożizzjoni waqt il-kampanja elettorali jkollhom jispjegaw lill-poplu x'se jagħmlu b'dik il-Liġi ta' Stabbilità b'miżuri fuq il-pensjoni, l-liberalizzazzjoni u s-suq tax-xogħol, li jekk jiksruha, jiksruha wkoll mal-Ewropa, u l-Italja tispiċċa bħal Spanja, l-Irlanda u l-Greċja.
Iżda dan diffiċli jseħħ, għax ix-Xellug, issa li se jkun spiċċalhom l-uniku element li kien qed jgħaqqadhom, ċjoè l-"anti-Berlusconismo", mhux kapaċi jifforma gvern alternattiv għal wieħed Ċentru-Lemini, filwaqt li kull stħarriġ tal-opinjoni pubbliku għadu qed juri li l-maġġoranza tal-elettorat Taljan tippreferi l-partiti taċ-ĊentruLemini.

IL-POPOLO DELLA LIBERTÀ L-EWWEL PARTIT

Infatti, l-aħħar stħarriġ li sar mill-Istituto Ispo ta' Renato Mannheimer ħmistax ilu (24 ta' Ottubru) għall-ewwel darba f'dawn l-aħħar xhur, poġġa lill-Popolo della Libertà fl-ewwel post tal-preferenzi tal-elettorat Taljan, b'26.4% fuq il-25.9% tal-Partito Democratico.

Il-partiti l-oħra taċ-ĊentruLemin jiksbu bejnithom 22.3% maqsumin hekk:

Lega Nord (Bossi) : 8.7%; UDC (ta' Casini): 6.9; FLI (Fini): 5.2%; La Destra (Storace): 1.5%.

Dan ifisser li ċ-ĊentruLemin jikseb 48.7%, bil-PdL waħdu jingħata l-hekk imsejjaħ "premio di maggioranza" jiġifieri maġġoranza ta' siġġijiet fil-parlament, jekk jikseb is-26.4% tal-voti.

Mill-banda l-oħra l-Partito Democratico flimkien mal-partiti l-oħra Xellugin (Italia dei Valori-Di Pietro, Sinistra e Libertà (Vendola), Movimento 5 Stelle (Grillo) u Rifondazione Comunista) jiksbu 45.5%.

Dan meta 5.8% ta' dawk li wieġbu s-sondaġġ qalu li kienu se jivvutaw lill-partiti oħra, li ħadd minnhom ma jikseb imqar 1 fil-mija.

Stabbilità fl-Italja (3)

IL-GVERN JIRBAĦ VOT IMPORTANTI

Minkejja l-istampa li għal darb'oħra l-media internazzjonali u anki dik lokali li, bħas-soltu tirrepeti bħall-pappagalli dak li dik tirraporta, il-gvern Taljan ma tilifx il-maġġoranza fil-Parlament Taljan għas-sempliċi raġuni li l-vot li ttieħed illum wara nofsinhar ma kienx wieħed ta' fiduċja fl-istess gvern, u l-oppożiżżjoni Xellugija m'għandhix voti iżjed fil-parlament mill-koalizzjoni  Ċentru-Leminija fil-gvern immexxija mill-Prim Ministru Silvio Berlusconi.
Il-vot kien, iva, wieħed importanti, fiskali, għax jittratta l-budget, ir-rendikont finanzjarju għall-2010.  L-Oppożiżżjoni u xi deputati oħra ma daħlux jivvutaw biex fil-parlament ma kienx ikun hemm kworum. Iżda reġà għarralhom għax il-maġġoranza assoluta tad-deputati tal-partiti fil-koalizzjoni governattiva marru jivvutaw u vvutaw favur il-mozzjoni.

Dawn huma n-numri, bħalma jidher fir-ritratt:

Prezenti: 309 deputati 

Ivvutaw:   308 ; Astjena : 1

MAĠĠORANZA NEĊESSARJA:  155

FAVUR: 308

KONTRA:  ĦADD

Dan  ifisser li l-vot fiskali importanti għadda b'vantaġġ ta'  153 VOT (308-155=153) !!

Barra minhekk kien hemm deputat tal-PdL marid u iehor li wasal tard u ddikjara li ried jivvota "Iva".

Fil-votazzjoni ta' fiduċja li saret f'nofs Ottubru l-gvern kien rebaħ  bi 316-il vot. Illum dawn naqsu b'sitta u wieħed astjena, iżda dan ma jfissirx li se jagħmlu l-istess f'każ ta' vot ġdid ta' fiduċja fil-gvern Taljan. Għalhekk huwa żbaljat jew irid iqarraq min  jgħid li llum l-gvern Taljan tilef il-maġġoranza fil-parlament.

MHUX VERU lanqas, kif ġie rappurtat illum ukoll, li Bossi qal lil Berlusconi biex iwarrab!

Il-fatti huma li għal domanda ta' xi ġurnalist jekk hu jkunx favur Alfano bħala Prim Ministru f'każ li Berlusconi jirriżenja, Umberto Bossi wiegeb b'mod ironiku:

"U jekk le lil min inpoġġu? Lis-Segretarju tal-Partito Democratico (Bersani)?!"

Aktar qabel għal mistoqsija oħra jekk l-Lega talbitx lil Berlusconi biex jagħmel "un passo indietro (i.e. jirriżenja), Bossi kien wieġeb bl-istess ironija "gli abbiamo chiesto di fare un passo di lato, laterale"!

Persekuzzjoni Politika fl-Ukrajna (5)

TIMOSHENKO TAPPELLA LILL-U.E. BIEX XORTA TIFFIRMA L-FTEHIM TA' ASSOĊJAZZJONI MAL-UKRAJNA

Poster li jinsisti għall-ħelsien ta'  Timoshenko

F'appell twil li l-Kap tal-Oppożizzjoni Julia Timoshenko rnexxielha tibgħat mill-ħabs fejn tinsab maqfula wara sentenza politika mir-reġim fl-Ukrajna, hi appellat lill-Unjoni Ewropea biex xorta waħda tfittex tiffirma l-Ftehim ta' Assoċjazzjoni mal-Ukrajna minkejja s-sentenza ta' ħabs kontriha, wara li l-Parlament Ewropej l-ġimgħa l-oħra wissa' lill-President Ukren Yanukovich li jekk Timoshenko ma tinħelisx mill-ħabs, dan kien jipperikola l-iffirmar ta' ftehim mal-UE.
Timoshenko appellat biex l-UE  ma ċċaħħadx l-ħolma ta' miljuni ta' żgħażagħ Ukrajni li jinfatmu mill-imgħoddi ikraħ tal-imgħoddi billi jsiru ċittadini tal-Ewropa ħielsa; "Tiffrustrawx il-ħolma tagħhom; tikkastigawx lilhom għad-delitti tar-reġim tal-Ukrajna".
"Illum qed nitlobkom biex tiffirmaw il-Ftehim ta' Assoċjazzjoni u l-Kummerċ Ħieles ikun xi jkun id-destin tiegħi. Ma njstax inħalli l-libertà personali tiegħi tkun ir-raġuni għat-tmiem tal-ħolma Ewropea tal-poplu Ukrajn."
Timoshenko temmet l-appell tagħha b'dawn il-kelmiet:
...I finished writing this address to you in my cell, in the evening. Somewhere outside these prison walls the sun is setting. But I know for sure that it will rise again over my dear Ukraine. And this will be the sun of freedom, dignity and greatness for a free people deserving of a future in a united and free Europe. Vote and ratify the Agreement with Ukraine; it will be our common victory over authoritarianism.
Aqraw l-ittra sħiħa ta' Timoshenko hawnhekk: http://www.tymoshenko.ua/en/article/zacx2w36

Climategate Part 2

JAĦBU L-FATT LI D-DINJA M'GĦADHIEX TISĦON

Ftit aktar inqas sentejn ilu kien faqqa' skandlu fil-kamp internazzjonali xjentifiku li sar magħruf bħala Climategate li minnu sar  magħruf li xi xjenzjati fil-Climate Research Unit (CRU) tal-Università ta' East Anglia fl-Ingilterra kienu jimmanipulaw u jaħbu data fir-riċerki tagħhom ħalli jsostnu t-teżi li huwa l-bniedem li jaħti għat-tisħin tal-globu, tad-dinja.
L-istess ħaġa sar dan l-aħħar, din id-darba fl-Istati Uniti, bħalma sar magħruf illum, minn rapport ippubblikat fil-Mail on Sunday tal-Ingilterra.
L-istorja bdiet il-ġimgħa l-oħra meta team ta' riċerkaturi mill-Berkeley Earth Surface Temperatures (BEST) immexxi mill-Professur Richard Muller fl-Università ta' Berkeley f'Kalifornja ppubblikaw riċerka li skond huma turi li l-pjaneta tagħna saħnet b'mill-inqas grad ċentigradu mill-1950, u qed tkompli tisħon.
Dan ir-rapport – li ġie pubblikat ftit ġimgħat qabel man-Nazzjonijiet Uniti terġà tlaqqa' summit ieħor dinji dwar il-klima, din id-darba f'Durban, fl-Afrika t'Isfel – ġie ikkwotata fid-dinja kollha bħala prova, li ħadd ma jistà imeriha, li huma biss aktar miżuri biex jitnaqqsu l-emissjonijiet tas-CO2 li jsalvaw iċ-ċiviltà tagħna kif nafuha, u li għalhekk ħadd ma jista jkun aktar xettiku dwar din il-ħaġa.
Iżda llum l-Mail on Sunday svelat li membru ewlenija tat-team ta' Muller akkużatu li qed jipprova jqarraq bil-pubbliku billi jaħbi l-fatt li l-istess riċerka tal-BEST turi li d-dinja m'għadhiex tisħon.
Il-Professoressa Judith Curry, Chairperson tal-Department of Earth and Atmospheric Sciences fil-prestiġġjiuż Georgia Institute of Technology, sostniet li l-pretesa tal-Prof Muller li b'hekk ipprova li x-xettiċi dwar it-tisħin tal-globu huma żbaljati, hija wkoll 'żball kbir' , mingħajr bażi xjentifika.
Fl-intervista mal-Mail on Sunday hi qabblet dan il-każ mal-iskandlu famuż Climategate.
L-istess bħax-xjenzjati Ingliżi tas-CRU , il-kollegi ta' Curry fil-proġett BEST qed jippruvaw jaħbu t-tnaqqis fir-rati tat-tisħin tal-globu.
Infatti, l-Prof Curry qalet, l-istess data tal-BEST  turi li mit-tmiem tas-Snin Disgħin ma kienx hemm żjieda fit-temperaturi tal-pjaneta tagħna.

Graff li juri li t-temperaturi tad-dinja m'għolitx f'dawn l-aħħar 10 snin
skond data ta' università ta' Kalifornja, data li ppruvaw jaħbu

Imma graff li ħareġ il-BEST juri li suppost li d-dinja baqgħet tisħon kontinwament.
Iżda rapport pubblikat illum fuq is-sit tal-Global Warming Policy Foundation jinkludi graff bit-temperatura medja globali ta' dawn l-aħħar għaxar snin, mislut mill-istess data tal-proġett tal-BEST, li t-temperatura baqgħet dejjem fl-istess livell – dan minkejja li l-livelli tas-CO2 fl-atmosfera  baqgħu jogħlew kontinwament.
Dan imur kontra dak li bassru mudelli tal-klima li fuqhom studjaw xjenzjati sal-lum. "Dak li qed jiġri hawnhekk ma jidhirx li huwa dominat mis-CO2", sostniet il-Prof Curry.
Meta kkuntattjat il-Prof Muller ammetta li veru li d-data tal-BEST turi li t-temperaturi tad-dinja ma għolewx f'dawn l-aħħar 13-il sena, iżda skond hu dan jistà ma jkunx 'statistikament sinifikanti', għalkemm, żjied, jista' ikun li hu sinifikanti – stqarrija li ħawwdet lix-xjenzjati!
Il-Prof Curry kompliet tgħid lil Mail on Sunday li Muller qabad u xandar riċerka li għadha ma ġietx verifikata u konfermata (peer reviewed) kif suppost isir, minn esperti oħra fil-qasam.
Għalhekk, għalkemm  Muller jiċħad dan, is-suspett huwa li hu ppubblika r-riċerka, anzi parti mir-riċerka tal-BEST, in viżta tas-summit tan-NU – biex jinfluwenza l-opinjoni pubbliku u lid-delegati li se jattendu, biex forsi fl-aħħar jilħqu ftehim dwar xi protokoll ġdid minflok dak fallut ta' Kjoto, u li s'issa sar kemm-il summit simili, għalxejn.
B'xorti tajba, iżda, anki din id-darba kien hemm xi ħadd ta' kuxjenza li, bħal fl-ewwel Climategate, leħaq kixef il-qerq!

Persekuzzjoni Politika fl-Ukrajna (4)

QBIL BEJN IL-PPE U L-PSE FIL-PARLAMENT EWROPEW KONTRA S-SENTENZA TA' ĦABS LIL TIMOSHENKO

Kontra dak li soltu kien jiġri f'riżoluzzjonijiet dwar l-Ukrajna, fil-Parlament Ewropew illum kien hemm qbil bejn l-ikbar żewġ gruppi, dak tal-Partit Popolari Ewropew u tal-Partit Soċjalista Ewropew dwar riżoluzzjoni twila ta' kundanna għas-sentenza ta' seba' snin ħabs li nagħtat il-Kap tal-Oppożizzjoni fl-Ukrajna Julia Timoshenko u meqjusa bħala motivata politikament f'persekuzzjoni sistematika tal-oppożizzjoni mill-gvern awtoritarju xellugi pro-Russja tal-President tar-Repubblika Viktor Yanukovich.
Ir-riżoluzzjoni tal-Parlament Ewropew tinsisti li Timoshenko għandha titħalla teżerċita d-dritt tagħha li tieħu sehem b'mod sħiħ fil-proċess politiku minn issa u fl-elezzjonijiet li ġejjin fl-Ukrajna.
Id-deputati taż-żewġ naħat tal-Parlament Ewropew jaqblu li s-sentenza kontra Timoshenko hija ksur tad-drittijiet umani u l-liġi li ntużat kontriha tmur lura għal żmien l-era Komunista Sovjetika li m'hemmx lokha f'pajjiż li qed jaspira li jingħaqad fl-Unjoni Ewropea.
Għalhekk dawn jesiġu li l-eks Prim Ministru tiġi żgurata proċess legali fier, trasparenti u imparzjali fl-appell.
Il-Parlament Ewropew iħoss li jekk Timoshenko ma tinħelisx, dan ifixkel il-konklużjoni tal-Ftehim ta' Assoċjazzjoni mal-Unjoni Ewropea li suppost għandu jiġi ffirmat sa' tmiem din is-sena, u għal kuntrarju jbiegħed lill-pajjiż il-bogħod mill-UE, anki fid-dawl tat-tnaqqir tal-libertajiet demokratiċi, u l-użu tal-istituzzjonijiet statali għal skopijiet partiġġjani u vendetta politika.
Qabel għaddiet din ir-riżoluzzjoni, fl-Ukrajna dan l-aħħar inbdiet kampanja bl-iskop li l-poplu jiġi konvint li l-Unjoni Ewropea ma trudx lill-Ukrajna tissieħeb fiha, u li allura l-gvern ma kellux triq oħra għajr li ddur lejn ir-Russja.
Imma r-riżoluzzjoni tal-Parlament Ewropew tgħid li t-tisħiħ tar-relazzjonijiet bejn l-UE u l-Ukrajna u l-offerta lill-Ukrajna ta' perspettiva Ewropea huma fl-interess taż-żewġ naħat, basta l-Ukrajna tirrispetta l-kriterja kollha tal-prinċipji tad-demokrazija, drittijiet umani, libertajiet fundamentali u s-saltna tal-Liġi jiġu rispettati. Il-PE jitlob lill-Kunsill u Kummissjoni Ewropea biex jiffissaw data ġdida għal-laqgħa mal-President Yanukovich , wara li dik ippjanata dan ix-xahar tħassrtet bħala sinjal ta' protesta kontra s-senetnza li nagħtat lil Timoshenko.
Fi tweġiba l-lejla l-President Yanukovich kkonferma li l-pożizzjoni tiegħu għadha li l-Ftehim ta' Assoċjazzjoni li se jiġi ffirmat f'Diċembru għandu jwassal għat-tisħib sħiħ fl-UE, u li l-Ukrajna hija fit-triq li twettaq riformi ħalli ttejjeb is-sitwazzjoni, iżda dan mhuwiex proċess ta' malajr.
Tistgġu taqraw ir-riżoluzzjoni kollha hawnhekk:http://www.europarl.europa.eu/sides/getDoc.do?pubRef=-//EP//TEXT+MOTION+P7-RC-2011-0543+0+DOC+XML+V0//MT

Kieku t-Taljani jivvutaw illum

NOFS L-ITALJA ĊENTRU-LEMINI  U NOFSHA XELLUGIJA

Il-programm popolari ta' diskussjoni Porta a Porta immexxi minn Bruno Vespa l-bieraħ kien jinkludi stħarriġ tal-opinjoni pubblika minn tlett istituti tar-riċerka li sostanzjalment ikkonfermaw l-istess ħaġa: li kieku t-Taljani jmorru jivvutaw illum dawn jinqasmu kważi eżatt minn nofs bejn, fuq naħa l-partiti taċ-Ċentru-Lemin u fuq in-naħa l-oħra dawk tax-Xellug: 50.1% favur iċ-Ċentru-Lemin u 49.4% għall-partiti xellugin.
ĊENTRU-LEMIN
Popolo della Libertà: 26.5%; Lega Nord: 8.3%; La Destra: 1.5%; Alleanza di Centro/Grande Sud:1.2%   = 37.5%
Unione di Centro (UDC): 7.1%; Futuro e Libertà (FLI) : 2.3%; All. per l'Italia+Mov. per le Autonomie: 3.2% = 12.6%
Total: 50.1%
XELLUG
Partito Democratico: 27.2%; Italia dei Valori (IdV): 6.5% = 33.7%
Sinistra e Libertà: 7.0%; Rifondazione Comunista: 2.6%; Pannella/Bonino: 1.9%; Partito Socialista: 0.4%; Movimento 5 Stelle-Grillo: 3.8%;  =  15.7%
Total: 49.4%
Filwaqt li tajjeb ngħid mill-ewwel li meta mistoqsija lil min jivvutaw kieku kellha ssir elezzjoni issa, kien hemm bejn 25 u 30% li jew qalu li għadhom ma ddeċidewx jew inkella li mhux beħsibhom jivvutaw, minn dan l-istħarriġ joħroġ l-orjentament politiku tal-elettorat Taljan bħalissa.
Jiġifieri ma jfissirx li wara elezzjoni b'dawn ir-riżultati, il-partiti taż-żewġ skjeramenti bilfors jingħaqdu flimkien kif jidhru hawn fuq biex jippruvaw jiffurmaw gvern.
Dan għax sal-lum jidher li l-uniku qbil li hemm huwa bejn il-partiti li hemm bħalissa fil-gvern mal-Popolo della Libertà, u li skond l-istħarriġ jistgħu jiksbu 37.5%.
Mill-banda l-oħra l-ikbar partit fl-oppożizzjoni bħalissa, il-Partito Democratico għad m'għandu ftehim mal-ebda partit, u l-iktar li jinsab qrib huwa l-partit ta' Di Pietro, IdV li bejnithom imbassar li ma jaqbżux t-33.7%. Il-ħames partiti l-oħra xellugin, apparti dak ta' Grillo (li l-voti li jikseb huma l-aktar fir-reġjun tal-Emiglia-Romagna) diġà kienu fil-gvern mal-Partito Democratico (dak iż-zmien Democratici di Sinistra u l-Margherita ta' Bindi u Rutelli) fi żmien Prodi.
Dawn kienu f'dik li kienet issejħet l'Unione, meta però ma saddewx wisq flimkien, li kien inevitabbli meta tqies il-qawsalla jew balbuljata ta' ideat li jirrappreżentaw is-sitt partiti, minn Komunisti sa' Demokristjani xellugin. Aħseb u ara kemm jistgħu jiftiehmu u jsaddu bi Grillo magħhom bl-ideat populisti u anti-partitokratiċi tiegħu.
Dak iż-żmien l-unika ħaġa li kienet għaqqdithom kienet l-"anti-Berluskoniżmu", iżda x'se jagħmlu issa li Berlusconi diġà ħabbar li mhux se jikkontesta fl-elezzjoni li jmiss?!
Fuq in-naħa l-oħra l-ftehim għall-gvern ieħor taċ-Ċentru-Lemin jidher aktar possibbli għax teżisti aktar minn omoġenjità, għax kemm l-UDC ta' Casini, l-FLI ta' Fini, u l-MpA huma msieħba fl-istess Partit Popolari  Ewropew bħall-Popolo della Libertà, minbarra l-fatt li sal-elezzjoni li jmiss, kif ktibt qabel, Berlusconi ħabbar li se jkun warrab, u b'hekk tispiċċa l-pika li jidher li għandhom miegħu Casini u Fini.
Mill-istess stħarriġ imħabbar waqt Porta a Porta ħarteġ ukoll li dawk li qalu li se jivvutaw lil dawn il-partiti li bħalissa jinsabu flimkien fl-hekk imsejjaħ Nuovo jew Terzo Polo, jixtiequ li dawn ma jingħaqdu mal-ebda skjerament, iżda jekk dan isir l-maġġoranza jridu li dawn jingħaqdu mal-Popolo della Libertà.
Fl-aħħarnett l-maġġoranza ta' dawk li ma jafux lil min, jew mhux se jivvutaw (37%), huma eletturi taċ-Ċentru-Lemin, li d-deċiżjoni finali x'se jagħmlu jieħduha fl-aħħar ġimgħa tal-kampanja elettorali.
L-importanti issa huwa li l-partiti  minn  issa sa' meta tasal l-elezzjoni jiddikjaraw x'tip ta' gvern, koalizzjoni, se jiffavorixxu, jżommu kelmithom u ma jittradixxux lill-elettorat li jkun ivvutalhom – bħalma għamlu Fini u sħabu.
Hawn Casini jrid ikun ċar u onest għax il-votanti tiegħu huma Ċentru-Lemini bħalma wara kollox huma wkoll dawk ta' Fini, u żgur ma jridux li ħtija tal-aġir pikuż taż-żewġ mexxejja jispiċċa jiggverna x-Xellug.

Persekuzzjoni Politika fl-Ukrajna (3)

L-OPPOŻIZZJONI TRID ELEZZJONI BIKRIJA

Wieħed mill-mexxejja tal-Partit "Patrija" tal-kap tal-Oppożizzjoni Julia Timoshenko ħabbar il-bieraħ li se jressaq mozzjoni biex il-parlament tal-Ukrajna jiġi xolt u jsiru elezzjonijiet qabel iż-żmien.
Is-sit ta' Timoshenko http://www.tymoshenko.ua/en  ħabbar li waqt konferenza stampa Oleksandr Turchynov sostna li skond il-kostituzzjoni il-parlament jistà jxolji lilu nnifsu, filwaqt li qal li l-Ukrajna m'għandhix bżonn parlament li jobdi ordnijiet illegali, jissekonda persekuzzjoni politika, jeqred il-futur ekonomiku u soċjali taċ-ċittadini, u mhux kapaċi jieħu deċiżjonijiet kontra l-kriżi.
"Kull ġurnata li dawn jibqgħu fil-poter hija perikoluża wisq għall-pajjiżna. Jiena ċert li filwaqt li din il-mozzjoni tagħna mhix se tiġi appoġġjata mill-maġġoranza favur il-President tar-Repubblika Yanoukovich fil-parlament, se ssib l-appoġġ sħiħ tal-poplu Ukren, u li dan mhux se jonqos milli jkabbar il-pressjoni fuq l-istess parlament."
Sadattant, fiwaqt li d-difiża tal-eks prim Ministru Timoshenko lestiet l-appell mis-sentenza ta' seba snin ħabs kontriha, l-Unjoni Ewropea pposponiet żjara li Yanukovich kellu jagħmel fi Brussels nhar il-Ħamis li għadda, b'kelliem għall-Kummissarju tal-Politika Barranija tal-UE Ashton, qal li din id-deċiżjoni ttieħdet biex Yanukovich u r-reġim tiegħu jirrealizzaw li "jeħtiġilhom jagħmlu progress biex jiżguraw li fl-Ukrajna ssaltan il-liġi (rule of law) u l-indipendenza tal-ġudikatura."
L-Unjoni Ewropea diġà għamlitha ċara li tqies is-sentenza kontra Timoshenko bħala motivata politikament biex teqred mix-xena politika l-ikbar avversarju ta' Yanukovich, u li dan se jkollu implikazzjonijiet serji fuq ir-relazzjonijiet bejn l-UE u l-Ukrajna, inkluża l-konklużjoni tal-Ftehim ta' Assoċjazzjoni li kellu jiġi ffirmat sal-aħħar tas-sena.
Is-sentenza ġabet reazzjoni negattiva mhux biss mill-UE u l-Punent, iżda saħansitra mir-Russja, meqjusa bħala alleata ta' Yanukovich.
Għal tagħrif sħiħ dwar dan il-ġuri-farsa ta' Timoshenko ara l-posts tiegħi tat-8 u l-11 ta' Ottubru, u dan il-video, li nħadem qabel ma nagħtat is-sentenza fil-11 tax-xahar:

THE TRIAL OF YULIA TYMOSHENKO. THE TRUE STORY

I T - T M I E M  T A'  T I R A N N

Ħadd issa ma fadallu l-iċken dubju li d-dittatur-tirann Muammar Gaddafi mejjet. Hawn jidher il-kadavru tiegħu f'kamra-freezer fil-belt ta' Miżrata (ritratt), sakemm għada suppost li għandu jindifen bir-ritwali kollha Musulmani, mhux bħall-eluf li r-reġim tiegħu qatel tul 42 sena u li ħadd ma kien ikun jaf x'sar minnhom.
Li għadu mhux ċar huwa kif inqatel, ħaġa li sinċerament, personalment qajla jinteressani, u ma nifhimx l-għaġeb kollu li qed isir dwar dan. Forsi kien ikun aħjar li għadda ġuri bħal ma għamlu lil Saddam Hussejn tal-Irak.  Imma issa li hemm hemm.
Il-Ħadd il-Kunsill Transitiorju Nazzjonali se jiċċelebra uffiċjalment il-ħelsien tal-Libja mill-ħakma ta' Gaddafi u r-reġim tiegħu, u wara l-festi trid tibda l-biċċa xogħol iebsa tal-bini mill-ġdid ta' Libja demokratika u liberali, ħalli la t-tribù u lanqas l-estremisti Islamiċi ma jingħataw ċans jisfrattaw u jġibu fix-xejn dak li kisbu b'demmhom mal-50,000 Libjan. Nistennew u nittamaw.